މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ޕްރައިވެޓް ލިމިޓެޑް (އެމްޓީސީސީ) އަށް މި އަހަރުގެ ފުރަތަމަ ދެ ކުއާޓަރުގައި 1.14 ބިލިއަން ރުފިޔާގެ އާމްދަނީއެއް ލިބިފައިވާ ކަމަށް އެ ކުންފުނީގެ މާލީ ހިސާބުތަކުން ދައްކައިފިއެވެ.
އެމްޓީސީސީގެ މާލީ ހިސާބުތަކުން ދައްކާގޮތުން މި އަހަރުގެ ފުރަތަމަ ކުއާޓަރުގައި، 550 މިލިއަން ރުފިޔާ އާއި ދެވަނަ ކުއާޓަރުގައި ލިބުނު 593 މިލިއަން ރުފިޔާ އާއެކު މުޅި އަހަރުގެ މިހާތަނަށް ލިބުނު ޖުމްލަ އާމްދަނީ 1.14 ބިލިއަން ރުފިޔާ އަށް އަރައިފިއެވެ.
އެ ކުންފުންޏަށް މި އަހަރުގެ ފުރަތަމަ ދެ ކުއާޓާރުގައި ޓެކުހަށް ކެނޑުމަށްފަހު ޖުމްލަ ފައިދާގެ ގޮތުގައި 130 މިލިއަން ރުފިޔާ ވަނީ ލިބިފައެވެ. އެއީ، ފުރަތަމަ ކުއާޓަރުގައި ލިބުނު 64 މިލިއަން ރުފިޔާ އާއި ދެވަނަ ކުއާޓަރުގައި ފައިދާގެ ގޮތުގައި ލިބުނު 66 މިލިއަން ރުފިޔާ އެވެ.
އެމްޓީސީސީން ބުނިގޮތުގައި، އެ ކުންފުނީގެ ދެވަނަ ކުއާޓަރުގައި އާމްދަނީ އިތުރުވެ، ފައިދާވީ ބަހުގެ ހިދުމަތާއި ރާއްޖެ ޓްރާންސްޕޯޓް ލިންކު (އާރްޓީއެލް) ފެރީ ނިޒާމަށް ސަރުކާރުން ދޭ ސަބްސިޑީ އިތުރުވުމުން ކަމަށެވެ. އެ ކުންފުނިން ބުނީ، ފުރަތަމަ ކުއާޓަރު ނިންމާލިއިރު ގެއްލުމުގައި ދެމުންދިޔަ ދަތުރުފަތުރުގެ ހިދުމަތްތަކުން ދެވަނަ ކުއާޓަރުގައި 5.6 މިލިއަން ރުފިޔާގެ ފައިދާވި ކަމަށެވެ.
މީގެއިތުރުން، މިއަހަރުގެ ދެވަނަ ކުއާޓަރުގެ މާލީ ހިސާބުތަކުން ދައްކާ ގޮތުގައި، އެމްޓީސީސީ އަށް އެންމެ ބޮޑު ފައިދާއެއް ކުރަނީ ކޮންޓްރެކްޓިން އާއި ޓްރޭޑިންގެ އިތުރުން ބިން ހިއްކުމުގެ މަޝްރޫއުތަކުންނެވެ. ހަމަ އެއާއެކު އެމްޓީސީސީއަށް އެންމެ މަދުން އާމްދަނީ ލިބެނީ އެ ކުންފުނީގެ ދަތުރުފަތުރުގެ ވިއުގައިންކަން ވެސް ފާހަގަކޮށްލެވެއެވެ. އެގޮތުން، އެމްޓީސީސީ އަށް ކޮންޓްރެކްޓިން އަދި ބިން ހިއްކުމުގެ މަޝްރޫއުތަކުން ލިބުނު އާމްދަނީ ފުރަތަމަ ކުއާޓަރާ އަޅާބަލާއިރު ދެވަނަ ކުއާޓަރުގައި ގާތްގަނޑަކަށް 30 އިންސައްތަ އަށް އިތުރުވިއެވެ.
އެމްޓީސީސީން ބުނީ، އެ ކުންފުނިން މިހާރު އަމާޒުހިފާފައިވަނީ މި އަހަރުގެ ޖުމްލަ ފައިދާގެ ގޮތުގައި 300 މިލިއަން ރުފިޔާ ހޯދުމަށް ކަމަށެވެ. މިދިޔަ އަހަރު އެ ކުންފުނީގެ ޖުމްލަ ފައިދާގެ ގޮތުގައި 271 މިލިއަން ރުފިޔާ ލިބިފައިވެއެވެ. އަދި އަހަރު ނިމުމުގެ ކުރީން، ޖުމްލަ އާމްދަނީ 2.4 ބިލިއަން ރުފިޔާ އަށް އަރާނެ ކަމަށް ލަފާކުރެއެވެ.