އަހަރެމެން އިންސާނުންގެ އާދައަކީ އަބަދުވެސް ކޮންމެވެސް ކަމެއް މެދުވެރިވުމުން އެކަމުގެ ހައްލު ހޯދަން މަސައްކަތް ކުރެވުމެވެ. ކުރިއާލާ، ދުރާލާ ކަންކަމަށް ހައްލު ހޯދުމަށް މަސައްކަތްކުރުން އޮންނަނީ ބުރަ ކަމަކަށް ވެފައެވެ. ވަކި ކަމެއް ނޫނެވެ. ހަމަ ކޮންމެ ކަމެއްގައިވެސް މެއެވެ. އެފަދަ ކަމެއް ހިނގާ އެފަދަ ހާދިސާތަކެއް ފެންމަތިވުމުން އެކަމުގެ ވާހަކަ ހަމަ އެންމެންވެސް ދައްކައެވެ. އެންމެންގެ ދުލު ކުރީގައި އެކަންކަމުގެ ހައްލު ވަރަށް ސާފުކޮށް އޮވެއެވެ. ނަމަވެސް އެކަމަށްވެސް ވަނީ ދުވަސްކޮޅެކެވެ. އެ ކަމެއް ވެ، ދުވަސްކޮޅަކު އެކަމުގެ ވާހަކަ އަޑުގަދަކޮށް ދައްކަފާނެއެވެ. ނަމަވެސް ފަހުން ހަނދާންނެތެއެވެ. ދެންވެސް އަނެއްކާ ހަމަ އެފަދަ ކަމެއް ތަކުރާރުވުމުން، އެވާހަކައެއް އަނެއްކާވެސް ދެކެވެއެވެ. ދެންވެސް ދުވަސްކޮޅެއްފަހުން އަނެއްކާ އެވާހަކަ ހުއްޓިދެއެވެ. މިއީ ދުނިޔޭގެ އާދައެވެ. ނަމަވެސް މިއީ އާދަވެގެން ކަން ހިންގަން ޖެހޭނޭ ގޮތް ބާއެވެ؟
އަނެއްކާވެސް މަރެއްގެ ވާހަކައެވެ. ލާއިންސާނީ އަނިޔާތަކަކާއި އެކު އަނިޔާވެރިކޮށް ކޮށާލެވިފައިވާ ދިވެހި ޒުވާން އަންހެނެއްގެ ވާހަކައެވެ. ރަހުމެއް ހަމްދަރުދީގެ ކުލުނެއް މި ބިންމަތީގައި ނެތްފަދައެވެ. އެ ޒުވާނާގެ އަނިޔާވެރި މަރާއި ގުޅިގެން އަނެއްކާވެސް، އަނެއްކާވެސް މަރަށް މަރު ހިފުމުގެ ވާހަކަ އެބަ ދެކެވެއެވެ. ވަރަށްގަދައަށެވެ. މުޅި މީސްމީޑިޔާގައި އެކަށްވެސް ފެންނަން ހުރީ އެފަދަ ޕޯސްޓް ތަކެވެ. ދިވެހިން އިންސާނިއްޔަތު އިސްކޮށް އިސްލާމީ ޝަރީއަތް ތަންފީޒު ކުރުމަށް، ދިވެހި ދައުލަތައް ގޮވާލަމުން ދަނީ ވަކި ޖިންސެއް، ވަކި އުމުރެއް ނެތިއެވެ.
ހަބަރުތަކާއި މައުލޫމާތު ފޯރުކޮށްދޭ މަންސަތަކުން އެނގޭ ގޮތުގައި މި ހިނގައިދިޔަ މަރުގެ ހާދިސާ އަކީ ފާޅުކަން ބޮޑު ގޮތެއްގައި މިރާއްޖޭގައި ފަހުގެ ތާރީހެއްގައި ހިނގާދިޔަ އެންމެ އަނިޔާވެރި އެއް މަރުގެ ހާދިސާއެވެ. އެހެންކަމުން މި ހާދިސާ ވެގެން މި ދިޔައީ ދިވެހިންގެ ލެއާއި ކުޅެލި ބިރުވެރި ހާދިސާ އަކަށެވެ. ނަތީޖާއަކަށްވީ އިސްވެ ދެންެނެވިހެން މަރަށް މަރުހިފުމުގެ ހުކުމް މިރާއްޖޭގައި ތަންފީޒުކުރުމަށް އެދި ދިވެހިން ގޮވަން ފެށުމެވެ. އާދޭހެވެ! މީގެ ކުރިންވެސް ދިވެހިން މި ވާހަކަ ދެއްކިއެވެ. ކޮންމެ ފަހަރަކުވެސް ކޮންމެވެސް މަރެއްގެ ހާދިސާއަކާއި ގުޅުވައިގެންނެވެ. ހަމަ މިހާ ގަދައަށް މިހާ ބާރަށް އެވާހަކަ ދެކެވެއެވެ. ނަމަވެސް މީގެ ކުރިންވެސް ވެފައިވާ ގޮތަކީ ދުވަސްކޮޅަކު އެވާހަކަ ދެކެވިފައި، ދެން ފަހުން އެކަމާ އަޅާލާނޭ މީހަކު ނުވުމެވެ. އެންމެންވެސް ހިތުން އެދެއެވެ. ނަމަވެސް ނުމެ ބުނެވެއެވެ.
