ހަޔާތުގެ ސަފްހާތައް އުކަމުން ގުނަމުން ދާއިރު، ދެމީހެއްގެ ސަފްހާތައް އެއްގޮތެއް ނުވާނެއެވެ. އެހެނީ ކޮންމެ މީހަކީވެސް ވަކި ޝަހުސަކަށް ވާތީއެވެ. އެކަން އަހަރެމެން ގަބޫލުކުރާނަމަ، މި ދުނިޔޭގައި އެކަކު އަނެކަކާއި ދެމެދު ޖެހޭ އެކި އެކި މައްސަލަތައް ހައްލުވީހެވެ. ނަމަވެސް އަހަރެމެންނަށް ވާހާވެސް ގޮތަކީ އަބަދުވެސް ތިމާގެ ނަޒަރުން ކަންކަމާއި މެދު ވިސްނުމެވެ. ކަންކަމާއި މެދު ދެކޭ ގޮތް، ހަމަ އެކަނި ތިމާގެ ނަޒަރުން މިނާތީއެވެ. މިފަދަ ކިތަންމެ "ތިމާއެއް" ތިބޭނެއެވެ. އެއިން ކޮންމެ މީހެއްގެ ހިޔާލަކީވެސް ތަފާތު އެއްޗެކެވެ. އެކަން އަހަރެމެން ގަބޫލުކުރަން ޖެހެއެވެ.
ފެންނަ މަންޒަރަކަށް އަހަރެމެންގެ އެންމެން ނަޒަރު ހުއްޓުނަސް، އެ މަންޒަރު އެކި މީހުންނަށް ތަސްވީރުވާނީ އެކި ގޮތަށެވެ. އެމަންޒަރުގެ ކުލަތަކާއި އެ މަންޒަރުގައި ހުރި އެއްޗެހިތައް އެއް ގޮތް ވީނަމަވެސް، އޭގެ މަފްހޫމު އެންމެންގެ ތަފާތުވެދާނެއެވެ. އެހެނީ ކޮންމެ މީހަކުވެސް ވިސްނާނީ އެމީހެއްގެ ސިކުނޑި ދެއްކި މަގަކުން ކަމަށްވާތީއެވެ.
ނިކަން އާދައިގެ، އެހެނަސް އޭގެ މަފްހޫމު ބޮޑު މިސާލަކަށް ބަލައިލަމާ ހިނގާށެވެ. ގަހަކުން ދޮންވެގެން ވެއްޓޭ މޭވާ އެކެވެ. އެ މޭވާ ވެއްޓޭ މަންޒަރު އަހަރެމެން ކިތަންމެ ފަހަރަކު ދެކެމެވެ. އެ މޭވާގެ ދަނޑުން ވަކިވެން، ގަހުގެ ފަތްތަކުގެ ތެރެއިން އޮފިތަކުގައި ޖެހެމުން އެ މޭވޭ ގޮސް ވެއްޓެނީ ބިންމައްޗަށެވެ. މިކަމުގައި އާދަޔާ ހިލާފު ކަމެއް ނުހިނގާތާއެވެ. އަދި މިކަމުގައި ދެން ވިސްނަންވީ ވަރު އަޖައިބު ކަމެއްވެސް ނުހިނގާތާއެވެ. ނަމަވެސް މި މަންޒަރު އެހެން ނަޒަރަކުން ދެކޭ މީހުނަށް ފަހުމްވާނޭ ވަރަށްގިނަ ކަންކަން އެބަހުއްޓެވެ. އިސްހާގް ނިއުޓަން ނަމަކަށް ކިޔުނު ސައިސުވެރިއަކީ މިފަދަ މީހެކެވެ. ގަހަކުން ވެއްޓުނު އާފަލެއް، އޭނާއަށް ބުނެދިނީ އެހެން ވާހަކަ އެކެވެ. ގްރެވިޓީ އޭ ނުވަތަ ބިމަށްދަމާ ބާރޭ އަހަރެމެން މި ކިޔާ އެއްޗެއް އެންމެ ފުރަތަމަ އިލްމީ ގޮތުން ހޯދީ މިބުނާ ނިއުޓަން އެވެ. އެއީވެސް އޭގެ ކުރިން އާދަވެ މި ދުނިޔޭގައި ހިނގަމުން އައި ކަމަކަށް އިންސާނެއްގެ ސިކުނޑި ތަފާތު ނަޒަރަކުން ވިސްނާލުމުން ވީ ގޮތެކެވެ. އިސްހާގް ނިއުޓަންގެ ކުރިން މި ދުނިޔޭގައި ޖީލުތަކެއް އުޅެ ނެތި ގޮސްފައިވާނެތާއެވެ. ދުނިޔޭގައި ގަހެއް ހެދުނީއްސުރެ އެ ގަހެއްގައި އަޅާ މޭވާ، ދޮންވެ ތަނޑުން ވަކިވެ ބިމަށް އެބަ ވެއްޓޭތާއެވެ. ނަމަވެސް ނިއުޓަންގެ ކުރިން އެމަންޒަރު އެހެން ނަޒަރަކުން ދުށް މީހަކު ނެތެވެ. ނަމަވެސް އެ މަންޒަރު ހަމަ އެގޮތަށް އެތައް ބަޔަކަށް ފެންނާނެތާއެވެ. ނިއުޓަންއަށް އެމަންޒަރު ފެނުނު ނަޒަރުން އުފެދުނީ އިންސާނުންނަށް އަލަަށް ހޯދައިގަނެވުނު އިލްމެއްގެ ފެށުމެވެ.
ދަންނަވަން މިއުޅޭނީ ތަފާތު ނަޒަރުތަކުން ކަންކަމާއި މެދު ވިސްނޭނަމަ، ކަންކަމުގެ ހައްލު ފެންނާނެ ވާހަކައެވެ. އެއީ އެ ނަޒަރުތަކަށް އަނެކުން އިހްތިރާމް ކުރާނަމައެވެ. ތިމާގެ ނަޒަރު ނޫން އެހެން ނަޒަރު ތަކަކީ ބާތިލު ނަޒަރުތަކަކާއި ވިސްނުންތަކެއް ކަމަަށް ދެކުމީ ކޮންމެހެން ތިމާގެ މޮޅުކަން ހާމަވާ ކަމެއް ނޫނެވެ. އެއިން އެނގެނީ ތިމާގެ ހިތުގައި އެހެން ނަޒަރުތަކަށް އިހްތިރާމްކުރުމުގެ ރީތި ސިފަ އަދި އަހުލާގު ނެތްކަމެވެ. އެހެން ކަމުން އަބަދުވެސް އަނެކުންގެ ނަޒަރަށް އިހްތިރާމް ކުރާށެވެ. އަދި އެންމެ ކަމަކާއި ދޭތެރޭގައިވެސް އެކި ނަޒަރުތަކުން ވިސްނޭތޯ ބަލާށެވެ!
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން