ހާސްކަމާއި ނުތަނަވަސްކަމަށް އަހަރެމެން އަބަދުވެސް ހައްލެއް ބޭނުން ވެއެވެ. އެ ހައްލަކީ ހާސްކަމާއި ނުތަނަވަސްކަން ތަހައްމަލު ކުރާ މީހަކަށް އެމީހެއްގެ ދިރިއުޅުމައިގެން ކުރިއަށް ދިއުމުގައި ވަރަށްވެސް މުހިންމު ކަމެކެވެ. ހާސްކަން ވެރިވެ ނުތަނަވަސްވާ މީހެއްނަމަ، އޭނާގެ އުޅުމާއި ގުޅުމަށް ބަދަލުތަކެއް ގެއްނަން ޖެހެއެވެ. މި ލިޔުމުގައި އެފަދަ ބައެއް ބަދަލުތަކަށް ނުވަތަ ބައެއް އާދަތަކަށް ބަލާލާނަމެވެ.
. ހީވާގި އުޅުމެއް އުޅުން: ޖިސްމާނީ ހަރަކާތްތެރިކަމަކީ ކޮންމެ ނަފްސާނީ ބައްޔަކަށް ވެސް މުހިއްމު ފަރުވާ އެކެވެ. ނަފްސާނީ ގޮތުންނާއި ޖިސްމާނީ ގޮތުން ހަރަކާތްތެރިވުމަކީ ދިރިއުޅުމުގައި ދިމާވާ ކަންބޮޑުވާ އަދި މާޔޫސް ކުރުވާ ހާދިސާތަކުން ސިކުނޑި އެއްކިބާކޮށްލުމަށް އެހީތެރިވެދޭ ކަމެކެވެ. މިގޮތުން ހާސްވުމާއި ޕެނިކް އެޓޭކްތައް ކޮންޓްރޯލް ކުރުމަށް އެހީތެރިވެދެއެވެ. އަދި ހަމައެހެންމެ ހީވާގިވިވަރަކަށް ނަފްސާނީ ގޮތުން ފުދިގެން ހުންނަވަރު އިތުރުވެއެވެ. ހީވާގި ނުވެ ތިބުމުގެ ސަބަބުން ނަފްސާނީ މަސައްކަތްތަކާއި ޤާބިލުކަން ކުޑަވެ ހާސްކަމާއި އެހެނިހެން ދިގުދެމިގެންދާ ބަލިތަކަށް މަގުފަހިވެގެން ދެއެވެ.
. ދުޅަހެޔޮ ކާނާ ކެއުން: ދުޅަހެޔޮ "ބެލެންސްޑް ޑައިޓެއް" ބޭނުން ކުރުމަކީ ހާސްކަމުގެ މައްސަލަތައް ކުޑަކުރުމަށް ރަނގަޅު ކަމެކެވެ. ދުޅަހެޔޮ ކާނާ ކެއުމުގެ ތަރުތީބެއްގައި އުޅޭ މީހަކަށް "ޖަންކް ފުޑްސް"، އެއަރޭޓެޑް ޑްރިންކްސް ފަދަ މީރު ކާނާ ކެއުމަށް ވުރެ ގިނައިން ވިޓަމިންތަކާ މިނަރަލްތަކުން ފުރިގެންވާ ފައިދާ ހުރި ކާނާތައް ކެވޭނަމަ، ނަފްސާނީ ބަލިތައް ޖެހުމުގެ ފުރުސަތު ކުޑައެވެ.
. މަސްތުވާތަކެއްޗާއި ބަނގުރަލުން ދުރުހެލިވުން: މަސްތުވާތަކެތި ބޭނުންކުރުމާއި ގިނައިން ބަނގުރާ ބުއިމުން ހަށިގަނޑަށް "ސެޑޭޓިވް" އަސަރުތަކެއް ކޮށް، ހަށިގަނޑުގެ "މެޓަބޮލިޒަމް" އަށް ހުރަސް އެޅެ އެވެ. އެއަށް ހަށިގަނޑު ހޭނި، ނަފްސާނީ ދުޅަހެޔޮކަމަށް ނޭދެވޭ އަސަރުކޮށް ޕެނިކް އެޓޭކްތައް ޖެހިދާނެ އެވެ. މަސްތުވާތަކެއްޗާއި ގިނައިން ބަނގުރާ ބުއިމުން ނަފްސާނީ ސިއްހަތު ވަރަށް ނިކަމެތިވެ ދެއެވެ.
. ވަގުތު ބެލެހެއްޓުން: މަސައްކަތުގެ ތާވަލުތަކުގެ ވަގުތު ބެލެހެއްޓުމަކީ ނަފްސާނީ ދުޅަހެޔޮ ކަމަށް، ވަރަށް ބޮޑަށް އެހީތެރިވެދޭ ކަމެކެވެ. އެއީ ވަގުތު ކުޑަތަންވުމުން އުފެދޭ ހާސްކަމާއި ނުތަނަވަސްކަން މަދުކުރުމަށް އެހީތެރިވެދޭނެ ކަމެކެވެ.
. ތިމާގެ އަލާމާތްތައް ދެނެގަތުން: ހާސްކަމުގެ އަލާމާތްތަކާއި ހާދިސާތައް ދެނެގަނެ، ދެނެގެން ތިބުމަކީ ޑޮކްޓަރަށް ދައްކާއިރު އަސްލު ސަބަބު ދެނެގަތުމަށް އެހީތެރިވެދޭނެ ކަމެކެވެ.
. މެޑިޓޭޝަން އަދި ރިލެކްޝަން ޓެކްނިކްސް: މެޑިޓޭޝަން ފަދަ ހާސްކަން ފިލުވައިދޭ އުކުޅުތަކުގެ ސަބަބުން ސިކުނޑިއަށް އިތުރު އޮކްސިޖަން ފޯރުކޮށްދީ، ސިކުނޑި ހީވާގިކޮށްދެއެވެ. މިކަމުގެ ސަބަބުން ސިކުނޑި ހަމައަކަށް އެޅުވި، ހަލަބޮލި ކަމުގެ "ސުލޫކު" ސިކުނޑިން ފިލުވައިދެއެވެ.
. ރަނގަޅަށް ނިދުން: އެކަށީގެންވާ ވަރަށް ނިދުމަކީ ރަނގަޅު ދުޅަހެޔޮ ސިކުނޑިއަކަށް ޖާގަ ދޭނޭ ކަމެކެވެ. ހާސްކަމާއި ޑިޕްރެޝަންގެ ސަބަބުން ގިނަ ފަހަރަށް ނިދި ނުލިބުން ނުވަތަ ނިދި މަދުވުން މެދުވެރިވެއެވެ. ރަނގަޅަށް ނުނިދޭނަމަ، އެކަމަށް އެހީތެރިވެދޭނެ ގޮތްތަކާއި ބެހޭގޮތުން ޑޮކްޓަރާ ވާހަކަ ދައްކާށެވެ.
. ދުންފަތުގެ އިސްތިއުމާލު ކުރުމާއި ކެފެއިން އިން ދުރުހެލިވުން: ސިނގިރޭޓުގައި ހުންނަ ނިކޮޓީން އާއި ކޮފީގައި ހުންނަ ކެފެއިން އަކީ ހާސްކަމުގެ މައްސަލަ ހުންނަ މީހުންނަށް ނުރަނގަޅު އެއްޗެއް ކަމަށް ބައެއް ދިރާސާތަކުން ދައްކައެވެ. އެއީ ސިކުނޑީގައި ހުންނަ ވަކި ކެމިކަލް ލެވެލްތަކެއް އިތުރުކޮށް، ހާސްކަމުގެ އަސަރުތައް އިތުރަށް ގޯސްކޮށްދޭ އެއްޗެހިތަކެކެވެ. ފަހަރުގައި ވަގުތީ ތަސައްލީ އެއް ލިބުނު ނަމަވެސް ދިރާސާތަކުން ދައްކާގޮތުގައި ދިގުމުއްދަތުން އެކަމުގެ ނޭދެވޭ އަސަރު ކުރެއެވެ.
ހާސްކަން ކޮންޓްރޯލްކޮށް ހުއްޓުވޭނެ، ހަމައެކަނި ގޮތަކީ ދުޅަހެޔޮ އަދި ޖިސްމާނީ ގޮތުން ހަރަކާތްތެރި ދިރިއުޅުމެއް އުޅުމެވެ. ގޭތެރެއަށް ބިއްޖެހި، ގޮދަޑިއާއި ބާލީސްތަކުގެ ބަނޑުފުޑުގައި އަބަދު ޖެހިގެން ނުތިބޭށެވެ. ފޯނުތަކާ ޓީވީތަކުގެ ސްކްރީނުގައި އަބަދު ލޯ ޖަހައިގެން ނުތިބޭށެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން