ދުނިޔެއަކީ އަހަރެމެން ދަސްކުރަން ޖެހޭ ވަރަށްގިނަ ފިލާވަޅުތައް އަހަރެމެންނަށް ތަމްސީލުކޮށްތޭ ތަނެކެވެ. މިއީވެސް އެފަދަ ހާދިސާއެކެވެ. ޢިލްމަށް ފެން ބޮވައިގަނެފައިވާ ޒުވާނެއްގެ ވާހަކައެވެ. ޕާކިސްތާނުގެ ކަޝްމީރުގެ ސުކޫލަކަށް ކިޔަވަންދާ އުމުރުން 14 އަހަރުގެ ޕަރްވިޒް ނަމަކަށް ކިޔާ ޒުވާނެއްގެ ވާހަކައެވެ. 

އުމުރުގެ ވަރަށް ޅައިރު، ލިބުނު ކޮންމެވެސް އަނިޔާއަކާއި ހުރެ، އޭނާގެ އެއް ފައި ބުރިކޮށްލަން ޖެހުނެވެ. ކަކުލާއި ހިސާބުންނެވެ. އޭރުއްސުރެ އޭނާ ބޮޑުވަމުން އައީ ނުކުޅެދޭ ކުއްޖެއްގެ ގޮތުގައެވެ. ނަމަވެސް އޭނާގެ މައިންބަފައިން ވަނީ އޭނާގެ ދިރިއުޅުމުގެ ހުރީހަކަމެއް އެއް ފައި މަތީ ހުރެ ކުރުމުގެ ގާބިލުކަން އޭނާގެ ކިބައިގައި އަށަގަންނުވާފައެވެ. ތަންތަނަށް ދިއުމާއި ގަސްގަހަށް އެރުމާއި، ފެންވަރާ ފާހަނާ ކުރުމާއި މިހެންގޮސް ހުރިހާ ކަމެއްމެ އޭނާ އެއްފައި މަތީގައި ކުރެއެވެ.

ކަންއޮތީ މިހެންނަމެސް، އޭނާގެ ހަޔާތުގައި އުނދަގޫ ކަމަކަށް ވެގެންދިޔައީ މުޖުތަމައުގައި އޭނާ ބަލައިނުގަންނަ ނުގަތުމެވެ. ބައެއް ސުކޫލުތަކުން އޭނާ އެ ސުކޫލުތަކަށް ވައްދަން ދެކޮޅު ހެދިއެވެ. ބައެއް އެހެނިހެން ތަޢުލީމު ދޭ މަރުކަޒުތަކުންވެސް އެ ފުރުސަތު އޭނާއަށް ފަހިކޮށެއް ނުދިނެވެ. އެކަމުން ޕަރްވިޒް ގެ މައިންބަފައިން އިންތިހާއަށް ކަންބޮޑުވިއެވެ. 

އާއިލާގައި މާބޮޑު ތަނަވަސްކަމެއް ނެތްނަމަވެސް ޕަރްވިޒްގެ މައިންބަފައިން އޭނާއާއި މެދު ވަނީ އާދައިގެ ލޮއެއްބެއް ނޫނެވެ. އެއްމެ ފައެއްގެ މައްޗަށް އެމީހުންގެ ދަރިފުޅު ބޮޑުވަމުން ދިއުމާއި ބުރަ މަސައްކަތް ކުރުން އެއީ އޭނާއަށް ކުރަން އުނދަގޫވާނޭކަމެއްކަން އޭނާގެ މައންބަފައިން އޭނާއަށް ވިސްނައިދިނެވެ. އެހެންކަމުން ބާއްޖަވެރިކަމާއި އުފާވެރި ހަޔާތަޓަކަށް، ތަޢުލީމިގެ މުހިންމުކަން ޚުދު އޭނާއަށް ވެސް އިހުސާސް ކުރެވެން ފެށިއެވެ.

އުންމީދުކަނޑާ ނުލާ ކުރި މަސައްކަތުން، އެމީހުން ދިރިއުޅޭ ގެއާއި ގާތްގަނޑަކަށް 3 ކިލޯމީޓަރު ދުރުގައި ހުންނަ ސަރުކާރު ސުކޫލަކުން ޕަރްވިޒަށް ފުރުސަތު ލިބުނެވެ. މިއަދު ޕަރްވިޒް އަކީ އެ ސުކޫލުގެ ގުރޭޑް 9 ގައި ކިޔަވަމުން އަންނަ، ފާހަގަ ކޯށްލެވޭ މޮޅު ކުއްޖެކެވެ. އޭނާގެ އުމުރުން ގާތްގަނޑަކަށް 10 އަހަރުވަންދެން ސުކޫލަށް އައީ އޭނާގެ ބައްޕައާއި އެކުގައެވެ. ނަމަވެސް އޭގެ ފަހުން ޕަރްވިޒް ސުކޫލަށް އަންނަނީ އެކަންޏެވެ. އެއް ފައި މަތީގައި ހިނގާފައެވެ. ޒާތަކަށް ކޮރަމުންނެވެ. ޢިލްމުގެ މުހިންމުކަން އިހުސާސް ކުރެވި އެ ޢިލްމު ހޯދުމަށް ކެތްމަދުވެފައިވާ ޕަރްވިޒް ސުކޫލަށް އެ އަންނަނީ ގާތްގަނޑަކަށް 3 ކިލޯމީޓަރު ހިނގާފައެވެ. ނުވަތަ ކޮރާފައެވެ. އެއްފައި މަތީގައެވެ. ފޮތްތަކާއި އެކު ދަބަސްވެސް ހިފައިގެންނެވެ. 

ބައެއް ދުވަސް ދުވަހު ގަޑިޖެހެއެވެ. އެހެނަސް ޕަރްވިޒްގެ ހާލު އެންމެނަށްވެސް އެނގެއެވެ. އެހެންކަމުން، އޭނާ ގަޑިޖެހޭ އެއްވެސް ދުވަހަކު އޭނާއަށް އަދަބެއް ނުދެއެވެ. އަނެކުންގެ ހާލަތާއި އިހުސާސްތައް ދަނެގެން މަސައްކަތް ކުރުމީ އަނެކުން ނުލާހިކު އުފާވާނޭ ކަމެކެވެ. ޕަރްވިޒްގެ ކުލާހުގެ ކުދިންގެ ފަރާތުންވެސް އޭނާއަށް ވަރަށްބޮޑު އެއްބާރުލުމަކާއި އެހީތެރިކަމެއް ލިބެއެވެ. އަދި ބައެއް ކުދިންނަށް ޕަރްވިޒްގެ ފަރާތުންވެސް ތަޢުލީމީގޮތުން އެހީތެރިކަން ލިބެއެވެ.

އައިޓީ ދާއިރާއިން ކުރިއަށްދާން ބޭނުންވެފައިވާ ޕްރަވިޒް އެ ކުރާ ބުރަ މަސައްކަތަކީ އަދުގެ ޒުވާޏުން ވިސްނާލުން މުހިންމު މަސައްކަތެކެވެ. އެއް ފައި މަތީގައި ކޮރަމުން، ކޮންމެ ދުވަހަކު ގާތްގަނޑަކަށް 3 ކިލޯމީޓަރު ހުރަސްކުރަނީ ސުކޫލަށް އަންނާށެވެ. ކިޔަވާ ހިތުންނެވެ. ނަމަވެސް އަދު އަހަރެމެންގެ ދަރީނަށް ވާހާވެސް ގޮތަކީ ކިރިޔާވެސް ބައްޔެއް ވެއްޖެނަމަ، ސުކޫލަށް ދާކަށް ބޭނުމެއް ނުވެއެވެ. ދުނިޔޭގެ ބިމަށް ކެރި ކޮޅެއް ޖަހައިފިނަމަ އެދުވަހަކު ސުކޫލަށް ނުގޮސް ވޭތޯ ބަލައެވެ. ނިކަން ދެކިބަލާށެވެ. ތަޢުލީމުގެ މުހިންމުކަން އިހުސާސްކުރެވި އެ ތަޢުލީމު ހޯދުމުގެ ޝައުގުގައި އުމުރުން 14 އަހަރުގެ ޕަރްވިޒް އެ އުފުލާ ބުރަ ދެކިބަލާށެވެ. މިއީ އިބުރަތެއް ހާސިލްކުރަން ބޭނުން މީހަކަށް ރަނގަޅު ހާދިސާއެކެވެ.