މިހާރު 17 އަހަރު ފުރުން ފާހަގަކުރަމުން އަންނަ އުރީދޫ މޯލްޑިވްސް އަކީ ގިނަ ބައެއްގެ ދިރިއުޅުމާއި ހުރިހާ ގޮތަކުން ވެސް ގުޅިލާމެހިފައިވާ ނަމެކެވެ.
ވަތަނިޔާ މޯލްޑިވްސްގެ ނަމުގައި 2005 ވަނަ އަހަރުގެ އޯގަސްޓް މަހުގެ 1 ވަނަ ދުވަހުން ފެށިގެން ރާއްޖޭގެ ހުރިހާ ކަންކޮޅުތަކެއްގައި މުވާސަލާތީ ހިދުމަތްދޭން ފެށި ގަތަރަށް ނިސްބަތްވާ މި ކުންފުނިން އުރީދޫ މޯލްޑިވްސްގެ ނަމަށް ރީބްރޭންޑް ކުރި ކުރުމާ ހަމައަށާއި، އޭރުން ފެށިގެން އަދި އަދަށް ދާންދެން ވެސް އެ ކުންފުނިން ދެމުންއައި ހިދުމަތްތަކަށް ކުޑަކޮށްވެސް ބުރޫ އަރާފައެއް ނުވެއެވެ.
ރާއްޖޭގައި އޭރު މުވާސަލާތީ ހިދުމަތްދެމުންއައި ހަމައެކަނި ކުންފުނި ކަމަށްވާ ދިރާގު އާއެކު ވާދަވެރި މާހައުލެއްގައި ކަސްޓަމަރުންނަށް ބުރަ އަކަށް ނުވާނެ ގޮތަށް ޒަމާނާ އެއްވަރަށް އުރީދޫން ދެމުންއައި ހިދުމަތުގެ ފެންވަރު ރަނގަޅުވެ، އަގުގެ ގޮތުން އެންމެންނަށް ލުއި ފަސޭހަވާނެހެން، ޒަމާނީ ޓެކްނޮލޮޖީ ފޯރުކޮށްދެމުންގެންދިޔައީ ހަލުވި ސްޕީޑެއްގައެވެ.
ވަތަނިޔާގެ ނަމުގައި އެންމެ ފުރަތަމަ ހިދުމަތްދެމުންއައި ކުންފުނިން އޭރު ބުނަމުންދިޔައީ، އެންމެ ބޮޑު އިސްކަމެއް ދެނީ އަގަށްވުރެ ބޮޑަށް އެކަށީގެންވާ އަގުތަކެއްގައި ފެންވަރު ރަނގަޅު ހިދުމަތެއް ފޯރުކޮށްދިނުމަށް ކަމަށެވެ. އެ ކުންފުނިން އޭރު ބުނި ގޮތަށް މިހާރު ރާއްޖޭގައި ދެމުން އަންނަ މުވާސަލާތީ ހިދުމަތުގެ ތެރެއިން، އިންޓަނެޓްގެ ހިދުމަތުގެ އަގު ވެސް ވާދަވެރިންނާ އެއް ހަމައެއްގައި ރަނގަޅު ފެންވަރެއްގައި ދެމުން އަންނަނީ ވެސް އުރީދޫ އިންނެވެ.
އެ ކުންފުނީގެ މިވޭތުވެދިޔަ 17 އަހަރުގެ މާޒީ އަށް ކުރުކޮށް ނަޒަރު ހިންގާލާއިރު، 2005 ވަނަ އަހަރުގެ ތެރޭގައި ޖީއެސްއެމް 900 ގެ މޮބައިލް ހިދުމަތް ރާއްޖޭގައި ދޭން ފަށައި، ގާތްގަނޑަކަށް ތިން އަހަރު ދުވަހުގެ ތެރޭގައި 3ޖީ ހިދުމަތް ތަޢާރަފްކޮށްފައިވެއެވެ. އަދި އެއަށްފަހު، ދެން ޖެހިގެން 2009 ވަނަ އަހަރުގެ ތެރޭގައި ބްރޯޑްބޭންޑް 3ޖީ ޕްލަސް ވަޔަލެސް ހައި ސްޕީޑް އިންޓަނެޓްގެ ހިދުމަތް ދޭން ފެށިއެވެ.
