ސްޓެލްކޯގެ މުވައްޒަފުންނަށް އަމާޒުކޮށްގެން ބޯހިޔާވަހިކަމުގެ އިތުރު މަޝްރޫއުއެއް ފެށުމަށް ހަމަޖެހިފައިވާ ކަމަށް އެ ކުންފުނީގެ މެނޭޖިންގ ޑިރެކްޓަރ އަހުމަދު ޝަރީފު އާދަމް ވިދާޅުވެއްޖެއެވެ.
ތާޖުއްދީން ސްކޫލް ހޯލްގައި ސްޓެލްކޯގެ މުވައްޒަފުންނަށް ހާއްސަކޮށްގެން ރޭ ބޭއްވި ހަފްލާއެއްގައި އެ ކުންފުނީގެ އެމްޑީ ޝަރީފު ވަނީ ވިލިމާލޭގައި ބޯހިޔާވަހިކަމުގެ މަޝްރޫއުއެއް ފެށުމަށް ހަމަޖެހިފައިވާކަން އިޢުލާންކުރައްވާފައެވެ.
މި މަޝްރޫއުގެ އިތުރު ތަފްޞީލްތައް ރޭގެ ހަފްލާގައި ޝަރީފު ހިއްސާކުރައްވާފައެއް ނުވެއެވެ. އެކަމަކު، ހުޅުމާލޭގެ ދެވަނަ ފިޔަވަހީގައި ސްޓެލްކޯގެ މުވައްޒަފުންނަށް ހާއްސަކޮށްގެން ހަދާފައިވާ ފްލެޓްތަކުގެ މަހު ކުލީގެ ގޮތުގައި ދައްކަންޖެހޭ އަދަދުތައް މި ހަފްލާގައި ޝަރީފު ވަނީ އިޢުލާންކުރައްވާފައެވެ.
އެގޮތުން، އެއް ކޮޓަރީގެ ފްލެޓެއްގެ މެއިންޓެނަންސް ފީގެ ގޮތުގައި 1،000ރ. އާއެކު މަހު ކުއްޔަކީ 5،622ރ. އެވެ. އަދި ދެ ކޮޓަރި އާއި މެއިޑް ރޫމް ހިމެނޭ ފްލެޓަކަށް މެއިންޓަނަންސް ފީގެ ގޮތުގައި 1،300ރ. ދައްކަންޖެހޭއިރު، އެ ތަނުގެ މަހު ކުއްޔަކީ 10،356-10،652ރ. އާ ދެމެދުގެ އަގެކެވެ.
ޝަރީފު އިތުރަށް ވިދާޅުވީ، އެ ކުންފުނީގެ މުވައްޒަފުންނަށް މަސައްކަތްކުރުމަށް ބޭނުންވާނެ އެންމެ މުހިއްމު އެއް ކަމަކީ ހިތްހަމަޖެހުން ލިބޭ ފަދަ މާހައުލެއް ގާއިމްކުރުން ކަމަށެވެ.
"މި ކުންފުނިން މުވައްޒަފުންގެ ކުރިއެރުމަށާއި، މުވައްޒަފުންނާއި، އެ މުވައްޒަފުންގެ އާއިލާތަކުގެ ލާބައާއި މަންފާއަށް ކޮށްދޭ ކަންކަމުގައި ބަދަލުގައި ހަމައެކަނި ބޭނުންވަނީ ރައްޔިތުން އެދޭފަދަ ފުރިހަމަ ހިދުމަތެއް އެ ރައްޔިތުންނަށް ފޯރިވައިދިނުން." ޝަރީފު ވިދާޅުވިއެވެ.
ސްޓެލްކޯ އިން ހުޅުމާލޭގައި އިމާރާތްކޮށްފައި ވަނީ 360 އެޕާޓްމަންޓް ހިމެނޭ ދެ ޓަވަރެވެ. އެއީ އެއް ކޮޓަރީގެ 72 އެޕާޓްމަންޓާއި ދެ ކޮޓަރި އާއި މެއިޑް ރޫމް ހިމެނޭ 288 އެޕާޓްމަންޓެވެ. އެ ފްލެޓްތަކަށް ކުންފުނިން ކަނޑައަޅާފައި ވަނީ މިހާރު މާލޭގައި އެ އަގުގެ ތަނެއް ލިބޭ މިންވަރާ އަޅާ ބަލާއިރު ހެޔޮ އަގެކެވެ.