އިންސާނާޔާ އެންމެ ދުރުގައި އަދި އެންމެ ގާތުގައި ވެސް ވަނީ މަރެވެ. ދުނިޔެއަށް އުފަންވި ކޮންމެ އެއްޗެއް މަރުވުން އެއީ އިންކާރު ނުކުރެވޭ ޙަޤީޤަތެކެވެ. އުފަންވުމަކައިނުލައި އުފެދިފައިވާ ކޮންމެ އެއްޗެއް ވެސް ފަނާވެ ނެތި ހަލާކުވެދާނެކަން ބަޔާން ކުރައްވައި މާތްﷲ ވަޙީކުރައްވައިފައިވެއެވެ.｛كُلُّ مَنْ عَلَيْهَا فَانٍۢ｝ (ރަހުމާން ސޫރަތް: 26) މާނައީ: "އެ ބިންމަތީގައިވާ ކޮންމެ އެއްޗަކީ، ފަނާވެދަނިވި އެއްޗެކެވެ."

މި ޙަޤީޤަތަށް ދަލީލުކުރާ އެތައް ކަމެއް ރެއާދުވާލު އިންސާނާގެ ލޯމަތި ތަމްސީލުވެއެވެ. އިރުގެ ދައުރުވުން އެއީ އެންމެ ފުރަތަމަ ދަލީލެވެ. ކޮންމެ ދުވަހަކު މުޅި ދުނިޔޭގެ ޖައްވު ދުވާލުގެ މަސައްކަތަށް އަލިކުރުވަން އަންނަ "އިރަށް" މާގިނަ ވަގުތަކު އޭގެ ވަޒީފާގައި ދެމި ނުހުރެވެއެވެ. ދުވާލުގެ ވަގުތު ނިމޭއިރަށް އުދަރެހުން އިރު އޮއްސެއެވެ. އަނެއްކާ ވެސް އަނެއް ދުވަހު މި މިސާލު އިންސާނާގެ ލޯމަތީ ތަކުރާރުވެއެވެ.

ގަސްގަހާގެއްސަކީ ވެސް މަރު ހަނދުމަކޮށްދޭ އަނެއް ތަމްސީލެވެ. ބިންގަނޑަށް ވާރޭފެން ލިބި އެ ބިމުން ފަޅާ ކުދި ނިރު ފޯދި ހެދިބޮޑުވަނީ އެއަށް ކަނޑައެޅިފައި އޮންނަ މިޤްދާރާ އެއްގޮތަށެވެ. ދުވަސްކޮޅަކުން އެ ތަކެތީގައި ގޮވާން އާދެއެވެ. އެ ގޮވާން ކަނޑާހައިނުވަނީސް ގަސްތައް ރީނދޫވެ ހިކެންފަށައެވެ. އަދި އިސާހިތަކު ގަސްތައް މަރުވެ ބިންމައްޗަށް ވެއްޓެއެވެ. ދެން އެ ބަދަލުވަނީ ހިކި ހުޔަށެވެ. މި މިސާލުން ހަނދުމަކޮށްދެނީ މަރެވެ.

އިންސާނާގެ އަޖަލު އައިސް ޖެހުމުން އިތުރު އެއްވެސް މުހުލަތަކަށް މަޑެއް ނުކުރެވޭނެ އެވެ. އަދި އޭގެ ވަގުތަށްވުރެ ކުރިން ވެސް އެ މަރު ބައްދަލުނުކުރާ ހުއްޓެވެ. މަރު އޭގެ ބަރާބަރު ވަގުތުގައި ހިތްޕެވުމަށް މާތްﷲ ވަނީ ملك الموت އަށް އަމުރުކުރައްވައިފައެވެ. މި އަމުރަށް އެ މަލާއިކަތާ ފުރިހަމައަށް ކިޔަމަންތެރިވެވަޑައިގަންނަވައެވެ. މާތްﷲ ވަޚީކުރައްވައިފައިވެއެވެ.｛قُلْ يَتَوَفَّىٰكُم مَّلَكُ ٱلْمَوْتِ ٱلَّذِى وُكِّلَ بِكُمْ ثُمَّ إِلَىٰ رَبِّكُمْ تُرْجَعُونَ｝(ސަޖިދަ ސޫރަތް: 11) މާނައީ: "ކަލޭގެފާނު ވިދާޅުވާށެވެ! ތިޔަބައިމީހުންގެ މަރު ހިއްޕެވުން ހަވާލުކުރައްވައިފައިވާ ملك الموت ތިޔަބައިމީހުންގެ މަރު ހިއްޕަވާނެތެވެ. ދެން ތިޔަބައިމީހުން ރުޖޫޢަކުރައްވާހުށީ، ތިޔަބައިމީހުންގެ ވެރިރަސްކަލާނގެ ޙަޟްރަތަށެވެ."

އަޅުގަނޑުމެން ކޮންމެ ވަގުތެއްގައި ވެސް މަރާ ބައްދަލުކުރަން ޖެހިދާނެ އެވެ. ވީމާ މަރަށް ތައްޔާރުވެ ތިބޭށެވެ! މަރަށް ތައްޔާރުވެ ތިބުމަކީ ގެންދާން އައި ކޮންމެ ވަގުތެއްގައި ދެވޭގޮތަށް ހުރުމެވެ. ބުއްދިވެރިންނަކީ ޙަޔާތުގެ ދަތުރަށް ދަރުކޮއްތުގެ ގޮތުގައި ތަޤުވާވެރިކަން ހޯދާ މީހުންނެވެ. ފޭރާމުން އުނުއޮރިޔާން ނިވާކުރާ ފަދައިން ތަޤުވާގެ ލިބާހުން ހިތުއޮރިޔާން ފޮރުވާ މީހުންނެވެ. ހިތްސާފުކުރާ މީހުންނެވެ. ނަފުސުގެ އެދުން ދުރުކުރާ މީހުންނެވެ. މާތްﷲ އަށް އަޅުކަން ކުރުމުގައި އެހެން އެއްވެސް ފަރާތެއް ބައިވެރި ނުކުރާ މީހުންނެވެ. ހެޔޮ ޢަމަލު ކުރުންމަތީ ދެމިތިބޭ މީހުންނެވެ. އެފަދަ ބަޔަކު ކަމުގައި އަޅަމެން ލައްވާށިއެވެ!

 

(ގެންދާން އައި ކޮންމެ ވަގުތެއްގައި ދެވޭގޮތަށް ހުންނާށެވެ! - އައްޝެއިޚް މުޙައްމަދު އަފްޟަލް؛ ދީނުގެ މަގު އަދަދު 32, ޞ.1 - 05 އޯގަސްޓް 2022)