މި އަހަރުގެ މިހާތަނަށް 9 ލައްކަ އެއްހާ ޓޫރިސްޓުން ރާއްޖެ އަށް ޒިޔާރަތްކޮށްފައިވާ ކަމަށް ފަހުގެ ތަފާސްހިސާބުތަކުން ދައްކައިފިއެވެ.
އެގޮތުން، މިދިޔަ އަންގާރަ ދުވަހާ ހަމައަށް ގާތްގަނޑަކަށް 896،618 ޓޫރިސްޓުން ރާއްޖޭގައި ވަނީ ޗުއްޓީ ހޭދަކޮށްފައެވެ.
މިއަހަރު މިހާތަނަށް އެންމެ ގިނަ ޓޫރިސްޓުން އައިސްފައިވަނީ އިންޑިއާ އިންނެވެ. ދެވަނައަށް އެންމެ ގިނައިން ރާއްޖެއަށް ޓޫރިސްޓުން އަންނަމުންދަނީ އިނގިރޭސިވިލާތުންނެވެ. މި ލިސްޓުގެ ތިންވަނައިގައި ރަޝިއާ އޮތްއިރު، އޭގެ ފަހަތުގައި އޮތީ ޖަރުމަނާއި އިޓަލީ އެވެ. މި ލިސްޓުގެ ގަދަ 10 ގައި ދެން ހިމެނެނީ؛ އެމެރިކާ، ފްރާންސް، ސައުދި އަރަބިއާ އާއި ސްވިޒަލެންޑް އަދި ސްޕެއިން އެވެ.
މިދިޔަ ޖޫން މަހު އެކަނި ރާއްޖެއަށް 110،889 ޓޫރިސްޓުން ޒިޔާރަތް ކުރި އެވެ. އަދި މި މަހުގެ 1-20އަށް މިހާތަނަށް 87،597 ޓޫރިސްޓުން ޒިޔާރަތް ކޮށްފައިވެ އެވެ.
މިހާރު ރާއްޖޭގައި ޓޫރިސްޓުން އެވްރެޖުކޮށް 8 ދުވަސް ހޭދަކުރެ އެވެ. މިއީ 2019 ވަނަ އަހަރަށް ވުރެ ދެ ދުވަސް އިތުރު އަދަދެކެވެ.
ރާއްޖޭގައި މިވަގުތު ހިދުމަތްދެމުންދާ ޓޫރިސްޓް އެނދުގެ އަދަދަކީ 57،477 އެވެ.
މިދިޔަ އަހަރު ރާއްޖެ އަށް މުޅި ޖުމްލަ 1.3 މިލިއަން ޓޫރިސްޓުން އައިސްފައިވެއެވެ. ދުނިޔެއަށް އިގްތިސާދީ ދަތިކަމެއް ކުރިމަތިވަމުން އައި ނަމަވެސް މިހާރު ރާއްޖެއަށް ޓޫރިސްޓުން އަންނަ ވަރަށް އަހަރުގެ ބާކީ އޮތް މުއްދަތުގައި ވެސް އަންނަނަމަ މިއަހަރަށް ސަރުކާރުން ކަނޑައަޅާފައިވާ އަދަދަށް ޓޫރިސްޓުން ގެނެވޭނެ ކަމަށް ޓޫރިޒަމް މިނިސްޓްރީން ބުނެފައިވެއެވެ.