އެސްޓީއޯ ސްޓޭޕަލް ވެއަރހައުސްގައި ސޯލާ ޕީވީ ސިސްޓަމް ޤާއިމްކޮށްފިއެވެ.
މިއީ އެސްޓީއޯގެ ގްރީން އިނީޝިއޭޓިވްގެ ދަށުން ހިންގުމަށް ހަމަޖެހިފައިވާ ޕްރޮޖެކްޓްތަކުގެ ތެރެއިން ރިނިއުބަލް އެނާޖީ އިން ކަރަންޓް އުފެއްދުމަށް ހިންގުނު ޕައިލޮޓް ޕްރޮޖެކްޓެކެވެ.
މި ޕްރޮޖެކްޓްގެ ކޮންޓްރެކްޓަރެއްގެ ގޮތުގައި ރިނިއުބަލް އެނާޖީ މޯލްޑިވްސް ހަމަޖައްސައި މިދިޔަ ޖުލައި މަހުގެ 17 ގައި ފަށައި، މި މަސައްކަތް މުޅިން ނިންމާލައިފައިވަނީ އިއްޔެ އެވެ. މި މަސައްކަތް ނިންމާލަައިފައިމިވަނީ ގާތްގަނޑަކަށް ދެ މަސް ދުވަހުގެ ތެރޭގައެވެ.
އެގޮތުން، މާލެ ކަޅުތުއްކަލާކޮއްޓާ އިންވެގެންހުންނަ އެސްޓީއޯގެ ކާޑު ގުދަނުގައި އިންސްޓޯލް ކޮށްފައިވާ ސޯލާ ޕެނަލްތަކުން އެ ގުދަނަށް ބޭނުންވާ ކަރަންޓުގެ އިތުރުން އެތަނުން އުފައްދާ ކަރަންޓް ސްޓެލްކޯގެ ގްރިޑަށް ފޮނުވައިގެން އެސްޓީއޯގެ މެޑިކަލް ގުދަނުގެ ކަރަންޓުގެ ބޮޑުބައެއްވެސް ސޯލާ އެނާޖީއިން ބޭނުންކުރެވިގެންދާނެއެވެ. އެސްޓީއޯގެ ކާޑު ގުދަނަކީ ތިމާވެއްޓާ ރައްޓެހި ތަނަކަށް ހެދުމުގެ ގޮތުން ގުދަނުގައި މިހާރު ބޭނުން ކުރެވެމުންދަނީ ތިމާވެއްޓާ ރައްޓެހި ބެޓްރީ ފޯކްލިފްޓެކެވެ.
އަދި އެ ކުންފުނީގެ އެކިއެކި އިމާރާތްތަކުގައި ބޭނުންކުރާ ކަރަންޓް އުފެއްދުމަށް ރިނިއުބަލް އެނާޖީގެ އިތުރު ޕްރޮޖެކްޓްތައް ކުރިއަށް ވަނީ ރޭވިފައެވެ.
މީގެ އިތުރުންވެސް ގްރީން އިނީޝިއޭޓިވް ދަށުން އެތައް ޕްރޮޖެކްޓްތަކެއް ހިންގުމަށް އެ ކުންފުނިން އަންނަނީ ތައްޔާރުވަމުންނެވެ.
"އެސްޓީއޯގެ އަމާޒަކީ، ކުރިއަށް އޮތްތަނުގައި ކާބަން އެމިޝަން (ޖައްވަށް ދޫކުރާ ކާބަންގެ މިންވަރު) މަދުކުރުމަށް ކުރެވޭނެ ކަންކަން ބަލައި، އެގޮތަށް މި ކުންފުނީގެ މަސައްކަތްތައް ބަދަލު ކުރުމެވެ،" އެ ކުންފުނިން ނެރުނު ބަޔާނެއްގައިވެއެވެ.