އިންސާނާ އަދާކުރާ ވަޒީފާތަކުގައި އެ ވަޒީފާއަކާއި އެ މަގާމެއްގެ މަސްއޫލިއްޔަތަށް ބަލާ، އެ ވަޒީފާތަކަށް މުސާރަ ކަނޑައެޅިފައި ވެއެވެ. އަދި ބައެއް ހާލަތްތަކުގައި ބައެއް ވަޒީފާތަކުގައި ދެވޭ ހިދުމަތަށް ބަލާ ހިދުމަތުގެ އުޖޫރަ ނުވަތަ ސާވިސް އެލަވަންސް ނަމުގައި އެލަވަންސެއް ދެއެވެ. މިދޭ ސާވިސް އެލަވަންސަކީ ހަގީގަތުގައި ކޮން އެލަވަންސެއްތޯ އަހަރެމެން ވިސްނާލަން އެބަ ޖެހެއެވެ. މިއީ ހިތުމަތުގެ އުޖޫރައެވެ. މިއީ ދެވޭ ހިދުމަތަށް، ނުވަތަ ހިދުމަތަށް ނުކުންނަ ކޮންމެ ދުވަހަކަށް، ދެވޭ ހިދުމަތުގެ އުޖޫރައެކެވެ. އާންމުގޮތެއްގައި މި އުޖޫރަ ނުވަތަ މި އެލަވަންސް ދެނީ، މަސައްކަތަށް ނުކުމެ އެ ހިދުމަތެއް ދިނީމައެވެ. ނުވަތަ މަސައްކަތަށް ނުކުންނަ ކޮންމެ ދުވަހަކަށެވެ.

ދެވޭ މި ހިދުމަތުގެ އުޖޫރަ ނުވަތަ ސާވިސް އެލަވަންސާއި ބެހޭގޮތުން ބައެއް މީހުންނަށް ބުނަން ނުވާ އިބާރާތެއް އެބަ ބޭނުން ކުރެވެއެވެ. ދެކެން ނުވާ ނަޒަރަކުން އެބަ ދެކެވެއެވެ. ގަބޫލުކުރަންޖެހޭ ހަގީގަތަކީ ސާވިސް އެލަވަންސަކީ މަސައްކަތް ކުރާ މީހާގެ އަސްލު އުޖޫރައެއް ނޫންކަމެވެ. ނުވަތަ މުސާރައެއް ނޫންކަމެވެ. ނަމަވެސް އެއީ މުސާރައެއް ކަމުގައި ދެކެވި، އުޅޭނަމަ އިސްވެ ބުނެވުނު ފަދައިން ބުނަން ނުވާ އިބާރާތްތައް ބުނެވޭތަން އެބަ ފެނެއެވެ.

ސަލާމުގައި ނުވަތަ އާއިލީ ޒިންމާގައި ހުންނަ ދުވަސްތަކު މުސާރަ ކަނޑާ ވާހަކަ އާއި މުސާރައިން އުނިކުރާ ވާހަކަ އަކީ ބައެއް މީހުންނަށް ދެކެވޭ ވާހަކައެކެވެ. މިހެން ބުނެވޭ މީހުން މިހެން ބުނެ، މުސާރަ ދޭ ފަރާތާއި މެދު ނުރުހުންތެރިކަމުގެ ނަޒަރަކުން ހީކުރެވޭ ފަހަރުތައްވެސް އާދެއެވެ. އަދި ބައެއްފަހަރަށް މުޖުތަމައުގެ އެފަދަ އޮފީސްތަކާއި މުއައްސަސާތަކާއި ކުންފުނިތަކާއި ދޭތެރޭ ދެކެވޭ ގޮތްވެސް ނައްސިވެ، ގޯސްވެދެއެވެ. މިއީ ހިތާމަ ހުރި ކަމެކެވެ. މިފަދައިން ބުނެވޭ މީހުންނަށް މި ބުނެވެނީ ހަގީގަތުގައި އެއްކަލަ ހިދުމަތުގެ އުޖޫރަ ނުލިބޭ ވާހަކައެވެ. ސާވިސް އެލަވަންސް ނުލިބޭ ވާހަކައެކެވެ. ހަގީގަތަކީ އެއީ ވަޒީފާ އަށް ނުކުންނަ ކޮންމެ ދުވަހަކަށް ދެވޭ އެލަވަންސެއް ކަމުން، ނުނިކުންނަ ނަމަ އެ އެލަވަންސެއް ނުލިބޭނެއެވެ. ކަން ވަނީ މިހެންނެވެ. އެއީ ވަޒީފާއަށް ނިކުތުމުން ލިބޭ، ނުނިކުތުމުން ނުލިބޭ އެއްޗެކެވެ. އެއީ އެއްވެސް ހާލެއްގައި އެމީހެއްގެ މުސާރައިން ކަނޑާ ނުވަތަ އުނިކުރާ އެއްޗެއް ނޫނެވެ.

ކަންއޮތީ މިހެންކަމުން ސަލާމުގައި ނުވަތަ އާއިލީ ޒިންމާގައި ހުންނަ ދުވަސްދުވަހު، މުސާރަ ކަނޑާ ވާހަކައަކާއި މުސާރައިން އުނިކުރާ ވާހަކަ އެއްވެސް މުވައްޒަފަކަށް ނުބުނެވޭނެއެވެ. އެ ބުނެވޭ ބުނުމުގައި އެ ބޭނުން ކުރެވޭ އިބާރާތް ވަރަށްވެސް ގޯހެވެ. މިފަދަ ބަސްތަކާއި މިފަތަ އިބާރާތްތަށް ގޯސްކޮށް ބޭނުން ކުރުމުން މަސައްކަތު މާހައުލުގައި އޮންނަ ހަމަޖެހުން ނެތި ހިނގައިދާނެއެވެ. އަދި މުޖުތަމައުގައި ފަސާދަ އާއި ފިތުނައާއި، ނަފްރަތާއި ރުޅިވެރިކަންވެސް އާންމު ވެދާނެއެވެ. އެހެންކަމުން މިއީ ބުނުމުގެ ކުރިން ވިސްނާލަން ޖެހޭ ބުނުމެކެވެ. އާންމުގެ ތެރޭގައި ދެކެވޭއިރު އޭގެ ނަތީޖާއާއި މެދު ފުންކޮށް ވިސްނަން ޖެހޭ އިބާރާތްތަކެކެވެ.