މޯލްޑިވްސް ބްރޯޑްކާސްޓިން ކޮމިޝަނުން (ބްރޮޑްކޮމް) ބާއްވާ ފުރަތަމަ ބްރޯޑްކާސްޓިން އެވޯޑުގެ ޑިޖިޓަލް ޕާޓްނަރަކަށް އުރީދޫ މޯލްޑިވްސް ހަމަޖައްސައިފިއެވެ.
ޑިޖިޓަލް ޕާޓްނަރެއްގެ ގޮތުގައި އުރީދޫ ހަމަޖައްސާފައިވަނީ މޯލްޑިވްސް ބްރޯޑްކާސްޓް އެވޯޑްގެ ސްޕޮންސަރުންނާއެކު އެކަމުގެ އެއްބަސްވުމުގައި ސޮއިކުރުމަށް ބޭއްވި ހާއްސަ ރަސްމިއްޔާތެއްގައެވެ.
މި ހަފްލާގައި އުރީދޫގެ ފަރާތުން އެއްބަސްވުމުގައި ސޮއިކުރެއްވީ އުރީދޫ މޯލްޑިވްސްގެ ސީނިއަރ މެނޭޖަރ ބްރޭންޑް އެންޑް މާކޮމްސް ނޫރާ އިބްރާހިމް ޒާހިރު އެވެ. އަދި ބްރޮޑްކޮމްގެ ފަރާތުން ސޮއިކުރެއްވީ އެ ކޮމިޝަންގެ ރައީސާ މަރިޔަމް ވަހީދާ އެވެ.
ބްރޮޑްކޮމް އިން ދިނުމަށް ނިންމާފައިވާ، "މޯލްޑިވްސް ބްރޯޑްކާސްޓް އެވޯޑްސް 2022" އަކީ ރާއްޖޭގެ ބްރޯޑްކާސްޓިން ދާއިރާގެ މަސައްކަތްތައް ފާހަގަކޮށް، އެ މަސައްކަތްތައް އިތުރަށް ތަރައްޤީކުރުމަށް ހިތްވަރުދިނުމުގެ ގޮތުން ތަޢާރަފްކުރި އެވޯޑެކެވެ.
މި ފަހަރުގެ އެވޯޑްގައި ހިމެނެނީ ތިން އެވޯޑް ކެޓަގަރީއެކެވެ. އެއީ އިންޑަސްޓްރީ، ޖާނަލިޒަމް އަދި ޕްރޮޑަކްޝަން އެވޯޑް ކެޓަގަރީ އެވެ. ކޮންމެ ދާއިރާއަކުން ވެސް ވަކިވަކި އެވޯޑްތަކެއް ވަނީ ތަޢާރަފްކޮށްފައެވެ.
އެ ކޮމިޝަނުން ބުނިގޮތުގައި އެ އެވޯޑަށް ކުރިމަތިލާން ހުޅުވާލުމުން 170 ހުށަހެޅުން ލިބިފައިވެއެވެ.