އަހަރެމެންގެ ހަށިގަނޑުގެ ބޭރުގައިވާ ގުނަވަންތަކުން އެންމެ އަސާސީ އެއް ގުނަވަނަކީ ލޮލެވެ. ލޮލުގެ ފެނުމަކީ ކޮންމެ އިންސާނަކަށްވެސް ދިރިއުޅުމުގައި ވަރަށް އަސާސީ ނިއުމަތެކެވެ. ލޮލުގެ ފެނުމުން މަހުރޫމުވެފައިވާ ކިތަންމެ ބަޔަކުވެސް އަހަރެމެންގެ ތެރޭގައި އުޅެއެވެ. އަދި އެ ނިއުމަތް ލިބުމަށްފަހު، އެ ނިއުމަތް ގެއްލިފައިވާ މީހުންވެސް އަހަރެމެންގެ ތެރޭގައި އުޅެއެވެ. ލޮލުގެ ފެނުން ލިބިހުރެ، އެ ފެނުން ގެއްލިގެން ދިއުމަކީ އިންސާނަކަށް ބަރުދާސްތުކުރަން ފަސޭހަ ކަމަކަށް ހަމަ ގައިމުވެސް ނުވާނެއެވެ. އެހެންކަމުން އަހަރެމެންގެ ލޮލުގެ ފެނުމާ ލޮލުގެ ދުޅަހެޔޮކަމަށް ވަރަށް ބޮޑަށް ސަމާލުކަން ދޭން ޖެހޭނެއެވެ.
ދުޅަހެޔޮ ލޮލެއް އެދޭ މީހާ ފައިދާހުރި ކާނާ ކެއުން ގިނަ ކުރާށެވެ. ހާއްސަކޮށް ވިޓަމިން އޭ އެކުލެވޭ މޭވާ އާއި ތަރުކާރީއެވެ. ވިޓަމިން ސީ އަދި ވިޓަމިން އީ އަދި މީގެ އިތުރުން އޮމެގާ 3 އަކީވެސް ލޮލުގެ ދުޅަހެޔޮކަމަށް ބޭނުންތެރި އަސާސީ މާއްދާތަކެކެވެ. އާންމު ކެއުމުގައި މި މާއްދާތައް ހިމެނިފައި ވީނަމަވެސް ހާއްސަކަމެއް ދީގެން މިފަދަ ކާނާ ކެެއުންވެސް މުހިންމެވެ.
ލޮލުގެ ނާރުތަކަކީ ވަރަށް ނާޒުކު ނާރު ތަކެކެވެ. އެ ނާރުތަކުގެ ޠަބީއަތުން އެ ނާރުތަކަށް އަސަރު ކުރުވާ އެންމެ ނުރައްކާ އެއް ބައްޔަކީ ހަކުރު ބައްޔެވެ. ހަކުރު ބަލި ހުންނަ މީހުންގެ ފެނުން ފުސްވަނީ މި ސަބަބާއި ހުރެއެވެ. އެހެންކަމުން ދުޅަހެޔޮ ލޮލެއް އެދޭ މީހާ ހަކުރުބަލިން ރައްކާތެރިވުން މުހިންމެވެ. ނުވަތަ ލޭގައި ހަކުރު ހުންނަ މިންވަރު އެއްހަމައެއްގައި ހިފަހައްޓަން ސަމާލުކަން ދޭން ޖެހޭނެއެވެ.
