ރާއްޖެ އަށް އަންނަ ފްލައިޓްތަކަށް ތެޔޮ ނުލިބެގެން، ނުފުރި ނުދާނެ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިންް ބުނެފިއެވެ.
އެސްޓީއޯ އާއި އެމްއޭސީއެލް ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރު އިބްރާހިމް ތޯހާ ވިދާޅުވީ، ސްރީ ލަންކާގެ އެއަރޕޯޓްތަކުން ފްލައިޓްތަކަށް ތެޔޮ ވިއްކުން ހުއްޓާލުމާ ގުޅިގެން ތެލުގެ ޑިމާންޑް ބޮޑުވެފައިވާ ކަމަށެވެ.
އެގޮތުން، ލަންކާ އިން ތެޔޮ ހުސްވުމުގެ ސަބަބުން ސްރީލަންކަން އެއާލައިންސް ހިމެނޭ ގޮތަށް، މާލެ އާއި ކޮލަމްބޯއާ ދެމެދު ދަތުރުކުރަމުން އަންނަ ގިނަ ފްލައިޓްތަކުން ކުރިއަށްވުރެ ގިނައިން ތެޔޮ ގަންނަމުންދާ ކަމަށާއި، ކެޕޭސިޓީ އަށް ވުރެ އިތުރަށް މިހާރު ތެޔޮ ވިއްކަން ޖެހިފައިވާ ކަމަށް ތޯހާ ވިދާޅުވިއެވެ.
ތޯހާ އިތުރަށް ވިދާޅުވީ، ރާއްޖެ އަށް އަންނަ ފްލައިޓްތަކަށް ތެޔޮ ނުލިބި، ނުފުރި ނުދާނެ ކަމަށާއި، ފުރަން ބޭނުންވާ ހުރިހާ ފްލައިޓްތަކަށް ވެސް ޖެޓްފިއުލް ލިބޭނެ ކަމަށެވެ.
އެމްއޭސީއެލްގެ މެނޭޖިންގ ޑިރެކްޓަރު މަހުޖޫބު ޝުޖާއު ވިދާޅުވީ، އެއާލައިންތަކަށް ވިއްކާ ފިއުލްގެ ރޭޓް މިވަގުތަށް ކޮންޓްރޯލް ކުރަންޖެހުނު ނަމަވެސް ކޮންމެ އެއާލައިނަކުން ވެސް ދަތުރުކުރަން ބޭނުންވާ މަންޒިލަށް ދެވޭ ވަރަށް ތެޔޮ ފޯރުކޮށްދެވޭނެ ކަމުގެ ޔަގީންކަން އެބައޮތް ކަމަށެވެ. އޭނާ ވިދާޅުވީ، ތެޔޮ ލިމިޓް ކުރަން ޖެހުނީ، ބައެއް ފަރާތްތަކުން ބޮޑެތި އަދަދުތަކުން ޖެޓްފިއުލް ގަންނާތީ ކަމަށެވެ.
އެމްއޭސީއެލް އަށް ޖެޓްފިއުލް ފޯރުކޮށްދެމުން އަންނަ އެސްޓީއޯގެ އެމްޑީ އަދި ސީއީއޯ ހުސައިން އަމްރު ވިދާޅުވީ، ލަންކާއަށް ދިމާވި ހާލަތުގެ ސަބަބުން ކުއްލިއަކަށް ޖެޓް ފިއުލް ސަޕްލައިގެ ޑިމާންޑް ބޮޑުވިއިރު، ރަޝިއާ- ޔޫކްރޭން ހަނގުރާމައިގެ ސަބަބުން މެދުއިރުމަތިން ތެލުގެ ސްޓޮކް އައުމުގައި މިހާރު ލަސްތަކެއް ހުރި ކަމަށެވެ. އެހެންނަމަވެސް، ތެލުގެ ބަފާ ސްޓޮކެއް އަބަދުވެސް ހުންނާނެ ކަމަށާއި، މައްސަލަތައް ކުރިމަތިނުވެ، ރާއްޖެ އަށް ބޭނުންވާ ވަރަށް ތެޔޮ ފޯރުކޮށްދޭނެ ކަމަށް އަމްރު ވިދާޅުވިއެވެ.