ދުވާލެއްގެ މައްޗަށް ކްރިޕްޓޯކަރަންސީގެ ވިޔަފާރީގެ ވޮލިއުމް އަށް ބަލާއިރު ދުނިޔޭގެ އެންމެ ބޮޑު އެކްސްޗޭންޖް ކަމަށްވާ ބައިނޭންސް އިން ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އާއެކު ނޮން ފަންޖިބަލް ޓޯކެން (އެންއެފްޓީ) ޕްރޮމޯޓްކުރުމަށް ޕާޓްނާޝިޕް އެގްރިމެންޓެއްގައި ސޮއިކޮށްފިއެވެ.
އެންއެފްޓީ މާކެޓުގައި ވިއްކަން ހުންނަ ތަކެއްޗަކީ ލިމިޓެޑް ނުވަތަ އެ ވައްތަރުގެ އެހެން އެއްވެސް އެއްޗެއް މާކެޓުން ނުލިބޭނެ އެއްޗެއްސެވެ.
ގިނަ އަހަރުތަކަކަށް ވެވުނު މި އެއްބަސްވުމުގެ ދަށުން ބައިނޭންސްގެ ޕްލެޓްފޯމްގައި ރޮނާލްޑޯ އާއެކު އެންއެފްޓީގެ ކަލެކްޝަނެއް އުފެއްދުމަށް ހަމަޖެހިފައިވެއެވެ.
އެގޮތުން، ރޮނާލްޑޯ އާއެކު ބައިނޭންސް އިން ނެރޭ ޑިޒައިން ކަލެކްޝަންގެ ތެރެއިން ފުރަތަމަ އުފެއްދުންތައް މި އަހަރު ފަހުކޮޅު ފެނިގެންދާނެ އެވެ.
އެންއެފްޓީއަކީ މީހެއްގެ މިލްކުރެވިކަމުގައި އޮންނަ އެސެޓެއް ސައްހަކަމަށް ދަލީލުކޮށްދޭ ޑިޖިޓަލް ޓޯކަންއެކެވެ. އެންއެފްޓީއަކުން ރަމްޒުކޮށްދެނީ އެ އެސެޓެއްގެ ސައްހަކަމެވެ. އެއީ މިސާލަކަށް އާންމުކޮށް މީހަކު އަގުހުރި އެއްޗެއް ގަތުމުން ލިބޭ ސެޓިފިކެޓް އޮފް އޯތެންޓިސިޓީ ފަދަ ޑިޖިޓަލް ޓޯކަންއެކެވެ. އާންމުކޮށް އެންއެފްޓީ ރަމްޒުކުރަނީ ޑިޖިޓަލް މުދަލެވެ. އެންއެފްޓީއާ ބެހޭ ހުރިހާ މައުލޫމާތެއް ރައްކާކުރެވިފައިވަނީ ބްލޮކްޗެއިނެއްގައެވެ.
ފަހަކަށްއައިސް ކްރިޕްޓޯކަރަންސީ ކުންފުނިތަކުން އަންނަނީ ސްޕޯޓްސް ޕާޓްނާޝިޕްގެ އެހީތެރިކަމާއެކު މާކެޓްގައި ގިނަ ކުރިއެރުންތައް ހޯދަމުންނެވެ.
އޭގެތެރޭގައި، ޕީއެސްޖީގެ ރަސްމީ ކްރިޕްޓޯ ކަރަންސީ ޕްލެޓްފޯމް ޕްރޮވައިޑާގެ ގޮތުގައި ކްރިޕްޓޯ.ކޮމް ކަނޑައަޅައި، އެ ކުންފުންޏާއެކު ވެފައިވާ ތިން އަހަރު ދުވަހުގެ އެއްބަސްވުމުގެ ދަށުން އަހަރަކު 30-35 މިލިއަން އެމެރިކާ ޑޮލަރާ ދެމެދުގެ އާމްދަނީއެއް ޕީއެސްޖީ އަށް ލިބޭނެ އެވެ.
އެމެރިކާގެ އެންބީއޭގެ އެންމެ ހައިބަތުހުރި އެއް ސްޓޭޑިއަމް ކަމަށްވާ ލޮސް އެންޖެލަސްގައި ހުންނަ ސްޓޭޕަލްސް ސެންޓަރ ގެ ނަން "ކްރިޕްޓޯ.ކޮމް އެރީނާ" އަށް ބަދަލުކުރުމަށްޓަކައި ކްރިޕްޓޯ.ކޮމް ވަނީ 700 މިލިއަން އެމެރިކާ ޑޮލަރުގެ އެއްބަސްވުމެއްގައި ސޮއިކޮށްފައެވެ.
މީގެއިތުރުން، ކްރިޕްޓޯ އެކްސްޗޭންޖް އެފްޓީއެކްސް ޓްރޭޑިންގ އެލްޓީޑީ އިން ވަނީ އެ ކުންފުނީގެ ހިއްސާތަކެއް އެންއެފްއެލްގެ ކުއާޓާބެކް ޓޮމް ބްރެޑީ އަށް ވިއްކާލައިފައެވެ.