އެއްޖިންސުން ގުޅުން ހިންގުމާއި، އެ ނުބައި މުޑުދާރު ޝައިޠާނީ ވަބާ މުޅި ދުނިޔޭގައި މިހާރު ފެތުރެމުން އެބަ ދެއެވެ. ސައްތައިންސައްތަ އިސްލާމީ ގައުމެއް ކަމަށް އަހަރަމެން ދައުވާ ކުރާ މި ދިވެހި ރާއްޖޭގެ ފަސްގަނޑުގައިވެސް އެއްޖިންސުން ގުޅުން ހިންގުން އާންމުވަމުން އެބަދެއެވެ. މިއީ ހިތާމައިގެ މައްޗަށް ހިތާމަހުރި، އެހާމެ ބިރުވެރި ކަމެކެވެ.
ހުޅަނގުގެ ގައުމުތަކުން ފަތުރާ، އެބައިމީހުން ގަބޫލުކުރާ މިނިވަންކަމަކާއި ލިބިދޭން ޖެހޭ ހައްގެއް ކަމަށް ބުނެ، އެއްޖިންސުން ގުޅުން ހިންގުން އެ ގެންދަނީ މުޅި ދުނިޔޭގައި ފަތުރަމުންނެވެ. ތައުލީމުދޭ މަރުކަޒުތަކާއި، ކުޑަކުދިންނަށް ދެވޭ ތަރުބިއްޔަތުގައިވެސް އޮތީ އެ ކުލަތައް ޖެހިފައެވެ. އެންމެ ފަހުން ގޮސް، މުޅި ދުނިޔޭގެ އެންމެން އެ ބައެއްގެ ކާޓޫނުތައް ބަލާ މަޝްހޫރު ކާޓޫނު އުފައްދާ ކުންފުންޏަކުންވެސް މި ވަނީ އެއްޖިންސުން ގުޅުން ހިންގުމަކީ އާދައިގެ އާންމު ކަމެއް ކަމަށް، ހުރިހާ ކުޑަކުދިންނަށް ދައްކުވަން މަސައްކަތް ކޮށްފައެވެ. ނަމަވެސް ދުނިޔޭގެ ގިނަ އިސްލާމީ ގައުމުތަކުން އެ ކާޓޫނު ވަނީ މަނާ ކޮށްފައެވެ.
ބަޔަކު މީހުން އަޑީގައި ތިބެ، ފަތުރާ މި ނުބައި މުޑުދާރު ހިޔާލާއި ފަލްސަފާ އަކީ މުޅި ދުނިޔެއަށް ފާވަމުންދާ ބިރުވެރި "އަޒާބެކެވެ". މިފަދައިން އެއްޖިންސުން ގުޅުން ހިންގުން ހުއްދަކޮށް އެކަމަށް ވަކާލާތުކުރާ މީހުން ބުނާ ގޮތުގައި "ލަވް އިޒް ލަވް" އެވެ. އާދޭހެވެ! ލޯތްބަކީ ލޯތްބެވެ! އެ މުޑުދާރު އަގީދާ ގަބޫލުކޮށް ފަތުރާ މީހުން ދެކޭ ގޮތުގައި ލޯބި ވާކަށް ވަކި މީހަކު ނެތެވެ. ވަކި އުމުރެއް ވަކި ނަސްލެއް ނެތެވެ. އަދި ވަކި ޖިންސެއްވެސް އެމީހުންނަކަށް ނެތެވެ. އެއީ އެބުނާ މިނިވަންކަމެވެ. އެއީ އެ ވަކާލާތު ކުރާ އިންސާނީ ހައްގުތަކެވެ. އާދޭހެވެ! އިންސާނާއަށް ހައްގުތައް ދެއްވި އިލާހު ނުދެއްވި ހައްގެއް އިންސާނާ ހޯދާ ދައްކާނީ ކޮން ހަމަ އަކުން ތޯއެވެ؟
އެއްޖިންސުން ގުޅުން ހިންގުމާއި ކައިވެނި ކުރުން ހުއްދަކޮށް ވަކާލާތު ކުރަމުންދާ ގައުމުތަކުގައި އެކަމަށް ވާގިވެރިވާ ރައްޔިތުންނާ ކުރެވުނު ބައެއް ސުވާލުތައް މީސް މީޑިޔާގައި ވަނީ އާންމު ވެފައެވެ. އެމީހުންނާ ކުރެވުނު ފުރަތަމަ ސުވާލަކީ، ލޯތްބަކީ ލޯބިކަމުގައި ގަބޫލުކުރަންތޯއެވެ. މާނައަކީ ކޮންމެ މީހަކާވެސް، ކޮންމެ ޖިންސެއް ވިޔަސް އުމުރެއް ވިޔަސް އިންސާނެއް ވިއްޔާ ލޯބި ވެވިދާނޭ ކަމަށް ގަބޫލު ކުރަންތޯ ކުރެވުނު ސުވާލެވެ. އެ ސުވާލުތައް އަމާޒުވި މީހުންގެ އިއްތިފާގުން އެ ސުވާލަށް އެއްބަސް ވިއެވެ. ކޮންމެ ޖިންސަކަސް ކޮންމެ މީހަކަށް ވިޔަސް ލޯބި ވެވިދާނެ ކަމަށެވެ. ދެން އެއާއި ވިދިގެން ކުރެވުނު އެހެން ސުވާލެއް އޮތެވެ.
