މިއީ ކުޑަކުދިންނަށް ކިޔައިދޭ ވާހަކައެކެވެ. މިއީ ޖަންގަލީގެ ޖަނަވާރުން ހިމަނައިގެން ކިޔާ ހިޔާލީ ވާހަކައެކެވެ. ނަމަވެސް އަދު މި ވާހަކައިން އިބުރަތް ހާސިލު ކުރަންވީ ކުޑަކުދިންނަށް ބޮޑެތި މީހުންނެވެ. ބޮޑެތި މީހުންގެ ތެރޭގައި ވެސް ވަކިން ބޮޑެތި މަގާމުތަކުގައި ތިބި ބޮޑުންނެވެ. އެވާހަކައިގައި ވެއެވެ....
އެއްސަހަރެއްގައި އުޅުނު ހިމާރަކާއި މިނިކާވަގެކެވެ. ޖަންގަލީގެ ވަކި ހިސާބެއްގައި އުޅުނު މި ދެ ނަޖަވާރަކީ ހިސާބަކަށް އެކުވެރި ދެ ޖަނަވާރެވެ. ބުނެވޭ ގޮތުގައި މި ހިމާރަކީ ވިސްނުމެއް ބުއްދިއެއް ނެތް ގަމާރު ޖަނަވާރެކެވެ. އަޑު ހުތުރު، ކަންކަމާ ހަޑިކޮށް ޒުވާބުކޮށް އުޅޭ ޖަނަވާރެކެވެ. އެއާއި ހިލާފަށް މިނިކާވަގަކީ އެ ޖަނަވާރެއް ދެކި އެހެން ގިނަ ޖަނަވާރުތައް ޖެހިލުންވާ ޖަނަވާރެކެވެ. އެސޮރުގެ ވިސްނުން ތޫނުކަމާއި ހުސިޔާރު ކަމުންނެވެ.
އެއްދުވަހަކު މި ހިމާރާއި މިނިކާވަގު ކޯރެއްގެ އައްސޭރި ފަށުން ބައްދަލު ވިއެވެ. އެ ސަރަހައްދުގައި ބޯކޮށް ގަސްހެދި، ބިންމަތީގައި ނިވަ ހެދިފައި ހުއްޓެވެ. މި ދެ ޖަނަވާރު އެކި ވާހަކަތައް ދައްކަމުން ގޮސް ވިނައިގެ ވާހަކަ ދައްކަން ފެށިއެވެ. އެތަނުން ހިމާރު، ވިނައިގެ ކުލަ އަކީ ނޫ ކުލަ ކަމުގައި ބުންޏެވެ. ނަމަވެސް މިނިކާވަގު އެކަމާ ދެކޮޅު ހެދިއެވެ. އެހެނީ ވިނައިގެ ކުލަ އަކީ ފެހި ކުލަކަން މިނިކާވަގަށާއި އަދި އެހެން ހުރިހާ ޖަނަވާރަކަށްވެސް އިނގޭނެތީއެވެ. އެހެނަސް އެ ހިމާރު އެކަމުގެ މައްޗަށް ޒުވާބު ދޭން ފަށައިފިއެވެ. އެ ހިމާރުގެ ބަހަކަށްވީ ވިނައިގެ ކުލަ އަކީ ނޫ ކުލަ ކަމުގައެވެ.
