ދިވެހިރާއްޖޭގެ ރަށްތައް އުފެދި، މި ރަށްތަކުގައި ދިވެހިން އާބާދުވަމުން އައިސްފައި ވާ ގޮތުން، މި ރަށްތަކުގައި ވަނީ އާދަޔާހިލާފު ރީތިކަމެއް އުފެދިފައެވެ. އެ ރީތިކަން ދެމިގެން ދިއުމުގައި ދިވެހިންގެ ހީވާގި އުޅުމާއި، ރިވެތި އަހުލާގުވަނީ ވަރަށްބޮޑު ދައުރެއް އަދާކޮށްފައެވެ. އިންސާނުން އުޅޭ ސަރަހައްދު ތަކަކީ ހަޑިކޮށް ހުންނަ ސަރަހައްދުތަކެއް ނޫނެވެ. އާދޭހެވެ! ރީތި ވީމާ ހަމަ އެންމެނަށްވެސް ރީއްޗެވެ. އެ ރީތިކަން ދިވެހިން ދަމަހައްޓަމުން އައީ ހުރިހާ އެންމެން އެކުވެ އެކަތިގަނޑަކަށް ވެގެންނެވެ.

ހެނދުނަށް އަރާ އެ ހޫނުގަދަ އިރުގެ ހޫނުކަން ދުނިޔޭގެ ބިމަށް ހޫނުކަން ނުދެނީސް ދިވެހިންނަކީ އެބައިމީހުންގެ ގޭދޮށާއި ރަށުތެރެ ކުނިކަހާ އުޅުނު ބައެކެވެ. ބިންމަތީގައި ވަކި ކުނިކޮޅޭއްވެސް ނޯވެއެވެ. އާދޭހެވެ! ރީތިވީމާ އެންމެނަށްވެސް ރީއްޗެވެ. އިއްޔެއާއި މިއަދު ވަރަށްވެސް ތަފާތެވެ. ކުރިންވެސް ދެންނެވިފަދައިން އިއްޔެ ދިވެހިން އެބައިމީހުންގެ ރަށްތައް، ރީތިކޮށް ކުނިކަހާ ބަލަހައްޓަމުން އައީ ރަށުގެ ހުރިހާ ރަށްޔިތުން ގުޅިގެންނެވެ. ރީތި ވީމާ އެންމެނަށްވެސް ރީތިވާނޭކަން ހަނދާނުގައި ބަހައްޓާއިގެންނެވެ. އެ އަޒުމުގައި ހިތްވަރާއި އެކީ މަސައްކަތް ކޮށްގެންނެވެ. ނަމަވެސް އަދު މިހާލާތު މުޅީން ބަދަލުވެއްޖެއެވެ. އެކުވެރިކަމޭ މި ކިޔާ ރޫހު އަހަރެމެންގެ ތެރެއިން ނެތިއްޖެއެވެ. އެކުވެ އެންމެން އެއް އަމާޒަކަށް މަސައްކަތްކުރުން ހުއްޓިއްޖެއެވެ.

ރީތި ވީމާ އެންމެނަށް އެވާ ރީތި، މިއަދު ހަޑިވެއްޖެއެވެ. ހިތްޕުޅާ ނުވާ ބަޔަކު ތަނެއް ރީތިކޮށް ބެލެއްޓިޔަސް، އެތަނަކާއި މެދު ކުރެވެނީ ކޮންމެވެސް ޝަކުވާއެކެވެ. އަނެއްބަޔަކު ހޮތްޕުޅާ ނުވާ ބަޔަކަށް ފަސޭހައެއް ލުޔެއް ނުވަތަ ރީތިކަމެއް އެކަމަކުން ލިބޭނަމަ، އަނެކާ އެކަމެއް ކުރާކަށް ބޭނުމެއް ނުވެއެވެ. އެއީ މުޅި ރަށާއި ރަށުގެ އިޖްތިމާއީ ގުޅުމާއި، ރަށުގެ މާހައުލުގެ ރީތިކަމާއި ސާފުތާހިރުކަމާއި ސީދާ ގުޅުން ހުރި ކަންކަން ވިޔަސް މެއެވެ. މިއަދު ތިމާގެ ގޭދޮށް ނޫނިއްޔާ ރީތިކޮށްލުމެއް، ސާފުކޮށްލުމެއް ނޯވެއެވެ. ތިމާގެ ގެއާއި އިންވެގެން ހުންނަ ގޭގެ މަގުމަތި ހަޑިވެފައި އޮތަސް، މިއަދު ދިވެހިންނަށް މައްސަލައެއް ނޫނެވެ. ރީތި ވީމާ ވަކި ރީއްޗެއް ނުވިއެވެ.

