ދިވެހިންގެ މެދުގައި މަގްބޫލްކަން އިތުރުވަމުން އަންނަ "މަކިޓާ" ބްރޭންޑްގެ އުފެއްދުންތަކަށް ހާއްސަ ޝޯރޫމެއް އެސްޓީއޯ އިން ހުޅުވައިފިއެވެ.
ބޮޑުތަކުރުފާނު މަގުގައި ސީ ޓްރެކްސް ހުންނަ އިމާރާތުގެ ގްރައުންޑް ފްލޯގައި ހުންނަ މި ޝޯރޫމް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ އެސްޓީއޯގެ ސީއީއޯ އަދި އެމްޑީ ހުސެއިން އަމްރު އާއި އެ ކުންފުނީގެ "މަކިޓާ" ސަޕްލަޔަރު ކަމަށްވާ، މަކިޓާ ސިންގަޕޯގެ އެސިސްޓެންޓް ޖެނެރަލް މެނޭޖަރު އިކެޑާ ސާން އެވެ. މީގެއިތުރުން މަކިޓާ ސިންގަޕޯގެ ރީޖަނަލް ސޭލްސް މެނޭޖަރު ޕްރަމޯދް ޗަންދްރަން ވެސް މި ރަސްމިއްޔާތުގައި ބައިވެރިވެ ވަޑައިގެންނެވިއެވެ.
"މަކިޓާ" ގެ ޕްރޮޑަކްޓްތަކަށް ހާއްސަ ޝޯރޫމެއް ހުޅުވާފައިމިވަނީ އެސްޓީއޯ އިން މި ބްރޭންޑްގެ އުފެއްދުންތައް ރާއްޖޭގައި ވިއްކަމުންދާތާ 25 އަހަރު ފުރުމާ ވެސް ގުޅުވާފައެވެ.
އެސްޓީއޯ އިން ބުނީ، "މަކިޓާ" އިން ރާއްޖެ އެތެރެކޮށް ވިއްކާ ޕްރޮޑަކްޓްތަކަކީ އިންޑަސްޓްރިއަލް، އައުޓްޑޯ އަދި ގޭތެރޭގައި ވެސް އެކި މަސައްކަތްތަކުގައި ބޭނުންކުރުމަށް އެކަށީގެންވާ އުފެއްދުންތަކެއް ކަމަށެވެ.
އާ "މަކިޓާ" ޝޯރޫމް އާއެކު ކަސްޓަމަރުންނަށް ގިނަ ލުއި ފަސޭހަތަކެއްލިބި، ފުރިހަމަ ހިދުމަތްތަކެއް ލިބިގެންދާނެ ކަމަށް އެސްޓީއޯ އިން ބުނެއެވެ.
އަދި ޝޯރޫމް އިން "މަކިޓާ" ޕްރޮޑަކްޓްތަކުގެ ސްޕެއާޕާޓްސް ލިބުމުގެ އިިިތުރުން އެ ބްރޭންޑްގެ އުފެއްދުންތަކަށް ހާއްސަ ސާވިސް ސެންޓަރު ވެސް ހުންނާނީ މި ޝޯރޫމްގެ ތެރޭގައެވެ.
މާލޭގެ އިތުރުން ރާއްޖޭގެ އެކި ހިސާބުތަކުގައި ހުރި އެސްޓީއޯ ރީޖަނަލް ފިހާރަތަކުން "މަކިޓާ" ބްރޭންޑްގެ އުފެއްދުންތައް ލިބެން ހުންނާނެ ކަމަށާއި، އެސްޓީއޯ ޕީޕަލްސް ޗޮއިސް އޭޖެންޓުން ވެސް އާއްމުންނަށް "މަކިޓާ" ޕްރޮޑަކްޓްސް ފޯރުކޮށްދޭނެ ކަމަށް އެ ކުންފުނިން ބުންޏެވެ.