އާދޭހެވެ! އެއްބަނޑު އެއްބަފާ ދެ ބޭބެއިން ނުވަތަ ދެ ދައްތައިން، ނުވަތަ ދައްތަ އަކާއި ބޭބެއަކު، ލޯބީގެ ގޮތުން ގުޅި ކައިވެނި ކުރެވިދާނެތޯ ކުރެވުނު ސުވާލެވެ. އެއީ ތާހިރު ކަމެއްތޯ ކުރެވުނު ސުވާލެވެ. ހުރިހާ އެންމެންގެ މޫނުމަތިންވެސް ފެނުނީ "ފަކުރު" މަންޒަރެކެވެ. އެއްވެސް މީހަކަށް ރުހިގެންވާ ހާލު އެކަމަކަށް ޖަވާބެއް ނުދެވުނެވެ. ނަމަވެސް ލޯތްބަކީ ލޯބި ކަމުގައި ބުނެވިފައި އޮތުމުން ފާޅުގައި އެކަމަށް އިންކާރު ކުރާކަށް ނުކެރުނެވެ.
ދެން ކުރެވުނު ސުވާލަކީ އެއިން މީހަކު އެމީހެއްގެ އެއްބަނޑު އެއްބަފާ، އެ ޖިންސުގެ މީހަކާ އެފަދަ ގުޅުމެއް ހިންގަފާނަންތޯ ކުރެވުނު ސުވާލެވެ. އެ ސުވާލަށް އެ އެންމެންވެސް ކުރީ އިންކާރެވެ. އެމީހުން ގަބޫލުކުރާ ގޮތުގައި އެކަން އެގޮތަކަށް ނުހިނގާނެއެވެ. އަދި މަޔަކާއި ދަރިއަކާއި ނުވަތަ ބަޔަފަކާއި ދަރިއަކާވެސް އެފަދަ ގުޅުމެއް އެބުނާ މިނިވަންކަމާއި ހައްގުގެ ތެރެއިން ތަރުތީބުވެ ނުހިނގާނޭ ކަމަށް އެ މީހުން ބުނަމުން ދިޔައެވެ.
ދެންވެސް ކުރެވުނީ ހަމަ އެފަދަ ސުވާލެކެވެ. ބޭނުން މީހަކާ، ބޭނުން ޖިންސެއްގެ މީހަކާއި ބޭނުން އުމުރެއްގެ މީހަކާއި ލޯބީގެ ގޮތުން ގުޅެވިދާނޭ ބުނާއިރު، "ޗައިލްޑް މެރިއޭޖް" އޭ ބުނެ އަށާރަ އަހަރު ނުވާ ކުޑަކުއްޖަކާ ކައިވެނި ކުރުން މަނާ ކުރަނީ ކީއްވެތޯ ކުރެވުނު ސުވާލެވެ. އެއީވެސް އެބައިމީހުންނަށް ޖަވާބެއްދޭން އުނދަގޫވި ސުވާލެކެވެ. ނަމަވެސް އެ ސުވާލާއި އިސްވެ ކުރެވުނު ސުވާލުތަކުގެ ޖުމްލަ ޖަވާބެއްގެ ގޮތުން ލޯބީގައި އިމެއް އަދި މިނެއް ވާން ޖެހޭނޭ ކަމަށް އެބައިމީހުން ބުނަމުން ދިޔައެވެ! ދެން ވެސް ކުރެވުނީ ސުވާލު ތަކެކެވެ!
