ދުނިޔޭގެ ބާޒާރުގައި ސާފުކުރި ތެލުގެ އަގު އަދިވެސް އުފުލެމުން ދިއުމާއެކު، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ވިއްކާ ތެލުގެ އަގު ބޮޑުކުރަން ޖެހިއްޖެ ކަމަށް އެ ކުންފުނިން ބުނެފިއެވެ.
ރާއްޖެ އަށް އެންމެ ގިނައިން ތެޔޮ އެތެރެކޮށް ވިއްކާ އެސްޓީއޯ އިން އާންމުކުރި ބަޔާނެއްގައި ވަނީ، އެ ކުންފުނީގެ ސަބްސިޑިއަރީ ކުންފުނި ފިއުލް ސަޕްލައި މޯލްޑިވްސް (އެފްއެސްއެމް) ގެ ޝެޑްތަކުން މިއަދުން ފެށިގެން ޕެޓްރޯލް ލީޓަރެއް ވިއްކަނީ 16.55ރ. އަށް ކަމަށާއި، އަދި ޑީސަލް ލީޓަރެއް 16.77ރ. އަށް ކަމަށެވެ.
މިއީ ކުރީން ވިއްކަމުން އައި އަގަށްވުރެ ލީޓަރަކުން 2ރ. ގެ އިތުރުވުމެކެވެ.
މިހާރު ރަޝިއާ އާއި ޔޫކްރޭންގެ މެދުގައި ކުރިއަށްދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލެން ފެށުމާއެކު، އެންމެ ފަހުން އެސްޓީއޯ އިން ތެލުގެ އަގު ބޮޑުކުރީ މިދިޔަ މާރިޗް މަހުގެ 5 ގައެވެ. އޭރު ވިއްކަމުންދިޔައީ ޕެޓްރޯލް ލީޓަރެއް 14.60ރ. އަދި ޑީސަލް ލީޓަރެއް 14.80ރ. އަށެވެ.
އެސްޓީއޯ އިން އަބަދުވެސް މަސައްކަތް ކުރަމުންދަނީ އެ ކުންފުނިން ފޯރުކޮށްދޭ އެންމެހާ ހިދުމަތްތައް ހުއްޓުމެއްނެތި، ދެމެހެއްޓެނިވި ގޮތެއްގައި ރައްޔިތުންނަށް ފޯރުކޮށްދެމުން ގެންދިއުމަށް ކަމަށް އެ ކުންފުނިން ބުނެއެވެ.