އިންސާނާގެ ފިކުރާ އިންސާނާ ވިސްނާ ވިސްނުމާ އަދި ބައެއްފަހަރު އެ އިންސާނެއްގެ އަގީދާގެ ސާބިތުކަމަށް ލޮޅުން އަރާ ކަންކަން އިންސާނެއްގެ ހަޔާތުގައި ދިމައިވާނެއެވެ. މިފަދަ ކޮންމެ ކަމެއްގައި ނުވަތަ ހާލަތެއްގައި އިންސާނާއަށް އޮތީ ކެތްތެރިކަމާއި ސާބިތުކަމާއި އެކު އެކަންކަމާ ކުރިމަތި ލުމެވެ. އެފަދަ ކަންކަމުގެ ކުރިމަތީގައި ނިކަމެތި ވެއްޖެ މީހަކީ އެމީހެއްގެ ސޫރަ ބަދަލުވެދާނޭ މީހެކެވެ. އެފަދަ ނުބައި ދެކަމެއް ވެއެވެ. އެއީ ވެރިކަމާއި މުދާވެރިކަމެވެ. މިއީ އިންސާނާގެ މުޅި ސޫރަ ބަދަލު ކޮށްލާ ބާރުގަދަ ވިހަ ތަކެކެވެ. މިކަން ކޮންމެ އިންސާނަކުވެސް ދަންނަން ވާނެއެވެ.
އިންސާނެއްގެ ހަޔާތުގައި ވެރިކަމާއި ބާރުވެރިކަން ބޭނުން ވެއެވެ. ފަހަރުގައި އެގޮތަށް އުޅުމަކީ ތިމާ ގަޔާ ކަމެއް ނޫން ކަމުގައި ދެކެވުނު ނަމަވެސް ހަގީގަތަކީ އެފަދަ ބާރުވެރިކަމެއް ލިބުމުން އެކަމަށް ޝައުގުވެރިވެއެވެ. އަދި ދެން އެ ބާރުވެރިކަން ނެތިގެން ދާކަށް ނޭދެވެއެވެ. ލިބޭ ކޮންމެ ބާރުވެރިކަމެއްގައި ދެމި ހުރުމަކީ ކޮންމެ އިންސާނެއްގެ ވެސް ޠަބީއަތިގައި ވާކަމެކެވެ. ހައްގު ގޮތުގައި ވިޔަސް އަދި ނުހައްގުން ކަމުގައި ވިޔަސް، އެ ބާރުވެރިކަން އެމީހެއްގެ ކިބައިން ނެތިވެ ހިނގައްޖެނަމަ، އެއަށްވުރެ ބާރުލާ އެ ބާރުވެރިކަން އަލުން ހޯދުމަށް އިންސާނާ އަވަސްވެ ގަނެއެވެ. މިކަމުގެ ތެރޭގައި އުސޫލާ ހަމަ، އަދި ގަވާއިދާ ގާނޫނު ބޮލާލާ ޖެހޭތަންވެސް ފެނެއެވެ. އެ މީހެއްގެ އަސްލު ސޫރަ މުޅިންހެން ބަދަލުވެ ދެއެވެ.
ބާރުވެރިކަމުގައި ދެމި ހުންނަ ދުވަސްތަކުގައިވެސް އިންސާނާ ހަމަ މަގުން ކަސިޔާރުވެގެން ދެއެވެ. އެ ލިބޭ ބާރުވެރިކަމުގެ މައްޗަށް އިންސާނާ ބޮޑާވެއެވެ. އެ ވެވޭ ބޮޑާކަމުގެ ނަތީޖާއަކީ މިންނެއް ސުމާރަށް އެމީހެއްގެ އަމަލުތައް ބަދަލުވެގެން ދިއުމެވެ. ކާންދިން އެތައް އަތެއްގައި ދައިގަނެވެއެވެ. އެންމެ ކައިރީގަ ހީފާ އުޅުނު ރައްޓެހިން މުޅިން ބާކީ ކޮށްލެވެއެވެ. ލިބޭ ބާރުވެރިކަމާއެކު ބޮޑާވެ ގަންނަ މީހާގެ މައްޗަށް ޝައިޠާނާ ސަވާރުވެ ގަންނަނީ ވަރަށްވެސް ފަސޭހައިންނެވެ. އެއާއި އެކު އެމީހެއްގެ އަސްލު ސޫރަ މުޅިން ބަދަލުވެ ދެއެވެ.
