މުދަލާއި ފައިސާ އާއި ތަނަވަސްކަމަކީ އޭގެ ބޭނުން ދުނިޔޭގައި ޖެހޭ ތަކެއްޗެވެ. ދުނިޔޭގެ އަސްލަކީ މާއްދިއްޔަތެވެ. ދުނިޔެ އުފައްދަވައިފައި ވަނީ މާއްދީ ތަކެތިންނެވެ. ދުނިޔެ ކުރިއަށް ހިނގާނީ ވެސް މާއްދީ ތަކެއްޗަށް ބަރޯސާ ވަމުންނެވެ. މާއްދީ ތަކެތީގެ ފަނާވަނިވި ސިފަ ދުނިޔެ އަށް ލިބިފައިވަނީ އެ ސަބަބަށް ޓަކައެވެ. 

ދުނިޔެއިން ހޯދާ މާއްދީ ކޮންމެ އެއްޗަކާއި މަންފާއެއް ލިބިގަންނަންވާނީ މި ދުނިޔޭގައި ބޭނުން ހިފާ މިންވަރަށެވެ. އެއަށްވުރެ އިތުރަށް ހޯދަން އުޅުމަކީ މާއްދިއްޔަތުގެ ކަނޑަށް މީހާ ޣަރަޤު ވެދާނެ ކަމެކެވެ. ޞާލިޙު ބޭކަލަކު ވިދާޅުވެފައިވެއެވެ. "ދޯނި ދުވަން އޭގެ ވަށައިގެން ފެން ބޭނުންވާ ފަދައިން، އިންސާނާ ދުނިޔޭގައި އުޅުމަށް އޭނާ އަށް ފައިސާ ބޭނުންވެއެވެ. ދޯންޏަށް ފެން އެޅިއްޖެއްޔާ ދޯނި ޣަރަޤުވާ ފަދައިން އިންސާނާގެ ހިތަށް ފައިސާ އެޅިއްޖެއްޔާ އޭނާ ވެސް ޣަރަޤުވާ ހުއްޓެވެ." ޙިކުމަތްތެރި ޢިބުރަތްތެރި ބަސްކޮޅެކެވެ. އަޅުގަނޑުމެންނަކީ މުދަލާއި ފައިސާގެ ދަޅައިގައި ޖެހި މާއްދިއްޔަތަށް ގޮސް ހުސްވެ، އޭގައި ޣަރަޤުވާ ބަޔަކު ކަމުގައި ނުލައްވާށިއެވެ!

ކޮންމެ މީހަކަށް ވެސް އެ މީހެއްގެ ޒިންމާ ފުރިހަމަ އަށް އަދާކުރެވޭ ވަރަށް މުދަލާއި ފައިސާ ހޯދުމަކީ އަޅުކަމެކެވެ. އޭނާގެ އަނބިދަރީންނަށް ކާންދީ އުނުއޮރިޔާން ނިވާކޮށްދިނުމަށެވެ. އެ މީހުން ނިވާވާނޭ ބޯހިޔާވައްސެއް ހޯދައިދިނުމަށެވެ. އެ ނޫން ވެސް ޒަރޫރީ ކޮންމެ ބޭނުމެއް ފުއްދައިދިނުމަށެވެ.

ޒަރޫރީ ބޭނުންތަކަށްވުރެ އިތުރަށް މުދަލާއި ފައިސާ ހޯދަން އުޅުމުގައި ދެ ދުނިޔެ ގެއްލޭގޮތަށް ބައެއް މީހުންގެ ޢަމަލުތައް ބެހެއްޓެއެވެ. މާއްދީ ބޮޑު މަންފާއެއްގެ އުއްމީދުގައި އެކި ވައްތަރުގެ ބައްދަލުވުންތައް ބާއްވަނީ އެވެ. ސައިހޮޓާތަކުގައި އެތައްވަގުތެއް ހޭދަކުރަނީއެވެ. ފަލާޙާއި ކާމިޔާބަށް ގޮވާ އަޑު ތަކުރާރުކޮށް އިވޭއިރު ވެސް އެއަޑަށް އިޖާބައެއް ނުދެވެއެވެ. ނަމާދަކަށް ނާރަ އެވެ. ދުނިޔޭގެ ކާމިޔާބު ވެސް އާޙިރަތުގެ ކާމިޔާބުވެސް އޮތީ ފަރުޟު ފަސް ނަމާދު އަދާކުރުމުން ކަން އެބައިމީހުންނަކަށް ނުވިސްނެއެވެ.

ބައެއް މީހުންނަކީ މާގިނަ މަސައްކަތްތަކެއް ނުކުރިކަމުގައި ވިޔަސް މުދަލާއި ތަނަވަސްކަން ލިބޭ މީހުންނެވެ. އެ މުދަލުގެ ބޭނުން އެދެވޭ ހެޔޮ ރަނގަޅު ގޮތުގައި ހިފާ ބަޔަކު އުޅެއެވެ. އެފަދަ މީހުންގެ ތެރެއިން އަޅަމެން ލައްވާށިއެވެ! އަދި ދެ ދުނިޔޭގެ ބާއްޖަވެރިކަމުން މަހުރޫމު ވެފައިވާ ބަޔަކު ވެސް އެ ފަދަ މީހުން ތެރޭ އުޅެއެވެ. އެބައިމީހުންގެ މުދަލުގައި މާތްﷲ ބަރަކާތް ނުލައްވާ މީހުންނަކީ އެއީއެވެ. ހެޔޮ ރަނގަޅު ގޮތުގައި ތަނަވަސްކަމުގެ ބޭނުން ހިފާކަށް އެ މީހުންނަކަށް ނޭނގެއެވެ. ވިޔާނުދާ ޢަމަލުތަކާއި މުންކަރާތްތަކަށް ޚަރަދު ކުރަނީ އެވެ. އެފަދަ މީހުންގެ ތެރެއިން އަޅަމެން ނުލައްވާށިއެވެ!

މާތްﷲ ދެއްވާ މުދާ އެ އިލާހުގެ ރުހުން ލިބި ދެ ދުނިޔޭގެ ކާމިޔާބު ލިބޭ ގޮތަށް ހޭދަކުރުމުގެ ތައުފީޤު އަޅަމެންނަށް ދެއްވާށިއެވެ.

 

(މުދަލާއި ފައިސާގައި ޣަރަޤު ނުވާށެވެ! - އައްޝެއިޚް މުޙައްމަދު އަފްޟަލް؛ ދީނުގެ މަގު އަދަދު 37, ޞ.1 - 9 ސެޕްޓެންބަރު 2022)