އަތޮޅު ތެރޭގެ 11 ރަށެއްގައި ފާމަސީތައް ޤާއިމްކުރުމަށް މިނިސްޓްރީ އޮފް ހެލްތު އާއި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އާ ދެމެދު އެއްބަސްވުމެއްގައި ސޮއިކޮށްފިއެވެ.
އިއްޔެ ބޭއްވި ރަސްމިއްޔާތެއްގައި އެސްޓީއޯގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ ޖެނެރަލް މެނޭޖަރ، ބިޒްނަސް ރިސަރޗް އެންޑް ޕްރޮޕަޓީ މެނޭޖްމަންޓް މުހައްމަދު އިޙްސާން ވަހީދު އެވެ. ހެލްތު މިނިސްޓްރީގެ ފަރާތުން ސޮއިކުރެއްވީ ސީނިއަރ އެގްޒެކެޓިވް ޑިރެކްޓަރ ޢަބްދުލް ހަންނާނު ހުސެއިން އެވެ.
އެގޮތުން، 11 ރަށެއްގެ ހެލްތު ސެންޓަރުގެ އިމާރާތުގެ އެތެރޭގައި މިހާރު ހުރި ފާމަސީތަކުގެ ބަދަލުގައި ހެލްތު ސެންޓަރުގެ ގޯތިތެރެއިން އެސްޓީއޯ ފާމަސީ ހެދުމަށް ބިން ކަނޑައަޅައިފައިވެއެވެ.
މި އެއްބަސްވުމުގެ ދަށުން ފާމަސީތައް ޤާއިމްކުރުމަށް ހަމަޖެހިފައިވާ ރަށްތަކަކީ؛ ހއ. ތުރާކުނު، ހއ. ތަކަންދޫ، ނ. ލަންދޫ، ބ. ދޮންފަނު، އދ. ދިގުރަށް، މ. ކޮޅުފުށި، މ. ރަތްމަންދޫ، މ. މަޑުއްވަރި، ތ. އޮމަދޫ އާއި ގއ. ކޮލަމާފުށި އަދި ގއ. ކަނޑުހުޅުދޫ އެވެ.