ތިބުނާ މިނެއް އަދި އިމެއް ކަނޑައެޅީ ކާކުތޯ ކުރި ސުވާލެވެ. އެ ސުވާލުގެ ޖަވާބުގައި އެމީހުން ބުނީ މުޖުތަމައު ކަމަށެވެ. އެއީ މުޖުތަމައު ގަބޫލު ކުރާ މިންގަނޑު ތަކަކާއި އިންތަކެއް ކަމަށެވެ. އެއީ އިޖްތިމާއި މިންގަނޑުތަކެއް ކަމަށެވެ! އެއާއި އެކު ދެން ކުރެވުނު ސުވާލުވެސް އެހާމެ ފުރިހަމައެވެ. އެ އިންތަކާއި މިންތަކަކީ މުޖުތަމައު ކަނޑައަޅާ މިންތަކެއް ނަމަ، މުޖުތަމައުން މަަންމައާއި ދަރިންނާއި، އަދި ބައްޕައާއި ދަރިންނާއި، އެއްބަނޑު ްެއެއްބަފާ މީހުންނާއި، އަށާރަ އަހަރު ނުފުރޭ ކުއްޖާ އާއިވެސް ލޯބީގެ ގޮތުން ގުޅި، ގުޅުން ހިންގުމާއި ކައިވެނި ކުރުން އެއީ އާންމު އާދައިގެ ކަމެއް ކަމުގައި ދެކޭނަމަ، އެ ބަޔަކުވެސް އެކަން އެގޮތަށް ކުރާނެތޯ ކުރި ސުވާލެވެ. އެ ސުވާލުގައި އެމީހުން އިއްތިފާގުވެ ނޫނެކޭ ބުނެވުނެވެ. އަދި މުޖުތަމައުން އެ މިންތަކާ އިންތައް ބަަލައި ނުގަންނާނެ ކަމަށް އެމީހުން ބުނަމުން ދިޔައެވެ. ދެން ކުރެވުނު ސުވާލަކީ މުސްތަކުބަލު އެނގޭނެތޯ ކުރި ސުވާލެވެ. ޖަވާބުގައި އެންމެންވެސް ބުނީ ނޭނގޭނެ ކަމަށާއި ނަމަވެސް ލަފާ ކުރެވޭނެ ކަމަށެވެ. ދެން ކުރެވުނު ސުވާލަކީ ލަފާ ތަކަކީ ސައްހަ އެއްޗެއްތޯ ކުރެވުނު ސުވާލެވެ. ޖަވާބުގައި ހައްސަ ކަމަކަށް އެއްބަހެއް ނުވެވުނެވެ. އެހެންކަމުގައި ވެއްޖެނަމަ، މާދަމާގެ އެ ބުނާ އިޖްތިމާއީ މިންގަނޑުގެ ތެރެއަށް އިސްވެ ފާހަގަ ކުރި ކަންކަން ފެތިގެން ހިނގައިދާނެ ނޫންތޯއެވެ؟ ދެން އެހާލަތުގައި މިއަދު އެމީހުން އެ އިންކާރު ކުރި ލޯބީގެ ގުޅުންތަކަށް އެދުވަހުން ރުހޭނެބާއެވެ؟
އާދޭހެވެ! އެއްޖިންސުން ގުޅުން ހިންގުމާއި ކައިވެނި ކުރުމުގެ ވާހަކަ ދައްކާ މީހުންނަކަށް އެކަމުގައި އެއްވެސް ހުއްޖަތެއް ނުދެއްކެއެވެ. ހުއްޖަތް ދައްކަން އުޅުނު އުޅުނީހެން ވަނީ ފަލީހަތެވެ. ބޭޒާރެވެ. އާދޭހެވެ! އެމީހުންވެސް ގަބޫލުކުރާ ގޮތުގައި ލޯބީގައި ވެސް އިމެއް އަދި މިނެއް އެބަ ވެއެވެ. ހަގީގަތަކީ އެ އިމެއް ނުވަތަ މިނެއް ކަނޑަ އެޅުއްވީ މާތް ﷲ ކަމެވެ. އެ ކަލާނގެ ކަނޑައެޅުއްވި އިމުގައި އެއްޖިންސުގެ ގުޅުމަކީ (ގުޅުން ހިންގުމާއި ކައިވެނި ކުރުމަކީ) ކަނޑައެޅިގެން ހަރާމް ގުޅުމެކެވެ. އެހެންކަމުން އެއީ ގިޔާމަތާ ޖެހެންދެން ބަދަލެއް ނުވެ އޮންނާނޭ ހުކުމެކެވެ. މިނެކެވެ. އިމެކެވެ. ނަމަވެސް އެއީ އިންސާނާ ހަދާ އިންސާނާ ތަބައަވާ އިމެއް އަދި މިނެއް ނަމަ، އެ ނުލާހިކު ފަސޭހައިން ބަދަލުވެ ހިނގައިދާނެއެވެ. އެހެން ކަމުން އިންސާނުން އަމުލު ކުރާނޭ އިންތަކާއި މިންތައް އިންސާނާ އަމިއްލަ އަަށް ކަނޑަ އަޅާނަމަ އެ ކުރެވެނީ ބޭކާރު ކަމެކެވެ. ވިސްނާށެވެ! މި ނުބައި ވަބާ އަހަރެމެންގެ ތެރޭ އާންމުވިޔަ ނުދޭށެވެ. ހިތާމައަކީ އަހަރެމެންގެ ތެރޭގައި އެފަދަ ނަންނަމުން، މީސްމީހުންނާ މުހާތަބުކޮށް އުޅޭކަމެވެ. އެކަންކަން ކޮށްގެން ކަމެއް ނުވަތަ ނުކުރަނީސް ކިޔަނީ ކަމެއް ދެނަހުރި މީހަކު ނެތެވެ. އެނގޭހާވެސް ކަމަކީ މި ވަބާ އަހަރެމެންގެ ތެރޭގައި ވެސް ފެތުރޭ ކަމެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން