ބައެއްކަންކަން ދުނިޔޭގައި އާންމުވެދާ ގޮތުން އެއީ ދުނިޔޭގެ އާދައެއް ކަމުގައި ހީވެދާ ފަހަރުތައްވެސް އާދެއެވެ. ބައެއް ކުށްތައްވެސް އާންމުވެ، އެ ކުށްތަކަށް އަދަބު ނުދެވި، ކުށްވެރިން މިނިވަންވެ އުޅޭނަމަ އެއީ ކުށެއް ކަމުގައި މުޖުތަމައު ބަލައެއް ނުގަންނާނެއެވެ. އެހިސާބުން އެ ކަމަކީ އެ ޖަމާއަތެއްގެ މެދުގައި އާންމު، އާދައިގެ ކަމަކަށް ވެދެއެވެ. މިއަދު ދިވެހި ރާއްޖޭގައިވެސް މިފަދަ އެތައް ކަމެއް ތަމްސީލުވަމުން އެބަ ހިނގައެވެ. އެތައް ކުށެއް މިއަދުު އެއީ ކުށެއް ކަމުގައި ނުދެކެވޭ ހިސާބަށް ކަންކަން ގޮސްފިއެވެ. ސަބަބުތައް އެހާ ގިނައެވެ.

މަސްތުވުމާއި މަސްތުވާތަކެއްޗާއި ރަލަކީ އިސްލާމްދީނުގައި ކަނޑައެޅިގެން ހަރާމް ކުރައްވާފައިވާ ތަކެއްޗެވެ. އެތަކެތި ބޭނުން ކުރުމުން ޝަރުއީ ހުކުމް އެމީހެއްގެ މައްޗަށް ހިނގާ ކަންކަމެވެ. ބަނގުރަލުގެ ހުކުމުގައި އެ ތަކެތި އުފުލާ މީހުންނާ ލިޔެކިޔުން ބަލަހައްޓާ މީހުންނާއި އެ ބޯ މީހުންގެ ހުކުމް އެއްވަރެވެ. ތައުޒީރީ އަދަބުގައި އެހެނަސް ތަފާތުވެދެއެވެ. މިއީ ވަރަށް ސާފު މައްސަލައެކެވެ. އަސާސީ ދިވެހި އަދި އިސްލާމް މާއްދާ ކިޔަވައިފި ކޮންމެ ދިވެއްސަކަށް މަސްތުވާ ތަކެއްޗާއި އެތަކެތީގެ ހުކުމް އޮޅުމެއް ނެތި ސާފު ވެދެއެވެ. ނަމަވެސް މިއަދުގެ ހާލަތު ނިކަން ދެކިބަލާށެވެ. އެ ކިޔާ ޝަރިއަތާއި އެ ބުނާ އިންސާފަކާއި އެ ލިބިދޭ އިންސާނީ ހައްގުތަކުގެ މިސްރާބު މިއަދު ހުރި ގޮތުން، މަސްތުވާ ތަކެއްޗަކީ މިއަދު "ގަބުޅި ހުނިކޮޅަކަށް" ވެއްޖެއެވެ. އެ ކެޔަސް، ބުޔަސް، ޖެހިޔަސް އަދި އަތުގައި އޮތަސް މިއަދު އެއީ އެއްވެސް މައްސަލަ އަކަށް ނުވާ ކަހަލައެވެ.

ކުށްވެރިވެ ހައްޔަރަށް ގެންދާ މީހާވެސް، ހައްޔަރުގައި ހޭދަކުރަނީ ދެތިން ދުވަހެވެ. އެ މީހަކު އަނބުރާ މުޖުތަމައަށް އެބަ އާދެއެވެ. ނުވަތަ ކޮންމެވެސް ޝަރުތެއް ކުރުމަށްފަހު އަނެއްކާވެސް އެއްކަލަ ޖަމާއަތުގެ ތެރެއަށް އޭނާ ފޮނުވާލައެވެ. މިކަން މިހެން ލޯ މަތީގައި ތަކުރާރުވެދެއެވެ. އެހިސާބުން އަލަށް މަސްތުވާ ތަކެތީގެ ތެރެއަށް ވަންނަ ޒުވާނުންނަށް ލިބެނީ އަމަށު ހިއްވަރެއް ނޫނެވެ. އެހެނީ އެ ޒުވާނުންނަށްވެސް އެނގި ޔަގީންވާ ކަަމަކީ މަސްތުވުމުން ނުވަތަ މަސްތުވާ ތަކެތި ބޭނުން ކުރުމަކުން އަދަބެއް ނުލިބޭ ކަމެވެ. ނަމުގައި އޮންނަ އަދަބު، ކަމުގައި ނުލިބޭ ކަމެވެ. ތަންކޮޅެއް ބޮޑުވަރު ވެއްޖެނަމަ، މޮޅު ގާނޫނީ ވަކީލަކު ގޮވައިގެން ދިއުމުން ކުށްވެރިއާ ސަލާމަތް ވެއެވެ. ގާނޫނުގައި ހުރި ބޮޑެތި އަދި ކުދި ބާގަނޑުތަކުން އެ ކުށްވެރިއަކު މިނިވަން ކުރެތެވެ. މިއީ އާދަވެ ލޯ މަތީ ހިނގާ "އާދައިގެ" ކަންކަމެވެ.

ދިވެހިން އަބަދުވެސް ބަލަނީ ކޮންމެވެސް ހުޅަނގުގެ ގައުމެއްގައި ކަން ކުރާ ގޮތަށް ކުރާށެވެ. ނަމަވެސް ވާ ކަމެއް ހަރާމެވެ. ބޮޑެތި ގައުމުތަކުން، "އަންޑަކަވާރ" އޮޕަރޭޝަން ތައް ޖައްސައިގެން މަސްތުވާ ތަކެތީގެ ބޮޑުން ހިފާ ހައްޔަރުކޮށް، ނުވިތާކަށް ހާލަތު ނިޔާކުރާގޮތުން ބަޑިޖަހަން ޖެހިއްޖެ ހިނދެއްގައި ބަޑިވެސް ޖަހައިގެން އެ މީހުން މައިތިރިކޮށް ހިފަހައްޓައެވެ. ނަމަވެސް މި ގައުމުގައި ކުށްވެރިއެއްގެ ގައިގާ ތަންކޮޅެއް ބާރައް ހިފެހެއްޓޭކަށްވެސް ނެތެވެ. އެހިސާބުން އެ ކުށްވެރިއަކު ހައްޔަރު ކުރީ އިންސާނިއްޔަތާ ހިލާފަށެވެ. އެހެންކަމުން އެ މީހަކު މިނިވަން ކުރަން ޖެހެއެވެ. އިޖުރާއަތެއް ތޯއްޗެއް އެއްޗެއް ފުރިހަމަ ނުވެއޭ ބުނެ މަސްތުވާ ތަކެތީގެ ކިތައް ކިތައް މައްސަލަ، އޮބި ފަސްލެވިފައިވާ ވޭތޯއެވެ؟

ކަންމިހެން އޮތުމުން، ބޮޑުވަމުން އަންނަ ޖީލަށް ފެންނަ މަންޒަރަކީ މަސްތުވާ ތަކެއްޗަކީ "ގަބުޅި ހުނި" ފަދަ އެއްޗެއް ކަމަށެވެ. އެހިސާބުން އެއީ އާންމު އާދައިގެ އެއްޗަކަށް ވެދެއެވެ. އެފަދަ މީހުންނާއި ގުޅި މަސްތުވާތަކެތީގެ ތެރެއަށް ގެނބިގަންނަން އަދުގެ ޒުވާނުން ފަހެއް ނުޖެއެވެ. މީހަކު މައްސަލަ ނުޖައްސާނޭކަން އިނގެއެވެ. އެހެން މީހަކަށް "މަށާ" ބެހޭކަށް ނުކެރޭނެއެވެ. މަސްތުވާތަކެތި ބޭނުން ކުރުމުން އެވީ "ދާދާ" އަކަށެވެ. މަސްތުވާތަކެތި ބޭނުން ކުރުމަކީ ކުށެއް ކަމުގައި މުޖުތަމައު ނުދެކެއެވެ. އަދކ ހައްޔަރަށް ގެންދެވުނަސް ފަސޭހަކަމާއި އެކު މިނިވަން ވެއެވެ. އެހެންކަމުން މަސްތުވުމާއި މަސްތުވާތަކެތި ބޭނުން ކުރުމާ އެކަމުގެ ވިޔަފާރި ކުރުމުގައި އޮތީ ކޮން ކުށެއްތޯ، ޒުވާނުން ސުވާލު ކުރެއެވެ.

ހޮޅުއަށިތަކުންނާއި މީސްމީޑިޔާގެ ބައެއް މަންސަތަކުން އެނގޭ ގޮތުގައި މަސްތުވާ ތަކެތީގެ އަޑީގައި ސިޔާސީ ބޮޑެތި ބޭބޭފުޅުއް އުޅުއްވައެވެ. އެ ބޭބޭފުޅުން ކުރައްވާ ކަޅު ވިޔަފާރި އަކީ މަސްތުވާ ތަކެތީގެ ވިޔަފާރިއެވެ. އެފަދަ ބޭބޭފުޅުންގެ ނުފޫޒު ސަރުކާރާ ތަންފީޒީ އިދާރަތަކުގައި އޮވެއެވެ. ނަތީޖާއަކީ މަސްތުވާތަކެތީގެ ކުށް ކުށަކަށް ނުވެ ނިމުމެވެ. އާދޭހެވެ! އަދަބު ލިބޭ ހާލަތްތައްވެސް އާދެއެވެ. ނަމަވެސް އެ ހާލަތްތައް މަދު ކަމުން، އަދަބު ނުލިބޭކަމަށް ގިނަ އާންމު ރައްޔިތުން ދެކެއެވެ. ވިސްނާށެވެ. ކޮންމެބަޔަކު އަޑީގައި ތިބެ ކުރާ ކަމެެެއް ނަމަވެސް މިކަން ހުއްޓާލާށެވެ. ތަންފީޒީ އިދާރާތަކުންވެސް "ނަކަސްތެޅުން" ހުއްޓާލާށެވެ. ކަމާވެގެން ކުށްމަދު އަމާން މުޖުތަމައެއް ބިނާ ކުރުމަށް އައު ހިއްވަރާއެކު އަތުކުރި އޮޅާލާށެވެ. ކަންކަން މިވާ ގޮތަށް މިހެން ތަރުތީބުވެ ހިނގާނަމަ މިއީ ޖީލުތަކެއްގެ ހަލާކުގެ ފެށުމެވެ. މިހެން ކަން ވަމުން ދާނަމަ، މާދަމާގެ ޖީލުތަކުގެ ހާލަތު ބަޔާންކުރަންވެސް ދައްޗެވެ. 

މަސްތުވާ ތަކެތީގެ އެކި ކުށްކުށަށް އަދަބު ދޭށެވެ. އެއީ ކުށްކުށް ކަމުގައި ދެކި އެފަދަ ކުށްވެރިން ސަލާމަތްކުރަން ނޫޅޭށެވެ. ހައްލު ވަނީވީ ހުކުމް ތަންފީޒު ކުރެވިގެންނެވެ. ނޫންނަމަ ހައްލޭ މި ކިޔާ ބަސްވެސް އުވި ގެއްލި ހިނގައިދާނެއެވެ.