ފައިސާ އާއި މުދާވެރިކަންވެސް އެފަދައެވެ. ފުދޭ ވަރެއްގެ އާމްދަނީއާއި އެކު ދެކޮޅު ޖެހި ހަމަ ޖެހިގެން އުޅެވެނިކޮށް ތިމަންނައަށް ފުދެއޭ ކޮންމެ އިންސާނަކަށްވެސް ބުނެވޭނެއެވެ. ނަމަވެސް މުދާވެރިކަމާއި ފައިސާއިން ދައްކާ ދަޅާގައި އިންސާނާ ޖެހިއްޖެ ނަމަ، އެމީހަކު ކުރިން އެ ބުނި ބަސްތައް އެމީހެއް ހަޔާތުން "ކެންސަލް" ވެއެވެ. މީހާގެ ހަމަ ބުއްދި އާއި މިނިވަން ފިކުރާއި ހިޔާލު ކުރުމުގެ ތަނަވަސްކަމަށް މުދަލާ ފައިސާ ވެރިވެގަނެއެވެ. އިރެއްގައި ފުދިގެން އުޅުނު އުޅުން، ލިބޭ ތަނަވަސްކަމާއެކު ނުފުދެއެވެ. އިންސާނާގެ ހިތަކީ ދުވަހަކުވެސް ފުރޭނޭ އެއްޗެއް ނޫނެވެ. މުދަލާ ފައިސާގައި ކިތަންމެ ބޮޑު ތަނަވަސްކަމެއް ހޯދި ނަމަވެސް، އެ އިންސާނެއްގެ ހިތުގައި އެ މުދާވެރިކަން އަދިވެސް އިތުރަށް ފުޅާކުރުމަށް އޮންނާނީ ޝައިޠާނާ ހުޅު ރޯކޮށްފައެވެ. މިއީ އިންސާނާ ގަސްތުގާ ކުރާ ކަމެއް ނޫނެވެ. އިންސާނީ ޠަބީއަތުކަމުން ކަން ވާ ގޮތް ގޮތެވެ. އެހެނެއްކަމަކު މިކަންކަމާ އަޅާނުލާ އެއްވެސް އިންސާނަކަށް މިދުނިޔެ މަތީ ހަމަޖެހިގެން އުޅެވޭކަށް ނެތެވެ. ކޮންމެ ހާލެެއްގައި ނަމަވެސް މި ކަންކަމާއި މެދު ފަރުވާތެރިވާން ޖެހެއެވެ.
ބާރުވެރިކަމާ މުދާވެރިކަމަކީ އިންސާނާ ހަލާކުގެ ތެރެއަށް އެއްލާލާ ނުބައި ދެ ބައްޔެވެ. މިފަދަ ކަންކަމާ ކުރިމަތިލާއިރު، ނުވަތަ މިފަދަ ކަންކަމުގެ ޖަޒުބާތުގައި ޖެހިގެން ތިބޭއިރު، ތިމާގެ އަސްލު ހައިބަތު ހަނދާން ކުރާށެވެ. ބޮޑާ ވުމާއި ކިބުރުވެރިކަން އެއީ މަގެއްގެ ގޮތުން ހަލާކުގެ މަގުކަން އަބަދުވެސް ހަނދާން ކުރާށެވެ. ލިބޭ ބާރުވެރިކަމާއި ތަނަވަސްވެދާ މުދާވެރިކަމާ ފައިސާގެ މައްޗަށް އަހަރެމެންގެ ހިތް މަޑުމޮޅިވެ ހިމޭން ވާން ޖެހޭނެއެވެ. އަބަދުވެސް އަހަރެމެންނީ ﷲ ގެ އަޅުންކަން ހަނދާންކޮށް އެކަލާންގެ ދެއްވާ ނިއުމަތްތަކަށް ޝުކުރުވެރިވުން މަތީ ދެމިތިބެން ވާނެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން