އެސްޓީއޯ އިން 7 ލީޓަރުގެ މެޓެކްސް ނިޕޯން ޕެއިންޓް ތަޢާރަފްކޮށްފިއެވެ.
އެސްޓީއޯ ކޮންސްޓްރަކްޝަންގައި މިއަދު ބޭއްވި ހާއްސަ ރަސްމިއްޔާތެއްގައި ނިޕޯން ޕެއިންޓްގެ މި އުފެއްދުން އިފްތިތާހުކޮށްދެއްވާފައިވަނީ އެ ކުންފުނީގެ ސީއީއޯ އަދި އެމްޑީ ހުސެއިން އަމްރު އެވެ.
މި ރަސްމިއްޔާތުގައި ނޫސްވެރިންނާ ވާހަކަދައްކަވަމުން އަމްރު ވިދާޅުވީ މިއަދު ތަޢާރަފްކުރީ ނިޕޯން ޕެއިންޓްގެ މުޅިން އާ ޕްރޮޑަކްޓެއް ކަމަށާއި، މީގެ ސަބަބުން މިހާރު ކުރިމަތިވާ ވަރަށް ގިނަ ދަތިތަކަށް ހައްލު ލިބިގެންދާނެ ކަމަށެވެ.
އަމްރު ވިދާޅުވީ މެޓެކްސް ނިޕޯން ޕެއިންޓަކީ ތަފާތު ކުލަތައް މިކްސް ކޮށްފައި ހުރި ޕްރޮޑަކްޓެއް ކަމުން ރާއްޖޭގެ އެހެން ރަށްރަށުގައި ވެސް ކުލައިގެ ސަބަބުން ދިމާވާ ދަތިތައް ހައްލުވެގެންދާނެ ކަމަށެވެ.
އަމްރު އިތުރަށް ވިދާޅުވީ، އެ ކުލަ އަކީ އިގްތިޞާދީ ގޮތުން ވެސް ރަނގަޅު ކުލައެއް ކަމަށާއި، އެ ކުންފުނިން މިހާރު ވިއްކަމުން އަންނަ ކުލަ އަށް ވުރެ އަގު ވެސް ހެޔޮވާނެ ކަމަށެވެ. އެގޮތުން، ލީޓަރަކުން 40 ރުފިޔާ އަގުހެޔޮވާނެ ކަމަށް ވެސް އަމްރު ފާހަގަކުރެއްވިއެވެ.
އެސްޓީއޯ އިން އެތައް އަހަރެއް ކުރިން މާކެޓް ކުރަމުން އަންނަ ނިޕޯން ޕެއިންޓް އަކީ ރާއްޖޭގެ ގިނަ ބައެއްގެ އިތުބާރު ލިބި، މަގްބޫލްކަން ހޯދާފައިވާ ބްރޭންޑެކެވެ.