މީސްމީޑިޔާ އަކީ މިއަދު ވަރަށްވެސް ބާރުގަދަ ތަނެކެވެ. އަހަރެމެން ގަބޫލުކުރާގޮތުގައި އެތަނުގެ ބާރު ލިބިއްޖެ މީހާ ގަދަވެއްޖެއެވެ. އެފަދައިން ގަދަވެ އަނެކުން ނިކަމެތިކޮށް ހަދާތަންވެސް އެބަ ފެނެއެވެ. ތަފާތު އެކި އެކި ކޮމެންޓް ކޮށް ހަދާތަންވެސް އެބަ ފެނެއެވެ. މަދެއް ނޫނެވެ. މިއީ ވިސްނާލަން ޖެހޭ ކަމެކެވެ. ހަމަ އެކަނި ކޮމެންޓް ކުރާ މީހާއެއް ނޫނެވެ. އޭނާގެ މައިން ބަފައިންނާއި އަނބިންނާއި ދަރިންނާއި ނުވަތަ ލޯބީގެ ގޮތުން ގުޅިގެން އުޅޭ މީހާއެވެ.

އާދޭހެވެ! މީސް މީޑިޔާގައި ތިމާ ދޫކޮށްލާ ކޮމެންޓް އަމާޒުވެ ހެރޭނޭ ކޮންމެވެސް ފަރާތެއް ހުންނާނެއެވެ. ބައެއް ހާލަތްތަކުގައި ވަކި އަމާޒެއް ނެތި ޖުމުލަކޮށްވެސް ކޮމެންޓް ކުރެވޭތަން އެބަ އާދެއެވެ. ކޮންމެއަކަސް ކޮންމެ ހާލެއްގައި ނަމަވެސް ތިމާ ކުރާ ކޮމެންޓް ތިމާގެ ފަހަތުގައި ހުންނާނެއެވެ. ކޮންމެވެސް ސިފައެއްގައެވެ. މިފަދައިން ކޮމެންޓް ކޮށް ހަދާ މީހުންގެ ތެރޭގައި ބަފައިން ނުވަތަ ބައްޕައިންވެސް އުޅޭ ކަމީ ހިތާމަ ހުރި ކަމެކެވެ. ހަބަރުތަކާއި އަދި އެނޫންވެސް އެފަދަ ޕޯސްޓްތަކަށް ތަފާތު އެކި އެކި ކޮމެންޓްކޮށް ހަދާފައި ހުރެއެވެ. ހުތުރު ބަސްބަސްވެސް ބޭނުންކޮށްފައި ހުންނަނީ މަދެއްކޮށެއް ނޫނެވެ. އާދޭހެވެ! އޭނާ ގަދައެވެ. މީސް މީޑިޔާގައި އެއީ މަގުބޫލު އަދި މަޝްހޫރު އައިޑީއެކެވެ. ގިނަ މީހުން ފޮލޯކޮށްވެސް ހަދައެވެ. ލައިކާއި ރިއެކްޓް އެހާމެ ގިނައެވެ. ކަން އޮތީ މިހެން ކަމުގައި ވީނަމަވެސް އޭނާ އެ ލިޔެ ދޫކޮށްލާ ކޮމެންޓް އޭނާގެ ފަހަތުގައި ހުންނާނޭކަން އޭނާ ނުދަނެއެވެ.

މީސްމީޑިޔާގައި މިފަދައިން ލިޔެ ދޫކޮށްލާ ކޮމެންޓް ތަކުން ހަގީގަތުގައި އެމީހެއްގެ އުޅުމާއި ގުޅުން ކޮންމެވެސް ވަރަށް ރޯފިލާނެއެވެ. ލަދާއި ހަޔާތާ ހުރީ ކިހާ މިންވަރަކަށްކަން ވަޒަން ކުރެވޭނެއެވެ. ވިސްނާލަ ބަލާށެވެ. މީސްމީޑިޔާގައި އެންމެންނަށް ނުވަތަ ގިނަ ބަޔަކަށް ފެންނާނޭ ގޮތަށް އެފަދަ ހަޑިހުތުރު ބަސްބަސް ބޭނުން ކޮށްގެން ކޮމެންޓް ކޮށް ހަދާ ބައްޕަޔަކު، އޭނާގެ ދަރިންނަށް އެމަގުން ދޭނޭ ހެޔޮ ތަރުބިއްޔަތެއް އޮންނާނެ ހެއްޔެވެ؟ ނުވަތަ އެ ދަރިންނާއި އެކު ހޭދަ ކުރާ ވަގުތުތަކުގައި ނުވަތަ އެ ދަރިން ކައިރީގައި ހުންނަ ވަގުތު ތަކުގައި، އެފަދަ ހަޑި ހުތުރު ބަސްބަސް ބޭނުން ނުކޮށް ހުރެވިދާނެ ތޯއެވެ؟ މިއީ ހަގީގަތުގައި ކޮންމެ ބައްޕައަކު ވިސްނަން ޖެހޭނޭ ކަމެކެވެ. އަދި ކޮންމެ މަޔަކުވެސް މެއެވެ. އަދި ލޯބީގެ ގޮތުން ގުޅި އުޅޭ ދެމީހުންވެސް މެއެވެ.

ބައްޕައަކު އެފަދަ ގޮތަކަށް މީސްމީޑިޔާއަަށް ދޫކޮށްލާ އެފަދަ ކޮމެންޓްތަކަކީ މާދަމާ އޭނާގެ ދަރިން ކިޔާފާނޭ ކޮމެންޓް ތަކެކެވެ. އެދަރިން ބޮޑެތިވެ މީސްމީޑިޔާގެ އެކި މަންސަތަކަށް ބޯދީ ބަލާ އިރު، އެ ކޮމެންޓްތައް އެކުދިންނަށް ފެނިދާނެއެވެ. ދެން އެދުވަހަކުން އެފަދަ ކޮމެންޓް ކުރުމަކީ ގޯސް ކަމެއް ކަމަކަށް އެކުދިންނަކަށް ނުވިސްނޭނެއެވެ. އެހެނީ އެކުދިންގެ ބައްޕައިން އެހުރީ އެފަދައިން ކިޔާފައެވެ. ލިޔެފައެވެ. މިއީ ހަގީގަތުގައި އެފަދަ މީހުންގެ ދަރިންނަށް އެމީހުން ނުސީދާކޮށް ފޯރުކޮށްދޭ ވަރަށްވެސް ނުބައި ތަރުބިއްޔަތެކެވެ! އާދޭހެވެ! ފޯރުކޮށްދެވޭ ނުބައި ތަރުބިއްޔަތެކެވެ!