އަދި 2013 ވަނަ އަހަރުގެ ތެރޭގައި 4ޖީ އެލް.ޓީ.އީ ހިދުމަތް ތަޢާރަފްކޮށްފައިވާއިރު، ދެން ޖެހިގެންއައި އަހަރު އުރީދޫ މޯލްޑިވްސްގެ ނަމަށް ރީބްރޭންޑްކޮށް 3.5ޖީގެ ހިދުމަތް ރާއްޖޭގެ އާބާދީގެ 95 އިންސައްތައަށް ފޯރުކޮށްދީފައިވެއެވެ. 2015 ވަނަ އަހަރުގެ ތެރޭގައި ހުރިހާ ކަސްޓަމަރުންނަށް 4ޖީ ޑޭޓާ ހިދުމަތް ތަޢާރަފްކުރިއެވެ. އަދި ހަމަ އެ އަހަރުގެ ތެރޭގައި އިންޓަނެޓްގެ ހިދުމަތްދިނުމުގެ ލައިސަންސް ލިބުމާއެކު އެ މަސައްކަތްވެސް ހަލުވި ސްޕީޑެއްގައި ފަށާފައިވެއެވެ.
މީޑިއާނެޓާ ގުޅިގެން އެ ކުންފުނިން 'ސުޕަނެޓް' ގެ ނަމުގައި ފިކްސްޑް ބްރޯޑްބޭންޑް އިންޓަނެޓްގެ ހިދުމަތް ދޭން ފެށީ 2016 ވަނަ އަހަރުގައެވެ. އަދި ހަމަ އެ އަހަރުގެ އޮކްޓޫބަރު މަހުގެ ތެރޭގައި ރާއްޖޭގައި ޕަބްލިކް ލިމިޓެޑް ކުންފުންޏެއްގެ ގޮތުގައި ރަޖިސްޓްރީކޮށް، ރާއްޖޭގެ ހިއްސާގެ ބާޒާރުގައި އެ ކުންފުނިން އަންނަނީ ހަރަކާތްތެރިވަމުންނެވެ. އެއަށްފަހު، ދެން ޖެހިގެންއައި 2017 ވަނަ އަހަރުގެ ތެރޭގައި ސަބްމެރިން ކޭބަލް ނެޓްވޯކް ބޭނުންކުރަން ފަށައި، ރާއްޖޭގެ އެންމެހާ ރަށްތަކަށް 4ޖީ+ ހިދުމަތް އެންމެ ފުރަތަމަ ފޯރުކޮށްދިން އޮޕަރޭޓަރަކީ ވެސް އުރީދޫ އެވެ. އަދި ހަމައެއާއެކު، ސަބްމެރިން ކޭބަލް ނެޓްވޯކް މެދުވެރިކޮށް ރާއްޖޭގެ ހުރިހާ ރަށްތަކަށް ބްރޯޑްބޭންޑް އިންޓަނެޓްގެ ހިދުމަތްދޭން ފަށާފައިވެއެވެ. އުރީދޫ އިން 2020 ވަނަ އަހަރުގެ ތެރޭގައި ރާއްޖެ އަށް 5ޖީ ހިދުމަތް ތަޢާރަފްކޮށްފައިވާއިރު، އެ ކުންފުނީގެ 17 ވަނަ އަހަރީ ދުވަސް ފާހަގަކުރީ މާލޭގެ ހުރިހާ ހިސާބުތަކަށް 5ޖީގެ ހިދުމަތް ފުޅާކުރުމާއެކުގައެވެ.
