ތަރައްގީގެ ވާހަކަ އަބަދުވެސް އަހަރެމެން ދައްކަމުއެވެ. ތަރައްގީ ވާން އަހަރެމެން އަބަދުވެސް ބޭނުން ވެއެވެ. ތަރައްގީ ވުން އޮތީ އިންސާނުންގެ އަތްމަތީގައެވެ. ތަރައްގީ އަކީ އޮޔާ ލައްގާ އެއްޗެއް ނޫނެވެ. ފެންނަ މަންޒަރުތަކާއި ކަންކަން ވަމުންދާ ގޮތުން ހީވާކަހަލައެވެ. "ތަރައްގީ އަންނަނީ ހެވީ ލޯޑު ވެހިކަލް ތަކުގައެވެ." ހީވަނީ ތަނަކު ބަހައްޓާފައި ހުރި އެއްޗެއް ހެއްނެންނެވެ.

އާދޭހެވެ. މިއީ މިކިޔާ އުމްރާނީ ތަރައްގީއެވެ. މެދު އުޑަށް އުފުލާ އިމާރާތްތަކާއި ގެދޮރާއި ފިހާރަތެކެވެ. ފުޅާކޮށް އިމާރާތްކުރާ ތަނަވަސް ސްކޫލުތަކެވެ. ކަރަންޓުގެ ހިދުމަތްދޭ އަޅާ ވަރުގަދަ އިންޖީނުގޭތަކެވެ. ފެނާއި ނަރުދަމާ އަޅައިދޭން ބިމު އަޑީގައި ވަޅުލާ އެހެރަ ފަލަ ހޮޅިތަކެވެ. ފުންކޮށް ކޮނެ ފުންކުރާ ފަޅު ފަޅެވެ. ވެލި އަޅާ ހިއްކާ ބޮޑެތި ފަރު ފަރެވެ. ރަށްރަށު ވަށާ ޖަހާ ބޮޑު ހިލައެވެ. އެއް ރަށް އަނެއް ރަށާ ގުޅުވަން އަޅާ ބްރިޖުތަކެވެ. މިހެންގޮސް ކިޔާނަ ކަމެއް ނެތެވެ. ހައްތަހާވެ އުމްރާނީ ތަރައްގީއެވެ. މި ތަރައްގީތައް އަންނަނީ އިސްވެ ބުނެވުނު ފަދައިން ހެވީ ލޯޑު ވެހިކަލް ތަކުގައެވެ. މިފަދަ ބޮޑެތި އުޅަނދުތައް އައިސް އެ ގައުމެއް، އެ އަތޮޅެއް، ނުވަތަ އެ ރަަށެއް އެބަ ތަރައްގީ ކުރެއެވެ. ހަމަ އެ ކުރެވޭ ތަރައްގީ އެގޮތަށް ކުރެވުމާއި އެކު އެ އުޅަނދުތައް އެތަނަކުން ފައިބައިގެން ފެއެވެ. އެހިސާބުން އަހަރެމެން މި ގަބޫލު ކުރަނީ އެތަނެއް އެ އޮތީ ތަރައްގީ ވެފާ ކަމަަށެވެ.

އާދޭހެވެ! އަނެއްކާވެސް ހަނދާން ކޮށްދެމެވެ. އެއީ އުމްރާނީ ތަރައްގީއެވެ. މެދު އުޑަށް ބޮޑެތި އިމާރާތްތައް އުފުލިޔަސް، ބޮޑެތި ފަރުތައް ހިއްކިޔަސް، އެއް ރަށާ އަނެއް އަނެއް ރަށް ފާލަމަކުން ގުޅާލިޔަސް، އަދި ކިއެއް ބިމު އަޑިން މައުދަނާއި ތެލާއި ގޭހާ އަދި ޖަވާހިރު ނެގިޔަސް ތަރައްގީ އެވަނީ އެއްމެ ދާއިރާއެކެވެ. ގައުމެއް ކުރިއަރާ ދިއުމުގައި ތަރައްގީ ވާން ޖެހޭ ދެ ދާއިރާއެއް ވެއެވެ. އެއީ އުމްރާނީގޮތުން ތަރައްގީ ވުމާއި އިންސާނާގެ ސިކުނޑި ތަރައްގީ ވުމެވެ. އުމްރާނީ ގޮތުން އަންނަ ތަރައްގީ އާއި މަސްހުނިވެ އިންސާނާއަށް އުޅެން ނޭނގޭނަމަ އެ ތަރައްގީއެއްގެ ބޭނުމަކީ ފަހެ ކޮބާ ހެއްޔެވެ؟

ތަރައްގީވެ ކުރިއަރަށް އެދޭ މީހާ އަބަދުވެސް ދެ ކަމެއް ތަރައްގީ ކުރާނެއެވެ. އެއީ އޭނާގެ ވެއްޓާއި އޭނާގެ ސިކުނޑިއެވެ. ތަރައްގީ އަކީ ހަމަ އެކަނި ހެވީ ލޯޑް ވެހިކަލް ތަކުގައި އަންނަ އެއްޗެއް ކަމަށް އަހަރެމެން މި ދެކޭ ދެކުން ނިމުމަކަށް ގެންނަން އެބަ ޖެހެއެވެ. ރަށަކަށް އަރުވާ ކޮންމެ ހެވީ ލޯޑު ވެހިކަލަކާއި އެކު އެ ރަށެއްގެ ރައްޔިތުންގެ ވިސްނުމާއި ފިކުރު ތަރައްގީވެސް ކުރަން ޖެހެއެވެ. ޖަމާއަތެއްގައި ސުލްހައޭ މި ކިޔާ ހިމޭންކަން ބާއްވަން އެނގެން އެބަ ޖެހެއެވެ. އެކުގައި އުޅެން ދަސްކުރަން އެބަ ޖެހެއެވެ. ހަސަދަވެރި ވުމާއި ހަސަދަ ލުން މުޅިން ނައްތާލަން އެބަ ޖެހެއެވެ. ބޮޑާވެރިކަމާއި ކިބުރުވެރިކަން ފިލުވާލަން އެބަ ޖެހެެެއެވެ. ނޫންނަމަ ތިޔަ ގެންނަ އުމްރާނީ ތަރައްގީގައި އަބަދުވެސް ކޮޅުފައިން ޖަހާނޭ ބަޔަކު، އެ ބައެއްގެ ތެރޭގައި ވާނެއެވެ.