މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން ހިންގަމުންއައި އައިސް ޕްލާންޓްތަކުގެ ތެރެއިން 13 ޕްލާންޓް ފެނަކަ ކޯޕަރޭޝަން ލިމިޓެޑާ މިއަދު ޙަވާލުކޮށްފިއެވެ.
ފެނަކަ ހެޑް އޮފީހުގައި، މިއަދު ހެނދުނު ބޭއްވި ރަސްމިއްޔާތެއްގައި އައިސް ޕްލާންޓްތައް ބަދަލުކުރުމުގެ އެއްބަސްވުމުގައި އެ ކުންފުނީގެ ފަރާތުން ސޮއި ކުރެއްވީ ސީއީއޯ އަދި އެމްޑީ އަހުމަދު ސަޢީދު މުހައްމަދު އެވެ. އަދި މިފްކޯގެ ފަރާތުން ސޮއި ކުރެއްވީ ސީއީއޯ އިސްމާއިލް ފައުޒީ އެވެ.
މި ރަސްމިއްޔާތުގައި މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން ބައިވެރިވެ ވަޑައިގެންނެވިއެވެ.
މިއީ ފެނަކަ އަށް މަތިކުރައްވާފައިވާ ފެނާއި ނަރުދަމާ އަދި ކަރަންޓުގެ ޚިދުމަތަށް ގެންނަމުންދާ ޒަމާނީ އިންޤިލާބުތަކުން ލިބުނު އިތުބާރުގެ މައްޗަށް ސަރުކާރުން ނިންމެވި ނިންމެވުމެކެވެ.
މިއަދުގެ ރަސްމިއްޔާތުގައި ވާހަކަ ދައްކަވަމުން ފެނަކައިގެ އެމްޑީ އަހުމަދު ސަޢީދު ވިދާޅުވީ، އެ ކުންފުނީގެ ފަރާތުން މަސްވެރިންނަށް މެދުނުކެނޑި އައިސް ފޯރުކޮށްދޭނެ ކަމުގެ ފުރިހަމަ ޔަޤީންކަން ދެއްވާ ކަމަށެވެ.
ފެނަކައާ ޙަވާލުކުރީ ހއ. އިހަވަންދޫ، ނ. ޅޮހި، ރ. އަލިފުށި، ބ. ތުޅާދޫ، ފ. ނިލަންދޫ، ތ. ހިރިލަންދޫ، ގއ. ދާންދޫ، ގއ. ދެއްވަދޫ، ގއ. ގެމަނަފުށި، ގއ. ކޮލަމާފުށި، ގދ. ފިޔޯރީ، ގދ. ފަރެސްމާތޮޑާ އާއި އައްޑޫސިޓީ ހިތަދޫގައި ޤާއިމްކޮށްފައިވާ އައިސް ޕްލާންޓްތަކެވެ.