މޯލްޑިވްސް ސްޓޭޓް ޝިޕިންގ (އެމްއެސްއެސް) އިން އަލަށް ގެންނަ އާގުބޯޓު "އެމްއެސްއެސް ގްރެފީން" ގަތުމުގެ އެއްބަސްވުމުގައި ސޮއިކޮށްފިއެވެ.
މިއީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)ގެ ދަށުން ހިންގަމުން އަންނަ އެމްއެސްއެސްގެ ފްލީޓަށް ގެނައި 3 ވަނަ ބޯޓެވެ.
އެސްޓީއޯގެ ހެޑް އޮފީހުގައި ބޭއްވި ރަސްމިއްޔާތެއްގައި މި އެއްބަސްވުމުގައި ސޮއިކުރެއްވީ އެ ކުންފުނީގެ ސިއީއޯ އަދި މެނޭޖިންގ ޑިރެކްޓަރ ހުސައިން އަމްރު އާއި ޖަރުމަނުވިލާތުގެ ކެންޑްލަރ ކުންފުނީގެ މެނޭޖިންގ ޑިރެކްޓަރ ޖޯނަސް ކެލަރ އެވެ.
އެސްޓީއޯ އިން ބުނީ، "އެމްއެސްއެސް ގްރެފީން" އަކީ 680 ކޮންޓެއިނަރު ބަރުކޮށްގެން ދަތުރުކުރުމުގެ ކެޕޭސިޓީ ހުރި ބޯޓެއް ކަމަށާއި، އެ ބޯޓު ދަތުރުކުރާނީ ރާއްޖެ އާއި ސިންގަޕޫރު އަދި މެލޭޝިޔާ އަށެވެ.
އެމްއެސްއެސްގެ ފްލީޓްގައި ދެން ހިމެނޭ ބޯޓުތަކަކީ؛ "އެމްވީ އެމްއެސްއެސް ކްރޯމް" އާއި "އެމްއެސްއެސް ގަލޭނާ" އެވެ. ކްރޯމަކީ 48،000 ޓަނުގެ ބޯޓެކެވެ. ގަލޭނާ އަކީ 450 ކޮންޓެއިނަރު އުފުލޭވަރުގެ ބޯޓެކެވެ.
އެސްޓީއޯގެ ސިއީއޯ އަދި އެމްޑީ އަމްރު ވިދާޅުވީ، އެމްއެމްއެސްއިން ކުޑަ ދުވަސްކޮޅެއްގެ ތެރޭގައި ގިނަ ކާމިޔާބީތަކެއް ހޯދާފައިވާކަމަށެވެ. އެގޮތުން، ރާއްޖޭގައި މިގޮތަށް ބޯޓެއް ގަތުމުގެ މުއާމަލާތް ކުރެވުނު މިއީ ފުރަތަމަ ފަހަރުކަން އަމްރު ފާހަގަކުރެއްވިއެވެ. އަމްރު ވިދާޅުވީ، އެމްއެސްއެސް ލޯގޯ ޖެހި އަމިއްލަ ކޮންޓެއިނަރު ހޯދުމުގެ މަސައްކަތްވެސް މިހާރު ކުރަމުންދާކަމަށެވެ.
"މިއަދު އަޅުގަނޑުމެން މި ސޮއެކުރީ އެމްއެސްއެސްގެ 3 ވަނަ ވެސަލް. މި ވެސަލްއަކީމިއީ ކޮންޓެއިނަރ ވެސަލްއެއް. އަޅުގަނޑު ފުރަތަމަވެސް ފާހަގަކޮށްލަން ބޭނުންވަނީ އެމްއެސްއެސް ޙިދުމަތް ފެށިގެން އައިސް މިވީ ކުޑަ ދުވަސްކޮޅުގެ ތެރޭގައި ރާއްޖެއަށް ގެންނަ ހުރިހައި މައިގަނޑު މުދަލެއް އެމްއެސްއެސް އިން ގެނެވެނީ މި. ދެން މި ބޯޓާއި އެކީގައި މި ގުޅާލެވުނީ ސިންގަޕޫރާއި ހިސާބުން ފެށިގެން މެލޭޝިއާ އިން ރާއްޖެއަށް ޑައިރެކްޓްކޮށް. ކުރިއަށްއޮތް ތަނުގައި އަރަބިކަރައިންވެސް ރާއްޖެއަށް ހަމަ ސީދާ ގުޅިގެންދާނެ." އަމްރު ވިދާޅުވިއެވެ.
އެމްއެސްއެސް އަކީ ރާއްޖެ އަށް މުދާ އެތެރެކުރުމުގައި ވީހާވެސް ހެޔޮ އަގެއްގައި ގެނެވޭނެ މަގުފަހިކުރުމުގެ ގޮތުން 2020 ވަނަ އަހަރުގެ ފެބުރުއަރީ މަހުގައި ސަރުކާރުން އުފައްދާފައިވާ އެސްޓީއޯގެ ސަބްސިޑަރީ ކުންފުންޏެކެވެ.
އެ ކުންފުނިން ވަނީ މިވީ ކުރުމުއްދަތުގެ ތެރޭގައި ޝިޕިން ވިޔަފާރީގެ ތެރެއަށް ވަދެ، ރަނގަޅު އާމްދަނީއެއް ހޯދާފައެވެ.