ވިސްނާލާށެވެ! މާޒީން ލިބުނު އިބުރަތަކީ މިފަހަރު މި ދެކެވޭ ވާހަކަތައްވެސް ވެގެންދާނީ ހަމަ ފޫނެއް ފަޔަކަށް އަޅާ ފެންތަކެއް ކަމަަށެވެ. އެތައް ބަޔަކު އެތައް ގޮތަކުން އެ ފަޔަށް ފެން އަޅައެވެ. ފުލެއް ނެތުމުން ހަރުލާ ގޮތެއް ނުވެއެވެ. ދެން އެއްބަޔަކު ވަރުބަލިވެ، އަނެއްބަޔަކު ފޫހިވެ، ދެންތިބި ބަޔަކު ހަނދާންނެތިގެން ފެން އެޅުން ހުއްޓިދެއެވެ. ނަމަވެސް މިއީ މިކަން ވާން ޖެހޭނޭ ގޮތެއް ނޫނެވެ.
ދިވެހި ގައުމުގައި މަރަށް މަރު ނުހިފެންވީ ކީއްވެތޯއެވެ؟ މިއީ ސައްތައިންސައްތަ އިސްލާމީ ގައުމެއް ކަމަށް ޒަމާނުއްސުރެ ދިވެހިން ގަބޫލު ކުރަމުއެވެ. މިފަދަ އިސްލާމީ ގައުމެއްގައި މިފަދަ އިސްލާމީ ޝަރުއީ ހުކުމެއް ތަންފީޒު ނުވާންވީ ހަމަ އެއްވެސް ސަބަބެއް ނެތެވެ. ނަމަވެސް މިކަމުގައި އުޅޭ ބައެއް މީހުންގެ ވާހަކަތަކުގައި ދިވެހިރާއްޖޭގެ ޝަރުއީ ނިޒާމުގެ ހަރުދަނާކަން ކުޑަކަމުން، މަރަށް މަރު ހިފަން ޖެހިލުންވާ ކަމަަށް އެބަ ބުނެއެވެ. ނުހައްގުން މީހެއްގެ މައްޗަށް މަރު ސާބިތުކޮށް ނުހައްގުން އޭނާއަށް އަދަބު ދެވިދާނޭކަމަަށް ބައެއްމީހުން އެބަ ހީކުރެއެވެ. ނަމަވެސް މިއީ މިކަމަށް މަގުބޫލު އުޒުރެއްތޯއެވެ؟ އަދި ކިއެއް މިއީ އިސްލާމީ ޝަރީއަތް ތަންފީޒުނުކުރަން އޮތް އުޒުރެއްވެސް ނޫނެވެ. ޝަރުއީ ނިޒާމަށް އިތުބާރު ނުކުރެވޭނަމަ، އިތުބާރު ކުރެވޭ ވަރު ކުރާށެވެ. އެއަށްފަހުގައި ނަމަވެސް އޮތީ އިސްލާމީ ޝަރީއަތް ތަންފީޒުކުރުމެވެ.
އަހަރެމެންނަށް ގަބޫލު ނުކުރެވުނު ނަމަވެސް އެކަމާ ހައިރާންވާކަށް ނުޖެހެއެވެ. އަހަރެމެންނީ އަހަރެމެންގެ ވެރި އިލާހު ހަލްގުކުރެއްވި މަހުލޫގުންތަކެކެވެ. އެ އިލާހު ފުރިހަމަ ކުރެއްވި ދީނިގެ ހުކުމެއްގެ ސަބަބުން ކަމެއް ގޯސްކޮށް ހިނގައިދާނޭކަމަށް އިންސާ ހީކުރުމަކީ އިންސާނާގެ ބުއްދިއެއް ވިސްނުމެއް ނެތްކަމެވެ. އެހެންކަމުން އެފަދަ ހަރުދަނާ ހުކުމްތަކުގެ މައްޗަށް އިންސާނާގެ މި ނިކަމެތި ވިސްނުން އިސްކޮށް ކުޑައިމީސް ބަސްބުނުމަކީ ކޮށްގެންވާނޭ ކަމެއް ނޫނެވެ. ހަމަ ގައިމު އެނގޭހާވެސް ކަމަކީ އިންސާނުން އުފެއްދެވި ފަރާތައް އިންސާނުންގެ ތެރޭގައި ހިނގާ ކަންކަން ހައްލުކުރެއްވުމުގެ ފުރިހަމަ ޤާބިލުކަން މިލްކުވެ ވޮޑިގެންވާނޭ ކަމެވެ. މާތް ﷲ އީ މޮޅަަށް ދެނެވޮޑިގެންވާ ހުރިހާކަމަކަށް ކުޅަދުންވަންތަ އިލާހެވެ.
ކުރިއެކޭ އެއްފަދައިން މިއަދުވެސް މަރަށް މަރުހިފުމުގެ ވާހަކަ އެބަ ދެކެވެއެވެ. އުންމީދަކި އެކަން ތަންފީޒުވެގެން ދިއުމެވެ. އަނެއްކާވެސް، އަނެއްކާވެސް އަޑުގަދަކޮށް ހަނދާންނެތި ދާ ކަމަކަށް މިކަން ނުހަދާށެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން