މާވެޔޮ މިސްކިތް ކައިރީގައި މަގުމައްޗަށް ވާގޮތަށް ބަހައްޓާފައިވާ ސްޓެލްކޯގެ ޓްރާންސްފޯމަރު އެތަނުން ނެގުމުގެ މަސައްކަތް ނިންމާލުމާ ގުޅިގެން މިއަދު ސޯޝަލް މީޑިއާ މެދުވެރިކޮށް އެ ކުންފުނީގެ މެނޭޖިންގ ޑިރެކްޓަރ، ހުސައިން ފަހުމީ ވަނީ ދިވެހީންގެ ރާއްޖޭގައި ކަންކަން ހިނގަމުންދާނީ ރައްޔިތުން އެދޭ ގޮތަށް ކަމަށް ވިދާޅުވެފައެވެ.

ސްޓެލްކޯގެ މެނޭޖިންގ ޑިރެކްޓަރުގެ މަގާމާ ހަވާލުވިތާ ކުޑަވަގުތު ކޮޅެއްގެ ތެރޭގައި މިދިޔަ މަހު ފަހުމީ އެ ސަރަހައްދަށް ވަޑައިގެން ބައްލަވާލެއްވުމަށްފަހު ވިދާޅުވީ، މި އަހަރު ނިމުމުގެ ކުރީން މަގުމަތިން އެ ޓްރާންސްފޯމަރު ނަގާނެ ކަމަށެވެ.

އެ ދުވަހު ސްޓެލްކޯގެ އެމްޑީ ފަހުމީ ވިދާޅުވި ފަދައިން، މިއަދު މިވަނީ ރައްޔިތުންނަށް ތަކުލީފަކަށް ވާގޮތަށް މާވެޔޮ މިސްކިތް ކައިރީގައި ހުރި ޓްރާންސްފޯމަރު އެތަނުން ނަގައި، ވަޢުދު ފުއްދަވައިފައެވެ.

އެކްސް މެދުވެރިކޮށް ފަހުމީ ކުރެއްވީ ޕޯސްޓްގައި ވަނީ، "ރައްޔިތުންގެ ވިންދާއި އެއްގޮތައް މަސައްކަތް ކުރުމުގެ މަތިވެރި އަޒުމާއި، ރޫހާއިއެކު ނިކުމެވަޑައިގެން، އެ ރައްޔިތުންނަށް ތަކުލީފަކަށްވާ ހުރިހާ ކަމަކުން މިންޖު ކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވަމުންގެންދަވާ މަސައްކަތްޕުޅުތަކުގެ ތެރެއިން، ދެއްވި ހަރުދަނާ އިރުޝާދުތަކާއެކު، ރައްޔިތުންނަށް ތަކުލީފަކަށްވި، ޓްރާންސްފޯމަރުތައް ކުޑަ ދުވަސްކޮޅެއްގެ ތެރޭގައި އަޅުގަނޑުމެން މިވަނީ މަގުމަތިން ނަގާފައި،" މިހެންނެވެ.

"މާތްﷲގެ އިރާދަފުޅާއެކު، އައު އަހަރު އެއްވެސް ހުރަހެއްނެތި އެމަގުން ރައްޔިތުންނަށް ދަތުރު ކުރެވި އޭގެ ފަސޭހަ ލިބިގެންދާނެ." ފަހުމީ ކުރެއްވި ޕޯސްޓްގައިވެއެވެ.

މާވެޔޮ މިސްކިތް ސަރަހައްދުގައި ހުރި ޓްރާންސްފޯމަރު އެތަނުގައި ބަހައްޓާފައި ހުންނަތާ 6 އަހަރެއްހާ ދުވަސް ވަނީ ވެފައެވެ. އެ ޓްރާންސްފޯމަރަކީ އެ ސަރަހައްދާއި، އެމަގު ބޭނުން ކުރާ ރައްޔިތުންނަށް ތަކުލީފަކަށްވެފައިވާ ޓްރާންސްފޯމަރެކެވެ.