އަންނަ އޯގަސްޓް މަހުގެ 10 ވަނަ ދުވަހު ބޭއްވުމަށް ހަމަޖެހިފައިވާ ސެމްސަން ގެލެކްސީ އަންޕެކްޑް އިވެންޓްގައި އެ ކުންފުނީގެ ފަހުގެ ފޯލްޑަބަލް ސްމާޓްފޯނުތައް ދައްކާލާނެ އެވެ.
އެހެން އަހަރުތަކޭ އެއްފަދައިން މިފަހަރުގެ އިވެންޓް ވެސް ސެމްސަންގެ ރަސްމީ ވެބްސައިޓް މެދުވެރިކޮށް ލައިވް ސްޓްރީމްކުރެވޭނެ ކަމަށް އެ ކުންފުނިން ބުނެއެވެ.
މިފަހަރުގެ އިވެންޓްގައި ދައްކާލުމަށް ހަމަޖެހިފައިވާ ޕްރޮޑަކްޓްތަކުގެ ތެރޭގައި، ސެމްސަންގެ ފަހުގެ ފޯލްޑަބަލް ސްމާޓްފޯން ގެލެކްސީ ޒެޑް ފްލިޕް 4 ހިމެނޭކަން ޕްރޮމޯ ފޮޓޯތަކުން ވެސް އެނގެއެވެ.
ދާދިފަހުން ވަނީ ސެމްސަންގެ އެންމެ އަވަހަށް ބާޒާރަށް ނެރުމަށް ތައްޔާރުވަމުން އަންނަ ފޯލްޑަބަލް ސްމާޓްފޯންތަކުގެ ތެރޭގައި ހިމެނޭ؛ ސެމްސަން ގެލެކްސީ ޒެޑް ފްލިޕް 4 އާއި ގެލެކްސީ ޒެޑް ފޯލްޑް 4 ގެ ފޮޓޯތަކެއް ލީކްވެފައެވެ. އެ ފޮޓޯތަކުން ފެންނަ ގޮތުގައި ގެލެކްސީ ޒެޑް ފޯލްޑް 4 ގެ ތިން ކުލައެއްގެ ފޯލްޑަބަލް ފޯންގެ އިތުރުން ގެލެކްސީ ޒެޑް ފްލިޕް 4 ގެ ހަތަރު ކުލައެއް (ގްރޭ، ޕާޕަލް، ގޯލްޑް އަދި ލައިޓް ބްލޫ) ފެނިގެންދާނެ އެވެ.
މީގެއިތުރުން، ދަ ގެލެކްސީ ވޮޗް 5 އާއި ދަ ގެލެކްސީ ވޮޗް 5 ޕްރޯ އަދި ސެމްސަންގެ ފަހުގެ ގެލެކްސީ ބަޑްސް 2 ޕްރޯގެ އިއާބަޑްސް ވެސް އަންޕެކްޑް އިވެންޓްގައި ދައްކާލުމަށް ހަމަޖެހިފައިވާ އުފެއްދުންތަކުގެ ތެރޭގައި ހިމެނޭ ކަމަށް ފަހުގެ ހަބަރުތައް ބުނެއެވެ.
ސެމްސަން ގެލެކްސީ އަންޕެކްޑް އިވެންޓް ފެށުމަށް ހަމަޖެހިފައިވަނީ އޯގަސްޓް 10 ވާ ބުދަ ދުވަހުގެ ރާއްޖޭގަޑިން އިރުއޮއްސި 6 ޖަހާއިރު އެވެ.