ރާއްޖޭގެ ރައްޔިތުންނަށާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އަށް ޑިމާންޑާ އެއްވަރަށް ދަތިކަމެއްނެތި ތެޔޮ ފޯރުކޮށްދޭނެ ކަމަށް އެސްޓީއޯ އިން ބުނެފިއެވެ.
އެމްއޭސީއެލް އާއި އެސްޓީއޯ ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަމުން އެސްޓީއޯގެ އެމްޑީ އަދި ސީއީއޯ ހުސައިން އަމްރު ވިދާޅުވީ، ސްރީ ލަންކާ އަށް މިހާރު ދިމާވެފައިވާ ހާލަތުގެ ސަބަބުން، ކްލަމްބޯ އިން އަންނަ ފްލައިޓްތަކަށް ކުރިއަށްވުރެ އިތުރަށް ތެޔޮ ފޯރުކޮށްދޭން ޖެހިފައިވުމާއެކު ޑިމާންޑް އިތުރުވެ، އެއަރޕޯޓުގައި ވެސް ތެޔޮ އެޅުމުގެ ޕްރޮސެސްގައި ލަސްތަކެއް ކުރިމަތިވާކަމަށެވެ.
އަމްރު އިތުރަށް ވިދާޅުވީ، ރަޝިއާ- ޔޫކްރޭން ހަނގުރާމައިގެ ސަބަބުން ފްލައިޓްތައް ޑައިވާޓްކުރަންޖެހިފައިވުމާއެކު އެއަރޕޯޓުގައި ފްލައިޓްތަކުގެ ބާރުބޮޑުވެފައިވާ ކަމަށެވެ.
ތެޔޮ އެޅުމުގެ ޕްރޮސެސްގެ ތެރެއިން ވެސް މެދުއިރުމަތިން ތެޔޮ ގަންނަންދާ ބަނދަރުތަކުގައި ތޮއްޖެހި، ކުރިއަށްވުރެ ގިނަވަގުތު ހޭދަކުރަންޖެހިފައިވުމުން ތެލުގެ ސްޓޮކް އައުމުގައި ލަސްތަކެއް އެބަހުރި ކަމަށް ވެސް އަމްރު ފާހަގަކުރެއްވިއެވެ.
"ފުރަތަމަ ކަމަކަށް މިހާރު އަޅުގަނޑުމެން އެބަ ޖެހޭ ކުރިއާލާ އެއް މަސް ކުރީން ޝިޕްމަންޓް ބޭނުންވާ ކަން އަންގަން. އަދި މިޑްލްއީސްޓްގައި ތެޔޮ ލޯޑު ކުރާ ޕޯޓުތަކުގެ ކޮންޖެޝަން ބޮޑުވެގެން ދިއުމުން ބޯޓެއް އެބަޖެހޭ ތެޔޮ ލޯޑްކުރުމަށް ޓަކައި ކިއޫގައި 12-13 ގަޑިއިރުގައި ޕޯޓުގައި މަޑުކުރަން،" އަމްރު ތަފްސީލާއެކު ވިދާޅުވިއެވެ.
އަދި ތެލުގެ ސްޓޮކް އައުމުގައި ލަސްތަކެއް އުޅެނީ އޯޑަރަށް ވުރެ ގިނައިން ތެޔޮ ބޭނުންވާތީ ކަމަށާއި، މިހާރު އެއް މަސް ކުރީން ތެލަށް އޯޑަރު ދޭން ޖެހޭ ކަމަށް ވެސް އަމްރު ވިދާޅުވިއެވެ.
ނިންމާލަމުން އަމްރު ވިދާޅުވީ، ތެލުގެ ބަފާ ސްޓޮކެއް އަބަދުވެސް ހުންނާނެ ކަމަށާއި، މައްސަލަތައް ކުރިމަތިނުވެ ރާއްޖެ އަށް ބޭނުންވާ ވަރަށް ތެޔޮ ފޯރުކޮށްދޭނެ ކަމަށެވެ.