ސެޓްލިންކް ޕްރައިވެޓް ލިމިޓެޑުން، ލައިސެންސް ނެތި އަދި ޗެނަލް ރައިޓްސް ނެތި އދ. މަހިބަދޫގައި ގާނޫނާއި ގަވާއިދާ ހިލާފަށް ރީބްރޯޑްކާސްޓްކުރުމުން، ބްރޯޑްކާސްޓިން ކޮމިޝަން (ބްރޯޑްކޮމް) އިން އެ ކުންފުނީ ބޮޑު އަދަދަކުން ޖޫރިމަނާކޮށްފިއެވެ.
ބްރޯޑްކޮމް އަށް ހުށަހަޅާފައިވާ މައްސަލައަކާ ގުޅިގެން ސެޓްލިންކް ޕްރައިވެޓް ލިމިޓެޑުން ވަނީ 125،500ރ. (އެއް ލައްކަ ފަންސަވީސް ހާސް ފައްސަތޭކަ ރުފިޔާ) އިން ޖޫރިމަނާކޮށްފައެވެ.
އެގޮތުން، މިދިޔަ ސެޕްޓެންބަރު ސެޓްލިންކް ޕްރައިވެޓް ލިމިޓެޑާ ދެކޮޅަށް ހުށަހެޅި ޝަކުވާއާ ގުޅިގެން ބްރޯޑްކޮމް އިން މި މައްސަލައިގެ ޝަކުވާ ނިންމިގޮތުގެ ބަޔާނުގައިވަނީ، އެ ކުންފުންޏަކީ އދ. މަހިބަދޫގައި ހިދުމަތްދިނުމަށް "ރީބްރޯޑްކާސްޓް ކުރުމުގެ ލައިސެންސް" ބްރޯޑްކޮމް އިން ދޫކޮށްފައިވާ ފަރާތެއް ނޫން ކަމާއި، މި މައްސަލައިގެ ތަހުގީގަށް އދ. މަހިބަދޫ ކައުންސިލުން ޖަވާބުދާރީވެ ފޮނުވާފައިވާ ސިޓީގައި ވާގޮތުން ސެޓްލިންކްގެ މައްޗަށް ކުރާ ޝަކުވާގައި ބަޔާންކޮށްފައިވާ ހިދުމަތެއް އެ ކުންފުނިން ދޭ ކަމަށާއި، ފުރަތަމަ އިސްތިހާރުކުރިއިރު 40 ޗެނަލް ދޫކުރިކަމަށާއި، މިހާރު ރާއްޖޭގެ އިންޓަނެޓް މެދުވެރިކޮށް ހުރިހާ ޗެނަލެއް -/150ރ. (ސަތޭކަ ފަންސާސް ރުފިޔާ) އަށް އެމް ސްޓިކް ބޭނުންކޮށްގެން ފޯރުކޮށްދޭ ކަމަށެވެ.
އެހެންކަމުން، ސެޓްލިންކް ޕްރައިވެޓް ލިމިޓެޑްގެ ފަރާތުން އދ. މަހިބަދޫގައި ރީބްރޯޑްކާސްޓްކުރުމުގެ ހިދުމަތްދޭ ކަމަށް ތަހްގީގަށް ސާބިތުވެފައިވާ ކަމަށް ބްރޯޑްކޮމް އިން ވަނީ ނިންމާފައެވެ.
މިއީ ސެޓްލިންކް ޕްރައިވެޓް ލިމިޓެޑްގެ ފަރާތުން ރީބްރޯޑްކާސްޓްކުރުމުގެ ލައިސެންސްނެތި ހިދުމަތްދިން ފުރަތަމަ ފަހަރު ކަމަށް ވުމުން މި މައްސަލަ ބަލަންފެށި ދުވަހުން (22 ސެޕްޓެންބަރު 2021) އިން ފެށިގެން ހިދުމަތްދީފައިވާ ކޮންމެ ދުވަހަކަށް -/500ރ. (ފައްސަތޭކަ ރުފިޔާ)ގެ މަގުން ފާއިތުވި 251 ދުވަހަށް ވާ، އެކު ޖުމްލަ -/125،500ރ. (އެއް ލައްކަ ފަންސަވީސް ހާސް ފައްސަތޭކަ ރުފިޔާ) އިން ވަނީ ޖޫރިމަނާކޮށްފައެވެ.
އަދި ސެޓްލިންކް ޕްރައިވެޓް ލިމިޓެޑާ ދެކޮޅަށް ހުށަހެޅި ޝަކުވާއާ ގުޅިގެން މައްސަލަ ނިންމިގޮތުގައި ބަޔާނުގައި ވަނީ، ޖޫރިމަނާގެ ގޮތުގައި އެ ކުންފުނީގެ މައްޗަށް ދައްކަން އަމުރުކޮށްފައިވާ ފައިސާ 30 ދުވަހުގެ ތެރޭގައި ދައްކާ ހަލާސްކުރުމަށެވެ.
މީގެއިތުރުން، ސެޓްލިންކް ޕްރައިވެޓް ލިމިޓެޑުން އދ. މަހިބަދޫގައި ދެމުން އަންނަ އިންޓަނެޓް ހިދުމަތާއެކު ޗެނަލްތައް ހިމެނޭގޮތުން އެޕް ބޭނުންކޮށްގެން ދޭ ރީބްރޯޑްކާސްޓްކުރުމުގެ ހިދުމަތް ވަގުތުން ހުއްޓާލުމަށާއި، ބްރޯޑްކާސްޓްކުރުމުގެ ގާނޫނާއި ކަމާގުޅޭ ގަވާއިދުތަކާއި އުސޫލުތަކުގައި ބަޔާންކޮށްފައިވާގޮތުގެ މަތީން ރީބްރޯޑްކާސްޓްކުރުމުގެ ލައިސެންސް ލިބިގެން ނޫނީ އެ ހިދުމަތްދެމުން ކުރިއަށްނުގެންދިއުމަށް ސެޓްލިންކް ޕްރައިވެޓް ލިމިޓެޑްގެ މައްޗަށް އެންގުމަށް އެ މައްސަލަ ބެލި ކޮމިޝަނުގެ ޖަލްސާގައި ބައިވެރިވި މެންބަރުންގެ އިއްތިފާގުން ނިންމާފައިވާ ކަމަށް ވެސް އެ ބަޔާނުގައިވެއެވެ.