ކާޅެއްގެ ދަރުބާރެއްގައޭ، ރަސް ކާޅު ހުރެ ހަމަ އިއްވިއޭ

   ކާޅެއްކަމަށް ބުނެވޭނެހޭ، ހުދުފަތް ގިނައިން ހުންނަންޏަކާ

 

ބަހުސެއް ކުރީ "ކާ ކާ" ގޮވާ، ވަސް ވާހުގާ ޖެހިގެން އެތާ

   ވަހުމެއް އުފެއްދީ އެކަމުގާ، ކުރެވުނު ބަހުސް ދިގުލަންޏަކާ

 

ރުޅިވެސް އައޭ ކާޅެއް އެތާ، ކުރެވުނު ޒުވާބުގަ ތުން ހަރާ

   ރުޅި އިސްކުރަން ދަރުބާރުގާ، ހައްދެއް ނެތޭ ނުބުނަންޏަކާ

 

އެކި ނަޒަރުތައް އެކި ކާޅުތައް، ދަރުބާރުގާ ގޮވަމުން ދިޔޭ

   އެކި ރާގު ރާގަށް ހޭރެނީ، ރާގެއް އެއަށް ނުމެވަންޏަކާ

 

ހައްދެއް ހުދޫދެއް އެއަކު ނެތް، ދަރުބާރުކަން ހިތްތަކަކު ނެތް

   ފައްކާވި ގަދަ އެ ޒުވާބުގާ، ހައްލެއް ނެތޭ ނުނިމެންޏަކާ

 

އެހެނޭ ވަނީ އިންސާނުނަސް، އަޑުގަދަ ކުރީމާ އެފަދައިން

  އެހެނޭ ކިޔަސް އިންސާނުނަށް، ވިސްނޭނެހޭ ކަނުވަންޏަކާ