އެމެރިކާގެ ޖައްވީ އިދާރާ، ނާސާ އިން މާސްގެ ބިމުން ނަގާފައިވާ ހިލަކޮޅުތަކުގެ 30 ސާމްޕަލް އަނބުރައި ދުނިޔެ އަށް ގެނައުމަށްޓަކައި ކުޑަ ދެ ހެލިކޮޕްޓަރު ފޮނުވަން އެ އިދާރާ އިން ނިންމައިފިއެވެ.
މިއީ އެއްވެސް ޒަމާނެއްގައި މާސްގައި ދިރުމެއް ވީ ނަމަ އޭގެ ހެކިތައް ހޯދައި، ދެނެގަތުމަށް ނާސާގެ ސައިންސްވެރިން ކުރަމުން އަންނަ ދިރާސާ އެކެވެ.
މި ދިރާސާގައި ނާސާ އިން ބޭނުންކުރަމުން އަންނަނީ މިދިޔަ އަހަރުގެ ފެބުރުއަރީ މަހު މާސްގެ ބިންގަނޑަށް ތިރިކުރި އުޅަނދު، ނުވަތަ ރޮބޮޓް، ޕާސަވިއަރެންސް ރޯވާ އެވެ. އެގޮތުން، ޕާސަވިއަރެންސްގައި އެކުލެވިގެންވާ "އިންޖެނުއިޓީ" ގެ ނަމުން ނަން ދީފައިވާ ހެލިކޮޕްޓަރުގެ އެހީގައި ބިން ތޮރުފައިގެން ތަފާތު 11 ސާމްޕަލެއް ނަގާފައިވެއެވެ.
ނާސާގެ ސައިންސްވެރިން ގަބޫލުކުރާ ގޮތުގައި މާސްގެ ބިމުން ނަގާފައިވާ ސާމްޕަލްތައް އިތުރު ތަހުލީލްތަކަށް އަނބުރައި ދުނިޔެ އަށް ގެނައުމަކީ ބުރަ، އުނދަގޫ މަސައްކަތެކެވެ.
އެހެންކަމުން، ނާސާ އިން ކުރިން ނިންމާފައި އޮތީ އިތުރު ރޯވާ އެއް މާސް އަށް ފޮނުވާ އޭގެ އެހީގައި އެ އެއްޗެހި ޕާސަވިއަރެންސް މެދުވެރިކޮށް، "މާސް އެސެންޓް ވެހިކަލް" ގެ ނަމުން ނަން ދީފައިވާ ރޮކެޓެއް އެކުލެވިގެންވާ ރޮބޮޓިކް ލޭންޑާއެއްގައި ކުދިކުދި ޓިއުބުތަކުގައި ރައްކާކޮށްފައިވާ ސާމްޕަލްތައް ބިމަށް ދޫކޮށްލުމަށްފަހު ޔޫރަޕިއަން ސްޕޭސްޝިޕުން އެ އެއްޗެހި ބަލައިދިއުމަށެވެ.
ނަމަވެސް، ނާސާ އިން މިހާރު މިކަމުގައި ވަނީ ދެވަނަ ވިސްނުމަކަށް ގޮސްފައެވެ. މިހާރު ނިންމާފައިވަނީ، ޕާސަވިއަރެންސްގެ އެހީގައި އެ އެއްޗެހި އެސެންޓް ވެހިކަލް އަށް ފޯރުކޮށްދިނުމަށެވެ. މި މަސައްކަތުގެ ތެރެއިން، އެސެންޓް ވެހިކަލްގައި އެކުލެވިގެންވާ ރޮބޮޓިކް އަތުގެ އެހީގައި އެ އެއްޗެހި ޕާސަވިއަރެންސުން ނެގުމަށް މާބޮޑު އުނދަގުލެއް ނެތެވެ.
އެކަމަކު، ނާސާ އިން ކޮންމެ ޕްރޮޖެކްޓެއްގައި ވެސް ކޮންޓިންޖެންސީ ޕްލޭނެއް ގެންގުޅޭތީވެ، ޕާސަވިއަރެންސަށް ގެއްލުމެއް ލިބިއްޖެނަމަ ދެން ނިންމާފައި އޮތް ގޮތަކީ އިތުރު ލޭންޑާ އެއް މެދުވެރިކޮށް އެ މަސައްކަތް ކުރިއަށް ގެންދިއުމަށެވެ. މި އުޅަނދުގައި އެކުލެވިގެންވާ، ކުޑަ ދެ ހެލިކޮޕްޓަރަކީ މާސްގެ ބިމުގައި ފަސޭހަކަމާއެކު ދަތުރުކުރެވޭ، އޭގެ ހިމެނޭ ރޮބޮޓިކް އަތުގެ އެހީގައި ސާމްޕަލްތައް އުނދަގުލެއް ނެތި ރިކަވާކުރުމުގެ ގާބިލްކަން ހުރި އެއްޗިއްސެވެ. އެ ފަދަ ހާލަތެއްގައި، ޕާސަވިއަރެންސުން ސާމްޕަލްތައް މާސްގެ ބިމަށް ދޫކޮށްލުމުން މި ކުޑަ ދެ ހެލިކޮޕްޓަރުން އެ ތަކެތި ނެގުމަށްފަހު އެސެންޓް ވެހިކަލަށް ފޯރުކޮށްދޭނެ އެވެ.
އެކަމަކު އެ އުޅަނދު ދުނިޔޭން އުދުއްސާލެވޭނެ ކަމަށް ބެލެވެނީ 2028 ގައެވެ. އެއަށްފަހު، 2030 ވަނަ އަހަރުގެ މެދުތެރޭގައި މި އުޅަނދު މާސްގެ ބިމަށް ޖެއްސުމަށްފަހު، ޕާސިވިއަރެންސްއިން މާސްގެ ބިމަށް ދޫކޮށްލި ސާމްޕަލްތައް ދުނިޔެއަށް ގެނެވޭވަރު ވާނެ ކަމަށް ލަފާކުރަނީ 2033 ގައެވެ.