ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ވިއްކާ ތެލުގެ އަގު މިއަދުން ފެށިގެން ހެޔޮ ކޮށްފިއެވެ.
ރާއްޖެ އަށް އެންމެ ގިނަ އިން ތެޔޮ އެތެރެކޮށް ވިއްކާ އެސްޓީއޯ އިން ވަނީ އެ ކުންފުނީގެ ސަބްސިޑިއަރީ ކުންފުނި ފިއުލް ސަޕްލައި މޯލްޑިވްސް (އެފްއެސްއެމް)ގެ ޝެޑްތަކުން މިއަދުން ފެށިގެން ޕެޓްރޯލް ލީޓަރެއް ވިއްކާނީ 15.97ރ. އަދި ޑީސަލް ލީޓަރެއް 16.32ރ. އަށެވެ.
މިއީ ރަޝިއާ-ޔޫކްރޭން ހަނގުރާމަ ފެށުނު ފަހުން ވޭތުވެދިޔަ ހަތް މަސްދުވަހުގެ ތެރޭގައި ރާއްޖެއިން ތެލުގެ އަގު ހެޔޮ ކުރި ފުރަތަމަ ފަހަރެވެ.
އެސްޓީއޯ އިން މިދިޔަ ޖޫން މަހުގައި ތެލުގެ އަގުބޮޑުކުރިއިރު އޭރު ޕެޓްރޯލް ލީޓަރެއް 16.55ރ. ވިއްކަމުންދިޔައިރު، ޑީސަލް ލިޓަރެއް ވިއްކީ 16.77ރ. އަށެވެ.
އެހެންކަމުން މި ފަހަރު އެސްޓީއޯ އިން ތެލުގެ އަގަށް ގެނައި ބަދަލުގެ ސަބަބުން ރާއްޖޭގެ ބާޒާރުގައި ޕެޓްރޯލް ލީޓަރަކުން 58 ލާރި އަދި ޑީސަލް ލީޓަރަކުން 45 ލާރި ކުޑަވެގެންދާނެ އެވެ. މިއާއެކު، ރާއްޖޭގެ ބާޒާރުގައި ތެލުގެ އަގު މިވަނީ 4 އިންސައްތަ އަށް ދަށަށް ގޮސްފައެވެ.
މިހާތަނަށްއައިއިރު ދުނިޔޭގެ ބާޒާރުގައި ތެލުގެ އަގު އިންތިހާ އަށް ބޮޑުވަމުންއައިއިރު ރާއްޖޭގައި އެ ނިސްބަތުން ތެލުގެ އަގު އިތުރުކޮށްފައެއްނުވެއެވެ.
މިއަހަރު ފެށުނު އިރު ޕެޓްރޯލް ލީޓަރެއް ވިއްކަމުން ދިޔައީ 11.16ރ. އަށެވެ. އަދި ޑީސަލް ލީޓަރެއް ހުރީ 11.84ރ. ގައެވެ.