އަނެކާގެ ގޭގެ ދޮރުމަތީ އޮންނަ ގާގޮޅު ތިމާގެ ފައިން ގަހާ އެއްކައިރިކޮށްލުންވެސް މިއަދު މަދުވެއްޖެއެވެ. އެއްކަލަ ރީތި ވީމާ އެންމެނަށްވެސް ރީއްޗޭ ބުނި، ނުވަތަ ބުނާ ދިވެހިންގެ ހާލަކީ މިއީއެވެ. ބަޔަކު ނުކުމެ ތަނެއް ސާފުކޯށްފައި ދިއުމުން، އެމީހުންގެ ފަހަތުން އަންނަ މީހުން، އެތަނަކަށް އައިސް އެތަން ގޮނޑުކޮށްފައި ދަނީ ވަލު ޖަނަވާރުން ފަދައިންނެވެ. ހަގީގަތަކީ ދިވެހިންގެ ދިރިއުޅުމުގެ ވައްޓަފާޅިއަށް ބޮޑެތި ބަދަލުތަކެއް އައިކަމެވެ. ވިޔަފާރިއާއި މުދާވެރިކަމުގައި އެކަކު އަނެކަކަށް އޮންނަ ވާދަވެރިކަމާއި ރުޅިވެރިކަމެވެ. ކޮންމެވެސް ސިޔާސީ ކަމެއްގައި އެއްބަޔަކު އަނެއްބަޔަކާއި ދޭތެރޭ ލާ ހަސަދައެވެ. ނުވަތަ ކޮންމެވެސް އެނޫން މައްސަލައަކާއި ގުޅިގެން ހަތުރުންނަށް ވެފައިތިބޭ ތިބުމެވެ.

އިޖްތިމާއީ ރޫހު ނެތި، އިޖްތިމާއީ ސާފުތާހިރުކަންވެސް ނެތިއްޖެއެވެ. އާންމު އިޖްތިމާއީ ސަރަހައްދުތަކަށް ކުނި އެޅުމާއި އެނޫންވެސް ބޮޑެތި ހަރުމުދަލާއި ބާ މުދާ އެއްކޮށް ގޮނޑު ކޮށްފައި ހުރެއެވެ. މަގުތައް މަތީގައި ބޭނުން ނުކުރާ ބޮޑެތި މުދަލާއި ސިމެންތިއާއި ގަލުގެ ކުނި، ފުނިޖަހާފައި ބަހައްޓަނީ އެހެން މީހުންނަށާއި، ހުދު ތިމާގެ އަމިއްލަ ނަފްސަށްވެސް އެއިން ލިބޭ އުނދަގުލަކަށް ނުބަލައެވެ. ވާ ތެރެއަށް އުކާޅެވޭ ފީފާ ބުރިތަކާއި ހަންހަމާއި އެފަދަ ފެން ހުރުލާ ތަކެތީގެ ސަބަބުން މަދިރި އިތުރުވެ އާންމު ސިއްހަތަށް ނުރައްކާވަމުން ދާއިރު އެކަމަށް ފަރުވާލެއް ނުބަހައްޓައެވެ. ކުނިވާ ޒާތުގެ ކުނި އެތަން މިތަނަށް އުކަމުން ދާއިރު، މެހީގެ އުނދަގޫ ބޮޑުވަމުން ދާކަމުގެ އިހުސާސް ނުކުރެވެއެވެ. ނަމަވެސް ލިބޭ ކޮންމެ އުނދަގުލަކާއި އެކު ޝަކުވާ ކުރެވެއެވެ. އިސްލާހު ކުރަންވީމާވެސް ކުރެވީ ޝަކުވާއެވެ. މިއީ ދިވެހިންގެ ވައްޓަފާޅި އޮތް ގޮތެއް ނޫނެވެ.

ސާފުތާހިރުކަމަށް ލޯބިކުރާށެވެ. ރީތި ވީމާ އެންމެނަށްވެސް ރީތި ވާނެކަން އެންމެން ގަބޫލުކުރާށެވެ. އެ އަޒުމުގައި ކޮންމެ ރަށެއްގެ ރައްޔިތުންވެސް މަސައްކަތްކުރާށެވެ. ރަށު ތެރެ ރީތިކޮށް ބެލެހެއްޓުމަކީ ވަކިބައެއްގެ ޒިންމާއެއް ކަމުގައި ނުދެކޭށެވެ. އެއީ އެންމެންގެ ޒިންމާއެކެވެ. އެއީ ކޮންމެ ފަރުދެއްގެ ބޮލުގައި އެޅިފައިވާ ޒިންމާއެކެވެ. އަދި ކިއެއް އެއީ ދީނީ، ޤައުމީ، ރަށްވެހި އަދި ފަރުދީ ވާޖިބެކެވެ.