މާލެ އަތޮޅުގެ ހަ ފަޅެއްގައި ފްލޯޓިން ސިޓީތަކެއް ހަދަން ޑަޗް ޑޮކްލޭންޑްސްއާ ހަވާލުކޮށްފައިވާ މަޝްރޫއު އިންޓެގްރޭޓެޑް ޓޫރިޒަމް ޕްރޮޖެކްޓެއްގެ ގޮތުގައި ތަރައްގީކުރުމަށް އެ ކުންފުންޏާއެކު އެއްބަސްވުމެއްގައި ސަރުކާރުން ސޮއިކޮށްފިއެވެ.
ޓޫރިޒަމް މިނިސްޓްރީގައި ބޭއްވި ރަސްމިއްޔާތެއްގައި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ޓޫރިޒަމް މިނިސްޓްރީގެ ޕާމަނަންޓް ސެކްރެޓަރީ ފާތިމަތު ނިލްފާ އެވެ.
މިއީ ގާނޫނަށް އިސްލާހު ގެނައުމަށްފަހު، ކުރިން ޓޫރިޒަމަށް ދޫކޮށްފައިވާ އޮތް ތަނެއް އިންޓެގްރޭޓެޑް ޕްރޮޖެކްޓަކަށް ބަދަލުކުރި ފުރަތަމަ މަޝްރޫއު އެވެ.
އެއްބަސްވުމުގައި ސޮއި ކުރެއްވުމަށް ފަހު ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ، ކުރިން ފްލޯޓިން އައިލެންޑްތަކުގެ ކައިރީގައި ދެ ރިސޯޓު ހަދަން ޕްލޭން ކުރި ނަމަވެސް ދެން އެކަން ކުރާނީ އިންޓެގްރޭޓެޑް ޓޫރިޒަމް ކޮންސެޕްޓްގެ ދަށުން ކަމަށެވެ.
މައުސޫމް އިތުރަށް ވިދާޅުވީ، އެގްރިމެންޓަށް ބަދަލު ގެނެސްފައި ވަނީ ޓޫރިޒަމް ދާއިރާ ޑައިވާސިފައި ކުރަން ކަމަށެވެ. މި ޕްރޮޖެކްޓަށް ގެނައި ހަމައެކަނި ބަދަލަކީ ޑިވެލޮޕްކުރާ ކޮންސެޕްޓް އެކަނި ކަމަށް އޭނާ ވިދާޅުވި އެވެ. އަދި އެގްރީމެންޓްގެ ދަށުން ހަދާ އިންޓަގްރޭޓެޑް އައިލެންޑުގައި މަދުވެގެން ދެ ޕްރޮޕަޓީ ހަދަން ޖެހޭނެ ކަމަށް ވެސް އޭނާ ވިދާޅުވި އެވެ.
މި މަޝްރޫއު އިންޓެގްރޭޓެޑް ޓޫރިޒަމް ޕްރޮޖެކްޓަކަށް ބަދަލުކުރުމުގެ ޓްރާންސްފާ ފީއެއްގެ ގޮތުގައި ދައުލަތަށް އެއް މިލިއަން ރުފިޔާ އެ ކުންފުނިން ދައްކާފައިވާ ކަމަށް މިނިސްޓަރު ވިދާޅުވި އެވެ.
ފުރަތަމަ ތަރައްގީކުރަނީ އާރަށާ އެންމެ ކައިރިން އޮންނަ 200 ހެކްޓަރުގެ ފަޅެވެ. އެ ފަޅުގައި ތަރައްގީކުރާ 5000 ހައުސިން ޔުނިޓުގެ މަސައްކަތް ނިމުނު ފެބްރުއަރީ މަހުގެ 10 ގައި ވަނީ ބައިސަން މޯލްޑިވްސްއާ ހަވާލުކޮށްފަ އެވެ.
ޑަޗް ޑޮކްލޭންޑްގެ ސީއީއޯ ޕޯލް ވެން ޑީ ކޭޕް ވިދާޅުވީ، އެ ކުންފުނިން މީގެ ކުރިން ވެސް އެތައް ހާސް ފްލޯޓިން ގެތައް އަޅައި މިފަދަ ގިނަ ޕްރޮޖެކްޓްތަކެއް ނެދަލޭންޑްސްގައި ހިންގާފައިވާ ކަމަށެވެ. އެކުންފުނިން މިފަދަ ޕްރޮޖެކްޓްތައް ހިންގުމުގައި، އޮންނަ ތާރީހުތަކަށް މަސައްކަތް ނިންމަން ވަރަށް ހާއްސަ އިސްކަމެއް ދޭ ކަމަށް ވިދާޅުވި އެވެ. އަދި ރާއްޖޭގައި ވެސް މި ޕްރޮޖެކްޓް ކާމިޔާބު ކަމާ އެކު ހިންގާނެ ކަމަށް އޭނާ ވިދާޅުވި އެވެ.
މި ފްލޯޓިން ސިޓީގައި 5،000 ގެ ހެދުމަށް ހަމަޖެހިފައިވެއެވެ. މި ޕްރޮޖެކްޓްގެ ދަށުން އެންމެ ފުރަތަމަ ކަނޑައެޅީ ގެއެއް 250،000 ޑޮލަރު (3.8 މިލިއަން ރުފިޔާ) އަށް ވިއްކާށެވެ. އެހެން ނަމަވެސް ރާއްޖޭގައި ގެދޮރުގެ މައްސަލަ އޮތް މިންވަރު އެނގި އާންމުންނަށް ގަނެވޭނެ ފަދަ އަގަކަށް ބަދަލު ގެންނަން މަސައްކަތްތައް ކުރަމުން އަންނަ ކަމަށް ޕޯލް ވިދާޅުވި އެވެ.