އުރީދޫގެ މިވޭތުވެދިޔަ 17 އަހަރުގެ ތެރޭގައި ހާސިލްކޮށްފައިވާ ބައެއް ކަންތައްތަކުގެ ތެރޭގައި؛ ކުދި އަދި މެދު ފަންތީގެ ވިޔަފާރިތަކާއި، ކޯޕަރޭޓްތަކާއި، ސަރުކާރު މުއައްސަސާތައް އަދި ރިސޯޓް ބިޒްނަސްގެ ޕޯޓްފޯލިއޯ އިތުރަށް ވަރުގަދަކުރުމާއި، ތަފާތު ޑިޖިޓަލް ޗެނަލްތައް މެދުވެރިކޮށް ޑިޖިޓަލް ލައިފް ސްޓައިލް ކުރިއެރުވުމަށް މަސައްކަތްތަކެއް ކޮށްފައިވެއެވެ. އޭގެ ތެރޭގައި އުރީދޫ މޯލްޑިވްސްގެ އީ-ކޮމާސް ޕްލެޓްފޯމް "މޫލީ"، ޑިޖިޓަލް ފައިނޭންޝަން ސަރވިސް "އެމް-ފައިސާ" އަދި އޮންލައިން ސްޓޯ "ކާރތީ ސްޓޯ" މެދުވެރިކޮށް މުނިފޫހި ފިލުވުމުގެ ކަންކަމުގައި ބައިވެރިވުމުގެ ފުރުޞަތުތައް ފަހިކޮށްދީފައިވެއެވެ.
ރާއްޖޭގައި ގޭމިން ކޮމިއުނިޓީ އެއް ބިނާކޮށް، ހަލުވިދުވެއްޔެއްގައި ކުރިއަރަމުން އަންނަ މި އިންޑަސްޓްރީގެ ނިމުމެއް ނެތް ފުރުސަތުތަކާ ގުޅުވާލައިދިނުމުގެ މަގްސަދުގައި "އުރީދޫ ނޭޝަން-ގޭމަރސް ލޭންޑް" ޕްލެޓްފޯރމް ވަނީ ތަޢާރަފްކޮށްފައެވެ.
މިއަދު އެ ކުންފުންޏަކީ ހަމައެކަނި މުވާސަލާތީ ހިދުމަތްތައް ދޭ ކުންފުންޏެއްގެ ގޮތުގައި އޮތް އޮތުން ބަދަލުވެ، ވަކިވަކި ރަށްތަކަށް އުމްރާނީ ގޮތުން އެހީތެރިވުމާއި، އެކި ސިނާއަތުގައި އެހީތެރިވެ، ހާއްސަކޮށް ރާއްޖޭގެ ފަތުރުވެރިކަން ދުނިޔެއަށް އިސްތިހާރުކުރުމުގައި ވެސް މުހިއްމު ބައިވެރިއެއްގެ ގޮތުގައި އެ ކުންފުނިން ދަނީ ހަރަކާތްތެރިވަމުންނެވެ. މީގެއިތުރުން، އދ.ގެ ދެމެހެއްޓެނިވި ތަރައްގީގެ 3 ވަނަ ލަނޑުދަނޑި (ގްލޯބަލް ގޯލްސް)ގެ ގޮތުގައި ކަނޑައެޅިފައިވާ "ގުޑް ހެލްތު އެންޑް ވެލްބީންގ" ހާސިލްކުރުމަށް އެއްބާރުލުން ދިނުމުގެ ގޮތުން ދިވެހިންގެ ތެރޭގައި ދުޅަހެޔޮ ޞިއްޙަތެއް ޤާއިމުކުރުމަށް ގިނަ މަސައްކަތްތަކެއް އެ ކުންފުނިން ދަނީ ކުރަމުންނެވެ.
ޒުވާނުންނާއި، ދޮށީ އުމުރުގެ މީހުންނާއި ޖުމްލަކޮށް ހުރިހާ އުމުރު ފުރައިގެ މީހުންނަށް ވެސް ތަފާތު ކުރުމެއް ނެތި ދެމުންދާ ހިދުމަތްތައް ޒަމާނާއެކު ލުއި ފަސޭހަ ގޮތްތައް ތަޢާރަފްކުރަމުން ދިއުމުގެ ނަތީޖާއެއްގެ ގޮތުން، މިހާރު އުރީދޫ އިން ދެމުންދާ ހިދުމަތުގެ ފެންވަރާއި އަގުތަކަށް ބަލާއިރު، ވާދަވެރިންނަށް ވެސް އެ ކުންފުންޏާ އެއް ހަމައެއްގައި ސާބިތުވެ ތިބުމަކީ އޮތް ގޮންޖެހުމަކަށް ވަނީ ވެފައެވެ.
ތީރު މީޑިއާގެ ފަރާތުން އުރިދޫ މޯލްޑިވްސް އަށް 17 ވަނަ އަހަރީ ދުވަހުގެ ތަހުނިޔާ އާއި މުބާރިކްބާދީ އަރިސްކުރަން.