އެއީ އެފްރިކާގެ އަވަށަކަށް ނިސްބަތްވާ ފަގީރު މީހެކެވެ. ކައިބޮއެ އުޅެނީ ބަކަރިހުއިހައްޕައިގެން ލިބޭ އެއްޗަކުންނެވެ. އާއިލާއެއް މިހާތަނާ ޖެހެންދެން ބިނާކުރެވިފައި ނުވާ ފިރިހެނެކެވެ. އާއިލާގެ އަސްލެއް ނޭނގި މުޅިން ދުނިޔެއަށް ގެއްލިފައި ހުރި މީހެކެވެ. އެއީ މުސްލިމެއް ނޫނެވެ. ނަމަވެސް މި ވާހަކަ އަކީ އޭނާގެ ފަރާތުން ކޮންމެވެސް މީހަކު މެދުވެެރިވެ، މީސްމީޑިޔާއަށް ތިލަވެފައިވާ އިބުރަތްތެރި ވާހަކައެކެވެ. މިހީ ހަގީގީ ވާހަކައެވެ.
ކޮންމެ ދުވަހަކު އާދައިގެ މަތިން އޭނާ އޭނާގެ ބަކަރިތައް ބަލަހައްޓާ ކާންދީ އެސޮރުމެންގެ ހުރިހާ ކަމެއް ގާތުން ތަރުތީބުކޮށް އުޅެއެވެ. ކިރުފެލާ ވިއްކައެވެ. މަދު މަދުން ބަކަރިވެސް ވިއްކާ އުޅެއެވެ. އެސޮރުގެ މި ޒަމާންވީ އާދައިގެ ދިރިއުޅުމަށް ހުރަސް އަޅަމުން ދިޔައީ އިންސާނެއް ނޫނެވެ. އެއީ ޖިންނި ޝައިޠާނެއްވެސް ނޫނެވެ. އެއީ ދޫންޏެކެވެ. ދުވަސްވަރަކީ ފެނުގެ ދަތިކަން އޭނާއަށް ބޮޑު ދުވަސްވަރެކެވެ. ނަމަވެސް އޭނާ އައީ ކޮންމެވެސް ގޮތަކަށް އެކަން ފަރުޖައްސަމުންނެވެ.
ކޮންމެ ދުވަހަކު ދަނޑުމައްޗަށް މި ދޫންޏެއް އާދެއެވެ. އެއް ބަކަރި ބުރަކަށީގައި އިނދެފައި އަނެއް ބަކަރި ބުރަކަށީގައި އިނދެ އެސޮރުގެ ތުންގަނޑުން ބަކަރިތަކަށް ހަމާލާދީ އަނިޔާދެމުން ގެންދެއެވެ. މިއީ މީގެ ކުރިން އޭނާ ދެކުނު ދޫންޏެއް ނޫނެވެ. އަދި އެއްވެސް ދޫންޏެއްގެ ފަރާތުން ލިބުނުފަދަ ގެއްލުންތަކެއްވެސް ނޫނެވެ. އެ ދޫނީގެ އުނދަގޫ ބޮޑުވެ އެ ދޫނި ހިފުމުގެ ޝައުގު އޭނާގެ ބޮޑު ވެއްޖެއެވެ.
އެއްގޮތަށް ވުރެ ގިނަ ގޮތްގޮތުން އެ ދޫނި ހިފަން އޭނާ ކުރި މަސައްކަތްވީ ނާކާމިޔާބެވެ. އެތައް ދުވަސްތަކެއްވަންދެއް ޖެހި ތަފާތު އެކި ވައްތަރުގެ ވަޅިތައް މުޅިން ބޭކާރެވެ. އެ ދޫނި އެސޮރުގެ އާންމު ދިރިއުޅުން އުޅެމުން ގެންދިޔައެވެ. އެ ދޫނީގެ އުނދަގޫ ބޮޑުވެފައި ވަނިކޮށް ހޫނުމޫސުމުގެ ހޫނުނގަދަވެ ފެން ލިބުން މުޅިންހެން ހުއްޓުނެވެ. ބަކަރިތަކަށް ފެން ދޭނޭ ގޮތެއް އޭނާއަކަށް ނޭނގުނެވެ. އޭރުވެސް އެ ދޫނި އުޅެމުން ދެއެވެ.
އެއް ދުވަހަކު އެ ދޫނި، ދަނޑުގެ ފެންސެއްގައި ޖައްސާފައި އިނދެ، އުދުހި އައިސް އޭނާގެ ބޮލުގާ ކޮށަން ފެށިއެވެ. އެދުވަހު ނިކަން ފަސޭހަކަމާއެކު އޭނާއަށް އެ ދޫނި ހިފުނެވެ. އެއާއިއެކު ދޫނީގެ ތުނބުން ފެންތަކެއް ދޫކޮށްލިއެވެ. އަދި ނިކަން ބާރަށް ގޮވަން ފެށިއެވެ. ނިކަން ގަދައަށް ތެޅެން ފެށިއެވެ. އަދި އެސޮރުގެ ތުނބުން އޭނާގެ އަތަށް ހަމަލާ ދެމުން ދިޔައެވެ. އޭނާއަށް އެ ދޫނި ދޫކޮށްލެވުނެވެ.
ދެން އެ ދޫނި އުދުހި އުޅޭގޮތުން އެ ދޫނި ފަހަތުން ދިއުމުގެ ޝައުގު އޭނާގެ ކިބައިގައި އުފެދިއްޖެއެވެ. ދެން އެދޫނީގެ ފަހަތުން އޭނާ ދަމުން ދަނިކޮށް ފެންނަނީ މުޅިން ތަފާތު މަންޒަރެކެވެ. ތަނެއްގައި ގިނަ ބަޔަކު އެއްވެ އުޅޭ ތަނެވެ. އެ ދޫނިވެސް ގޮސް އެ ތަނުގައި ހުރި ގަހެެއްގައި އިށީނެވެ. ދެން އޭނާވެސް އެތަނަށް ދިޔަ އިރު، އެތަނުގައި ބަޔަކު ފެންވަޅެއް ކޮނެ، ފެން ނަގަނީއެވެ.
އާދޭހެވެ! މީގެ ކުރިން އެ ދޫނީގެ އުނދަގޫބޮޑުވެގެން އެ ދޫނި މަރާލިނަމަ، މިއަދު ފެނަށް ޖެހިފައިވަނިކޮށް އެ ފެންވަޅު އޭނާއަށް ފެނުމުގެ ފުރުސަތު ވަރަށްވެސް ކުޑައެވެ. މި ވާހަކަ ހިއްސާކުރި މީހާ، ދޭންބޭނުންވި ފިލާވަޅަކީ ފަހަރުގައި ތިމާއަށް ލިބޭ އުނދަގޫ އެއީ ފަހުން ތިމާއަށް ލިބޭ ވަރަށްބޮޑު ފަސޭހައެއް ކަމަށް ވެދާނެ ކަމަށެވެ. އަދިވެސް އެހެން އިބުރަތްތަކާއި ފިލާވަޅުތައް މި ވާހަކައިން އެނގެއެވެ. ދޭހަވެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން