ގޫގުލްގެ ޖީމެއިލް އަކީ ދުނިޔޭގެ އެންމެ ގިނަ ބަޔަކު ބޭނުންކުރަމުން އަންނަ އީމެއިލް ހިދުމަތެވެ.
މިއާއެކު، ގޫގުލް އިން އަންނަނީ ޖީމެއިލް ބޭނުންކުރުމުގައި ލުއި ފަސޭހަ ގޮތްތަކެއް ތައާރަފްކުރަމުންނެވެ.
އެގޮތުން، މިހާރު އެކްޓިވް އިންޓަނެޓް ކަނެކްޝަނެއް ނެތި، ޖީމެއިލް އޮފްލައިންކޮށް ބޭނުންކުރުމުގެ ގާބިލްކަން ވަނީ އިތުރުކޮށްފައެވެ.
ޖީމެއިލް އޮފްލައިންކޮށް ބޭނުންކުރާނެ ގޮތް:
1. މެކް، ލިނަކްސް، ވިންޑޯސް ޕީސީ ނުވަތަ ކްރޯމްބުކްސް މެދުވެރިކޮށް ގޫގުލް ކްރޯމް އިން ޖީމެއިލް އެކައުންޓް ހުޅުވައި، އެންމެ މަތީ ކަނާތްފަރާތުގައިވާ ސެޓިންގ އައިކަން ބޭނުންކޮށްގެން ސެޓިންތަކަށް އެކްސެސް ވާށެވެ.
2. ޕޮޕް-އަޕް މެނޫގައި، ސެޓިންގްސް މެނޫ ހުޅުވުމަށް "ހުރިހާ ސެޓިންއެއް ބަލާ" ޚިޔާރުކުރާށެވެ.
3. އެއަށްފަހު އެންމެ މަތީ ނެވިގޭޝަން ބާރ އިން "އޮފްލައިން" ޓެބަށް ދާށެވެ.
4. ދެން، ޖީމެއިލް އަށް އޮފްލައިން މޯޑް އޮން ކުރުމަށް "އިނޭބަލް އޮފްލައިން މެއިލް" ބޮކްސް ގައި ޗެކް ކޮށްލާށެވެ. އަދި މި ފީޗަރ އަށް ބޭނުންވާ ސެޓިންތައް އިހްތިޔާރުކުރެވިދާނެ އެވެ.
5. އޮފްލައިން މޯޑް އޮން ކޮށްލުމުން، ޖީމެއިލް އިން އޮފްލައިން އެކްސެސް އަށް ޓަކައި ތިބާގެ އެންމެ ފަހުގެ އީމެއިލްތައް އޮޓޮމެޓިކުން ސިންކްކުރުމަށް، "ސިންކް ސެޓިންސް" ބޮކްސްގައި ޗެކް ކޮށްލުމުން 7 ދުވަހާއި 90 ދުވަހާ ދެމެދުގެ މުއްދަތަކަށް ޑައުންލޯޑްކުރާ ފައިލްތައް ބެހެއްޓޭނެއެވެ.
6. ދެން އެއަށްފަހު، "ސެކިއުރިޓީ" ސެކްޝަނާ ދިމާލުގައިވާ، ބޮކްސް (އޮފްލައިން މޯޑްގައި އެކްސެސްވާ ޑޭޓާތައް ޖީމެއިލް އިން ސައިންއައުޓްވުމުގެ ކުރީން ފޮހެލުމަށް ބޭނުންވާނަމަ) ގައި ޗެކް ކޮށްލާށެވެ.
ނިމުމުން، ތިރީގައިވާ "ސޭވް ޗޭންޖެސް" ބަޓަން އަށް ފިތާލާށެވެ. މީގެއިތުރުން، އަލުން އެކްސެސްވުމަށްފަހު ސެޓިންތައް ބަދަލުކޮށްގެން ވެސް ބޭނުންކުރެވޭނެ އެވެ.
ހަނދާން ބެހެއްޓުމަށް:
އިންޓަނެޓް ކަނެކްޝަނެއް ނެތް ދަނޑިވަޅެއްގައި ވަގުތީގޮތުން ވިޔަސް ޖީމެއިލް އޮފްލައިންކޮށް ބޭނުންކުރެވޭ ގޮތް ވުމަކީ ޒަމާން ކުރިއަރާފައިވާ މި ޖީލުގައި ލިބިފައިވާ ފަސޭހަ އެކެވެ. އެކަމަކު، ގިނަ މީހުން ބޭނުންކުރާ ޕީސީ އެއް ނުވަތަ، އެހެން މީހަކަށް މަސައްކަތެއް ކުރުމަށް ޕީސީ ހަވާލުކުރުމުގެ ކުރީން އޮފްލައިން ޖީމެއިލްގެ ކޭޝް ފޮހެލުމަށް ހަނދާން ބަހައްޓަންވާނެ އެވެ.
މީގެ 18 ވަރަކަށް އަހަރު ކުރީން ގޫގްލް އިން ތަޢާރަފްކުރި ޖީމެއިލް އަކީ ދުނިޔޭގެ އާބާދީގެ ތެރެއިން ގާތްގަނޑަކަށް ފަސްބައިކުޅަ އެއްބައި މީހުން ބޭނުންކުރަމުން އަންނަ އެޕްލިކޭޝަން އެކެވެ.