އަހަރެމެން ދިރިއުޅެމުން މިދަނީ ދުނިޔޭގައެވެ. މިއީ ފިތުނަވެރި ތަނެކެވެ. އަދި މިއީ ދުނިޔެވީ ލައްޒަތާއި ވަގުތީ އަރާމުގެ ގޮވައްޗެކެވެ. ދަންނާށެވެ! މި ދުނިޔޭގައި އުފާވެރިކަމާއި އެކު އުޅެން ބޭނުންނަމަ، އުފާވެރިކަމަށް ނޭދޭށެވެ. ނަމަވެސް އަބަދުވެސް އަނެކާ އުފާކޮށްދޭށެވެ. މިއީ ވަކި ދީނެއް ތަފާތު ކުރުމެއްނެތި ގިނަ ބަޔަކު ގަބޫލުކުރަމުން އަންނަ ގޮތެކެވެ. ގަބޫލުކުރާ ހަމައެކެވެ. ނަމަވެސް ހިތާމައަކީ މި ހަމައަށް ތަބާވާ މީހުން އަހަރެމެންގެ ތެރޭގައި މަދެވެ. ވަރަަށްވެސް މަދެވެ.

އަބަދުވެސް، އަހަރެމެންނަށް ކުރެވޭހާވެސްކަމަކީ އުވާފެރިކަން ނުލިބިގެން ޝަކުވާ ކުރެވުމެވެ. ކީއްވެ ހެއްޔެވެ؟ އުފާވެރިކަން ބޭނުން ވާތީއެވެ. އެހެންނަމަވެސް އިސްވެ މި ފާހަގަ ކުރި ހަމައިގެ ސަބަބުން އުފާވެރިކަމަށް އެދުނަސް، އުފާވެރިކަން ލިބޭނެތޯއެވެ؟ ވިސްނާލާށެވެ! ވަރަށް އާދައިގެ ގުޅުންތަކަށްވެސް ވިސްނާލާށެވެ! ބީރައްޓެހި ދެ ރަށެއްގައި އުޅޭ، ދެ ރައްޓެހިން ކަމުގައި ވީނަމަވެސް މެއެވެ. އެކުގައި އުޅޭ އެކުވެރިއެއް ނުވަތަ އެކުވެރީންތަކެއް ނަމަވެސް މެއެވެ. ރަށެއްގައި އުޅޭ އެ ރަށެއްގެ ރަށްވެހިން ކަމުގައި ވިޔަސް މެއެވެ. އާއިލާއެއްގެ ތެރޭގައި އުޅޭ އާއިލާ މީހުންތަކެއް ނަމަވެސް މެއެވެ. އަދި ކިއެއް، ދެމަފިރިން ތެރޭގައިވެސް އޮތީ ހަމަ މި އުސޫލާއި ހަމައެވެ.

އެއްވެސް މީހަކު، އަނެކާއަށް ނުދިން ލޯތްބެއް، ނުދިން ހިތްހަމަޖެހުމެއް، ނުކުރި އިހްތިރާމެއް، އަނެކާގެ ފަރާތުން އެ މީހަކަށް ނުލިބޭނެއެވެ. ދިވެހި މުހާވިރާއެއްގައި ވެސް ވެއެވެ. "އިހްތިރާމް ކުރާށެވެ! އަދި އިހްތިރާމް ލިބިގަންނާށެވެ!" މި ބަހުގައިވެސް މި ބުނަނީ ފުރަތަމަ އިހްތިރާމް ކުރުމަށެވެ. އޭރުން އެ އިހްތިރާމް އަނބުރާ ތިބާއާއި ބައްދަލު ކުރާނެއެވެ.

އަހަރެމެން އަބަދުވެސް ބަލަންވީ އަނެކާ ހިތްހަމަ ޖެހޭގޮތަކަށެވެ. އެނގެއެވެ. ހުރިހާ އެންމެނެއް ނުރުއްސޭނެއެވެ. އަދި އަނެކާ އުފާކޮށްދޭން، ތިމާގެ ހައްގުތައް ނިގުޅައެއްވެސް ނުގަނެވޭނެއެވެ. މި ދައްކަނީ މިފަދަ އިސްތިސްނާ ހާލަތްތަކުގެ ވާހަކައެއް ނޫނެވެ. ޖުމުލަކޮށް ޖަމާއަތުގެ ވާހަކައެވެ. 

އަނެކާ އުފާވުމުން ތިބާއަށް އޮތީ ކޮން ގެއްލުމެއް ހެއްޔެވެ؟ ފަހަރުގައި އެ ވަގުތު، ތިބާ އަށް ތިބާ ބޭނުންވާ އުފާވެރިކަން ނުލިބިދާނެއެވެ. ނަމަވެސް ތިބާ އުފާވެރިކަމަަށް އެދޭނެމަ، އަނެކާ އުފާކޮށްދޭން ތި ކޮށްދިނީ ވަރަށްވެސް ރަނގަޅު ކަމެކެވެ. އެހެނީ އެ ކަމުގެ ސަބަބުން، ތިބާއަށް ވެސް އުފާވެރިކަން ލިބިދާނެއެވެ. އެއީވެސް އިންސާނުންނެވެ. އެހެންކަމުން އެ އިންސާނާއަށް ތިބާގެ ފަރާތުން އުފާވެރިކަމެއް ފޯރުކޮށްދެވިއްޖެނަމަ، އަނެކާގެ ހިތުގައި ތިބާއަށްވެސް އުފާވެރިކަމެއް ފޯރުކޮށްދިނުމުގެ ހެޔޮ ނިޔަތެއް އޮންނާނެއެވެ. ނަތީޖާ އަކަށްވާނީ ތިބާ ބޭނުން ވެގެން އުޅެން އުފާވެރިކަން ތިބާއަށް ލިބިދާނެއެވެ.

އާދޭހެވެ! އުފާވެރިކަން ބޭނުން ނަމަ، އުފާވެރިކަމަށް ނޭދޭށެވެ. ނަމަވެސް އަނެކާ އުފާކޮށްދޭށެވެ! މިކަން ތަޖުރިބާ ނުކުރާމީހެއްނަމަ، ތަޖުރިބާ ކޮށްލާށެވެ! އޭރުން ދެން ލިބެން އޮތީ މުޅިން ތަފާތު އުފާވެރި ކަމެކެވެ.