އާސަންދަ ކުންފުންޏާއި ވިލާ އެއަރ ޕްރައިވެޓް ލިމިޓެޑާ ދެމެދު ޓްރެވެލް ޕާޓްނަރޝިޕް އެއްބަސްވުމެއްގައި ސޮއިކޮށްފިއެވެ.
އާސަންދައިގެ ފަރާތުން މި އެއްބަސްވުމުގައި ސޮއި ކުރެއްވީ ކުންފުނީގެ މެނޭޖިން ޑިރެކްޓަރ އަލްފާޟިލާ މަރިޔަމް ޝަފީޤެވެ. އަދި ވިލާ އެއަރގެ ފަރާތުން ސޮއިކުރެއްވީ މެނޭޖިން ޑިރެކްޓަރ އަބްދުﷲ ނާޝިދެވެ.
މި އެއްބަސްވުމުގެ ދަށުން، އާސަންދަ ސްކީމް މެދުވެރިކޮށް ކުރުމަށް ހަމަޖެހިފައިވާ އެތެރޭގެ ވައިގެ ދަތުރުފަތުރުގެ ނިޒާމުގެ ތެރެއިން ވިލާ އެއަރ އިން ދޭންޖެހޭ ފުރިހަމަ އެހީތެރިކަމާއި އެއްބާރުލުން އާސަންދަ އަށް ލިބިގެންދާނެ އެވެ.
އެގޮތުން، ވިލާ އެއަރގެ ފްލައިޓްތައް ދަތުރުކުރާ އެއަރޕޯޓްތައް ހުންނަ ރަށްތަކުގެ ރައްޔިތުންނާއި، ކައިރީގައިވާ ރަށްތަކުގެ ރައްޔިތުންނަށް ވެސް، އާސަންދަ ސްކީމްގެ ދަށުން އިމަރޖަންސީ އިވެކުއޭޝަން ޚިދުމަތް ދިނުމުގައި އިތުރު ލުއި ފަސޭހަތަކެއް ލިބިގެންދާނެއެވެ.
މީގެއިތުރުން، އާސަންދަ ކުންފުނިން ދަނީ ރާއްޖޭގައި އޮޕަރޭޓްކުރާ އިތުރު އެއަރލައިންތަކާ އެކު ވެސް މިފަދަ އެއްބަސްވުންތައް އެކުލަވާލުމުގެ މަސައްކަތް ކުރަމުންނެވެ.