އަހަރެމެން އިންސާނުންގެ ޠަބީއަތުގައި ބައެއް މީހުންނަކީ ދަތުރުފަތުރު ކުރާ ހިތްވާ މީހުންނެވެ. އެއްތަނުން އަނެއް ތަނަށް، އެއް ރަށުން އަނެއް ރަށަށް، އެއްގައުމުން އަނެއް ގައުމަށެވެ. މިފަދައިން ދަތުރުކުރާ މީހުން ދުނިޔެ ދެކޭ ހިތްވެއެވެ. ތަފާތު ސަގާފަތްތަކާއި ތަފާތުކަންކަން ތަޖުރިބާ ކުރާ ހިތްވެއެވެ. މިއީ ހަގީގަތުގައި ވަރަށްވެސް މޮޅު، އަދި އެހާމެ ފައިދާކުރަނިވި ކަމެކެވެ. އެއީ އެ ދަތުރުތަކުގެ ބޭނުން ހެޔޮގޮތުގައި ހިފި މީހަކަށެވެ.

މިފަދައިން ގިނައިން ދަތުރުކޮށް އުޅޭ މީހުންނަށް، "ފޮނި" މީހުންނޭ، "ބޮޑާ" މީހުންނޭ ބައެއް މީހުން ބުނެއެވެ. އަދި ފައިސާ ގިނަވެ އެއަށް ހަދާނޭގޮތެއް ނޭނގިގެން އުޅޭ މީހުންނޭވެސް ބުނެވޭތަން އެބަ އާދެއެވެ. އާދޭހެވެ! އެފަދައިން ފިނިވެ، ބޮޑާވެ އަދި ފައިސާ ގިނަވެ، ހަދާނޭ ގޮތެއް ނޭނގި، ދަތުރުތަކަށް ހަރަދު ކުރާ މީހުންވެސް އަހަރެމެންގެ ތެރޭގައި އުޅެއެވެ. ހަމަ އެކަނި ހިތްހަމަ ޖެހުމާ އުފާ ހޯދާލުމަށް ބޭރުގެ ދުރު ކަރަތަކަށް އަވަސް އަވަހަށް ދަތުރުކޮށް އުޅޭ މީހުން އުޅެއެވެ. އެއީކީ މުޅިން ރަނގަޅު ގޮތެއް ނޫނެވެ. އެހެނީ ހިތްހަމަ ޖެހުމާ އުފާކުރުމާ އަދި މަޖާކުރުމުގެ އިތުރުން، އެހެން ފައިދާހުރި ކޮންމެވެސް ކަމެއް އެއިން ކޮންމެ ދަތުރެއްގައި ހާސިލް ކުރަންވާނެއެވެ. ދުނިޔެ ދަސްވާނީ ދަތުރުކޮށްގެންނޭ ބުނަނީ، އެ ދަތުރުތަކުގެ މަގުސަދަށް ރިއާޔަތްކޮށްގެންނެވެ.

ދުނިޔޭގައި ދަތުރުކޮށް އުޅުމަކީ އެތައް ކަމެއް ފެނި، އެތައް އައު ކަމެއް ތަޖުރިބާ ކުރެވިދާނޭ ކަމެކެވެ. ތަފާތު އެކު މާހައުލުތަކާއި ތަފާތު އެކި ސަގާފަތްތަކާއި ތަފާތު މިޒާޖުގެ ތަފާތު ނަސްލުގެ ތަފާތު މީހުންނާއި ތަންތަން ފެންނާނެއެވެ. އެފަދަ ކޮންމެ ކަމަކީ އެކަމަކުން ހަޔާތުގެ ކޮންމެވެސް ފިލާވަޅެއް ލިބިދީ ދަސްވާނޭ ކަމެކެވެ. ނަމަވެސް އެއީ އެކަމުގެ މައްޗަށް ވިސްނުން އިސްކޮށް، ބުއްދިވެރިކަމާއެކު ފިކުރު ކުރާނަމައެވެ.

އެނގޭހެއްޔެވެ! ރާއްޖޭގެ އެއް ރަށުން އަނެއް ރަށަށް ކުރާ ކުރު ނުވަތަ ކުޑަ ދަތުރެއް ނަމަވެސް އެ ދަތުރެއްގެ މައްޗަށް ދަތުރުނާމާއެއް ލިޔެވިދާނެއެވެ. މިއީ އެ ދަތުރަކާއި ގުޅުންހުރި ހުރިހާ ވާހަކައެއް ހިމެނޭ ލިޔުމެކެވެ. އެހެން އިބާރާތަކުން ދަންނަވާނަމަ މިއީ އެ ދަތުރެއްގެ ޔައުމިއްޔާއެވެ. މިއީ ފަހުން ކިޔޭނޭ ގޮތަށް ލިޔެވިފައިވާނަމަ، އޭގެ ފައިދާ ޖީލުތަކަށް ކުރާނޭ ކަމެކެވެ. ދުނިޔެ ދަސްކުރުމުގައި މިފަދަ ދަތުރުނާމާތަކުގެ ބޭނުން ވަރަށްވެސް ބޮޑެވެ.

ޒަމާންބަދަލުވެ، މިއަދު ދަތުރުނާމާތަކަކީ ލިޔެ އުޅޭ އެއްޗަކަށް ނުވެއެވެ. ނަމަވެސް ވީޑިއޯކޮށް، ރިކޯޑު ކުރުމަކީ މިއަދު އާންމު ކަމެކެވެ. ފޮޓޯނަގާ ރައްކާކުރުމަކީ މި ޒަމާނުގައި ފަސޭހަ އަދި ރީތި ކަމެކެވެ. ފަހުން އެ ހަނދާންތައް އައުކުރުމަށް ނުލާހިކު ލުއި ގޮތެކެވެ. 

މި ހިސާބުން ދަތުރުނާމާ ލިޔުމާއި ވީޑިއޯކޮށްފައި ހުރުމާ، އެ ދަތުރަކުން ދަސްކުރާނޭ ފިލާވަޅުތަކުގެ މައްޗަށް ބަލާލާނަމެވެ. ވީޑިއޯކޮށްފައިވާނަމަ، އެ މަންޒަރުތަކުގެ ތަމްސީލު އޮންނާނީ ވީޑިއޯގައި އޮތް ގޮތަކަށެވެ. އެކަމުގެ މައްޗަށް ހިޔާލު ކުރުމެއް އެ ވީޑިއޯ ބަލާ މީހަކަށް ނޯވެެެއެވެ. އޭނާގެ އަމިއްލަ ސިކުންޑިން ވިސްނާ ހިޔާލަށް ސިފަކުރުމުގެ ފުރުސަތެއް ނޯވެއެވެ. މިކަމުގެ ސަބަބުން ތަފާތު ހިޔާލުތައް އުފަންވުމާއި، ތަފާތު ނަޒަރުތަކުން ތަފާތުކޮށް ވިސްނުމުގެ ގާބިލުކަން އިންސާނާގެ ކިބައިން ނެތި ދެއެވެ. ނަމަވެސް ލިޔެފައިވާ ލިޔުމެއް ކިޔާ މީހަކަށް، އޭނާގެ އަމިއްލަ ސިކުނޑިން ވިސްނާ އޭނާގެ ސިކުނޑީގައި އެ މަންޒަރުތައް އޭނާ ބޭނުން ގޮތަކަށް ތަސްވީރު ކުރާނެއެވެ. މިހެންވުމުން ލިޔެފައިވާ އެންމެ ޖުމުލައެއް، ތަފާތު އެކި މީހުން ކިޔާނަމަ، އެ ޖުމުލައެއް ވިސްނާ، ސިފަ ކުރާގޮތް ތަފާތު ވާނެއެވެ. ސިފަ ކުރާ ތަކެއްޗާއި ކުލަ އާއި މާހައުލު ތަފާތުވާނެއެވެ. މިއީ އައު ވިސްނުން އުފެދި، އައު ކަންކަން ހޯދުމަށް އިންސާނާގެ ސިކުނޑިއަށް ލިބޭ ވަރަށްބޮޑު ހިތްވަރެކެވެ.

ދަތުރު ކުރުމުން ދުނިޔެ ދަސްވެ، ހަޟާރަތްތައް ކުރިއަރާ ދަނީ މިފަދަ ސައްޔާހުންގެ ލިޔުންތަކުންނެވެ. އެކި ނަޒަރު ތަކާއި ފަލްސަފާތައް އީޖާދުވަމުން ދަނީ ލިޔުންތަކުގެ މައްޗަށް އަމިއްލައަށް ހިޔާލު ކުރެވޭތީއެވެ. ނަކަލު ކުރުމާ ފުދިގެން ތިބުން ދޫކޮށްލައިގެންނެވެ.