ދިވެހިންގެ މެދުގައި މަގްބޫލްކަން އުފެދިފައިވާ "ހިޓާޗީ" ބްރޭންޑްގެ އުފެއްދުންތަކަށް ހާއްސަކޮށްގެން ބޮޑެތި ޑިސްކައުންޓާއެކު އެސްޓީއޯ އިން "ހަމަ ހިޓާޗީ" ނަމުގައި ޕްރޮމޯޝަނެއް މިއަދު ފަށައިފިއެވެ.
މުޅި ރާއްޖެ އަށް ހުޅުވާލައިގެން ކުރިއަށްގެންދާ މި ޕްރޮމޯޝަން މިއަދުން ފެށިގެން އަންނަ އޯގަސްޓް މަހުގެ 30 ގެ ނިޔަލަށް ކުރިއަށްދާނެ އެވެ. އެހެންކަމުން، އެސްޓީއޯ ޕީޕަލްސް ޗޮއިސްގެ އިތުރުން އެސްޓީއޯގެ ރީޖަނަލް ފިހާރަތަކުން ވެސް ޕްރޮމޯޝަން އަގުތަކުގައި މުދާ ގަނެވޭނެ އެވެ.
"ހަމަ ހިޓާޗީ" ޕްރޮމޯޝަންގެ ދަށުން އެސްޓީއޯގެ ފިހާރަތަކުން ވިއްކަމުން އަންނަ، ހިޓާޗީ ބްރޭންޑްގެ އައިސްއަލަމާރި، ދޮންނަ މެޝިން، އެއާ ޕިޔުރިފަޔާ، ޓީވީ، ޕަންޕު، ވެކިއުމް ކްލީނާ، ރައިސް ކުކާގެ އިތުރުން އަވަން އަދި އެއާކޮންޑިޝަން ހިމެނޭހެން ގިނަ އުފެއްދުންތަކަކަށް 30 އިންސައްތައާ ހަމަ އަށް ޑިސްކައުންޓް ލިބިގެންދާނެ އެވެ.
މި ޕްރޮމޯޝަންގެ ދަށުން އެސްޓީއޯގެ ފިހާރަތަކުން ކުރާ ކޮންމެ 1،000ރ. ގެ ވިޔަފާރިއަކަށް ކޫޕަނެއް ލިބޭނެ އެވެ. އަދި މި ކަސްޓަމަރުންގެ ތެރެއިން ކޮންމެ ހަފްތާއަކު ނަސީބުވެރިއެއް ހޮވައި، އަގުހުރި އިނާމުތައް ލިބޭނެ އެވެ.
މީގެއިތުރުން، މުޅި ޕްރޮމޯޝަން ނިމުމުން އޮންނަ ގްރޭންޑް ލަކީޑްރޯގައި ހުރިހާ ކަސްޓަމަރުންގެ މެދުގައި ގުރުއަތުނަގައިގެން ނަސީބުވެރި ތިން ފަރާތެއް ހޮވައި، ކޮންމެ ފަރާތަކަށް 50،000ރ. ގެ އެސްޓީއޯ ޕީޕަލްސް ޗޮއިސް އިން ވިޔަފާރިކުރެވޭނެ ގިފްޓް ވައުޗާއެއް ލިބޭނެ އެވެ.
އެސްޓީއޯ އިން ވިއްކާ އުފެއްދުންތަކުގެ ތެރެއިން، މިއަދާ ހަމަ އަށް އައިއިރު އެންމެ ބޮޑު ޑިމާންޑެއް އޮތީ "ހިޓާޗީ" ގެ އުފެއްދުންތަކަށެވެ.