ކޮންމެއަކަސް މި ޒިވާބު ހޫނުވެއްޖެއެވެ. ދެން މިނިކާވަގު އެދުނީ އެ ޒުވާބު ހިފައިގެން ޖަންގަލީގެ ރަސްގެފާނު އަރިހަށް ދިއުމަށެވެ. ޖަންގަލީގެ ރަސްގެފާނަކީ ސިންގާއެވެ. ޖަންގަލީގެ ރަސްގެފާނަށް އެ ޒުވާބު ހުށަހެޅުނެވެ. އެކަމުގައި ވާހަކަ ދައްކަމުން ރަސްގެފާނު، ސިންގާ ވިދާޅުވީ، އެ ޖަނަވާރަކު ގަބޫލު ކުރާނީ އެ ޖަނަވާރަކު ގަބޫލު ކުރަން ބޭނުން ކަމެކެވެ. އަދި އެކަމުގައި ހިމާރަށް ވިނައިގެ ކުލަ އަކީ ނޫކުލަ ކަމުގައި ހިމާރި ދެކޭނަމަ، އެ ކަމުގައި ހިމާރަކާއި ޒުވާބު ކުރުމެއް ނެތެވެ. އެހެންކަމުން އެ މައްސަލައިގައި އަދަބު ލިބޭނޭ ޖަނަވާރަކީ މިނިކާވަގެވެ. އެ ޝަރީއަތް ނިމުމާއި އެކު އެއްކަލަ ހިމާރު ހޭރެމުން ހޭރެމުން އުފަލުން ހުރެ ދަރުބާރުން ނުކުމެން ހިނގައްޖެއެވެ. ދެން ދަރުބާރަށް އެއްވެތިބި އެހެން ޖަނަވާރުން ރަސްގެފާނު، ސިންގާ ކުރެން، ވިނައިގެ ކުލަ އަކީ ފެހި ކުލަކަން އެންމެނަށް އިނގޭއިރު، ޚުދު ރަސްގެފާނަށްވެސް އެނގިލައްވާއިރު، ވިނައިގެ ކުލަ އަކީ ފެހިކުލަ ކަމަށް ބުނެ ޝަރީއަތަށް އައި މިނިކާވަގަށް އަދަބު ތި ދެއްވަނީ ކީއްވެތޯ ސުވާލު ކުރިއެވެ.
ރަސްގެފާނު ސިންގާގެ ޖަވާބު ވަރަށްވެސް އިބުރަތްތެރިއެވެ. ރަސްގެފާނު ސިންގާ ވިދާޅުވީ، ކާއިނާތާއި ގުރަހައިގެ ހަގީގަތާއި ދެކޮޅު ހަދާ، ބުއްދިއެއް ވިސްނުމެއް ނެތް ގަމާރު، އަދި އެހާމެ ހުތުރު އަޑުން އަސްލެއް ނެތް ކަންކަމަށް ޒުވާބުދީ ހަދާ ޖަނަވާރަކާއި ޒުވާބުކޮށް، އެ މައްސަލަ ރަސްގެފާނާއި ހިސާބަށް، ބުއްދިވެރި ހުސިޔާރު ޖަނަވާރަކު ގެނައުމީ އެ ބުއްދިވެރި ޖަނަވާރު ގެއްލުވާލި ބޭކާރު ވަގުތު ތަކެކެވެ. އެހެންކަމުން މިނިކާވަގު އެ ނަގާލި އަގުހުރި ވަގުތުތަކާއި އެ އިސްރާފު ކުރި ވަގުތު ތަކުގެ ބަދަލުގައި އެ މިނިކާވަގަށް އޭގެ އަދަބު ދިނީ ކަމަށެވެ.
މިއީ މި ވާހަކަ ކިޔާ އުޅޭ ގޮތެވެ. ލިބުނު އިބުރަތަކީ ހަގީގަތް ގަބޫލުކުރަން ބޭނުން ނުވާ މީހުން ދައްކާ ބޭކާރު ވާހަކަތަކަށް، ހަގީގަތް ގަބޫލުކުރާ މީހުން ރައްދު ނުދިނުމެވެ. އެހެނީ ގަބޫލުކުރަން ބޭނުން ނުވާ މީހާ ކިތަންމެ ވަރެއް ކުރިޔަސް އޭނާ އެކަން ގަބޫލު ނުކުރާނެތީއެވެ. އެކަމުގެ މަތީގައި ވަގުތު ނަގާލާ، އެމީހުންނަށް ރައްދު ދީ ހަދާނަމަ، އެކަމުގައި ހައްލެއް ނުލިބި، ހައްތަހާ ތިމާގެ ލޭ ހޫނުވާ ގޮތްވާނެއެވެ. އެހެންކަމުން އެފަދަ މީހުންގެ ކުރިމަތީގައި އޮތީ އަޅާނުލާ ހުރުމެވެ. އެއް އަތް ކިތަންމެ ވަރަކަށް ތެޅިޔަސް އަޑެއް ނުގޮވާނެއެވެ. އެހެން އެއްމެ އަތަކުން ތަޅާ ތަޅާ އަޑެއް ނުކިޔުމުން އެކަން ހުއްޓާލަފާނެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން