ރާއްޖޭގައި ފުރަތަމަ ފަހަރަށް ރޭޑިއޯގްރަފީގެ ދާއިރާ އިން މަތީ ތައުލީމަށް ކިޔެވުމުގެ ފުރުޞަތު އެސްޓީއޯ އިން ފަހިކޮށްދީފިއެވެ.
އަންނަ ސެޕްޓެންބަރު މަހުގައި ފަށާ މި ކޯހަކީ މޯލްޑިވްސް ކޮލިފިކޭޝަން އޮތޯރިޓީ އިން ގަބޫލުކުރާ ލެވެލް ފަހެއްގެ ޑިޕްލޮމާ ފެންވަރުގެ ކޯހެކެވެ. އަދި މިއީ އެލައިޑް ހެލްތު ކައުންސިލުން ވެސް ގަބޫލުކުރާ ކޯހެކެވެ.
މި ކޯހަކީ އެމެރިކާގެ ޖީއީ ހެލްތުކެއަރއާ ގުޅިގެން އެސްޓީއޯ އިން ހިންގުމަށް ހަމަޖެހިފައިވާ ކޯހެކެވެ.
އެސްޓީއޯ އިން ބުނީ މި ކޯހަށް ވަނުމުގެ ޝަރުތަކީ އޭ ލެވެލް ސައިންސްޓްރީމްގެ ދެ މާއްދާއިން ފާސްވެފައިވުން ކަމަށެވެ. މި ކޯހުގެ މުއްދަތަކީ 2 އަހަރާއި 6 މަސް ދުވަހެވެ. މީގެތެރެއިން، 6 މަސް ދުވަހަކީ އިންޓާންޝިޕަށް އޮންނަ 6 މަސް ދުވަސް ކަމަށް އެސްޓީއޯ އިން ބުންޏެވެ.
މި ކޯހުގައި ބައިވެރިވުމަށްޓަކައި ފޯމް ހުށަހެޅުމުގެ ފުރުޞަތު އަންނަ އޯގަސްޓް މަހުގެ 14 ވަނަ ދުވަހުގެ ނިޔަލަށް ހުޅުވާލެވިފައިވާ ކަމަށް އެސްޓީއޯ އިން ބުނެއެވެ. ެެ
މި ކޯހުގެ ކިޔެވުން ކުރިއަށް ގެންދާނީ އެސްޓީއޯ ޓްރޭޑް ސެންޓަރުގައި 2019 އަހަރު ރަޖިސްޓްރީ ކުރެވުނު އެސްޓީއޯ ޓްރެއިނިންގ އިންސްޓިޓިއުޓް އަދި 2021 ވަނަ އަހަރުގެ ޖޫން މަހު ހުޅުވި އެސްޓީއޯ.ޖީއީ ސްކިލް ލެބްގައި ކަމަށް އެ ކުންފުނިން ބުނެއެވެ.