ލޮލުގެ ފެނުމަށް އަންނަ ބަދަލުތަކުގެ ވާހަކަ ކޮންމެ މީހަކުވެސް އިތުބާރުކުރެވޭ މީހުންނާ ހިއްސާކުރަން ވާނެއެވެ. އެ އަންނަ ބަދަލު ތަކަކީ އާންމު ބަދަލުތަކެއް ކަމުގައި ދެކި، އަޅާނުލާ ފަރުވާ ނުހޯދާ ހުރެވޭނަމަ އެ ކަން ކުރެވެނީ އަދި މުޅިން ރަނގަޅަކަށް ނޫނެވެ. ލޮލުގެ ފެނުމަށް އަންނަ ބަދަލުތައް އިތުބާރު ކުރެވޭ މީހުންނާ ހިއްސާކޮށް، ސިއްހީ އެހީތެރިއެއްގެ މަޝްވަރާ އެކަމުގައި ހޯދަން ވާނެއެވެ. ނޫން ނަމަ، ނޭނގި ހުރެ ލޮލަށް ބޮޑު ގެއްލުމެއް ލިބުމަކީ އެކަށީގެންވާ ކަމެކެވެ. އެހެނީ ލޮލުގެ އެތެރޭގެ ޕުރެސަރު މަތިވާކަން ނުވަތަ ނޫންކަން، އިންސާނާއަށް އިހުސާސް ނުކުރެވޭތީއެވެ. ލޮލުގެ އެތެރޭގެ ޕުރެސަރު މަތިވެ، ލޮލުގެ ހިއްސީ ނާރަށް ލިބޭ ގެއްލުމުގެ ސަބަބުން ލޮލުގެ ފެނުން ދާއިމަށް ގެއްލިދާ ހާލަތްތައް އާދެއެވެ. މި ހާލަތްތަކަށް ގުލުކޯމާއޭ ކިޔައެވެ. އެހެންކަމުން ލޮލުގެ ފެނުމަށް އަންނަ ބަދަލުތަކާއި މެފު ސަމާލުކަންދީ ސިއްހީ އެހީތެރިއެއްގެ ލަފާ އެކަންކަމުގައި ހޯދުން ބުއްދިވެރިއެވެ.
އިރުގެ އަތްވަކީ ލޮލުފެ ފަށަލަތަކަށް ގެއްލުން ހުރި އެއްޗެކެވެ. ނަމަވެސް އަހަރެމެންގެ ޠަބީއަތުގައި އަވީގައި އުޅުން މިއީ އާންމު އާދައިގެ ކަމެކެވެ. އައިނެއް ނާޅާ އުޅުމުން ގެއްލުމެއް ނުވާކަމަށް އަހަރެމެންނަށް ހީކުރެވެއެވެ. ފަހަރުގައި އެ މީހެއްގެ ލޮލުގެ ދުޅަހެޔޮަކަން ނިޔާ ކުރާ ގޮތުން މާ ބޮޑު ގެއްލުމެއް ލިބޭކަމުގެ އިހުސާސް ނުކޔރެވިދާނެއެވެ. ނަމަވެސް ލޮލުގެ ދުޅަހެޔޮކަން ކުޑަ މީހުންނަށް އިރުގެ އަތްވަކީ ވަރަށްވެސް ނުރައްކާތެރި އެއްޗެކެވެ. އެހެންކަމުން އަތްވަށް ނުކުންނައިރު އަވި އައިނު ބޭނުން ކުރުނަކީ ވަރަށްވެސް ބޭނުންތެރި ކަމެކެވެ.
އިރުގެ އަތްވާ އެއްގޮތަށް ހޫނަކީވެސް ލޮލަށް ގެއްލުން ދޭ އެއްޗެކެވެ. ލޮލުގެ ޠަބީއަތުން ލޮލަށް ފިނިކަން ބޭނުން ވެއެވެ. ލޮލުގެ ދުޅަހެޔޮކަން ދެމިގެން ދިއުމަށް ފިނި ކަމަކީ މުހިންމު ކަމެކެވެ.
މޫދު ލޮނަކީ ލޮލަށް ގެއްލުން ހުރި އެއްޗެއް ހެއްޔެވެ؟ ދިރާސާވެރިން މިކަމުގެ މައްޗަށް ބަހުސް ކުރައްވައެވެ. އޭގެ ޠަބީއަތުގައި މޫދު ލޮނަކީ ލޮލަށް ގެއްލުން ހުރި އެެއްޗެކެވެ. ނަމަވެސް ލޮލުރޯގާ ފަދަ ބަލިތަކުގައި މޫދު ލޮނުން ލޯ ދޮއެލުމުން، ލޮލުގައި ހުންނަ ޖަރާސީމުތައް ފަސޭހަކަމާއެކު ނެތިދާ ކަމަށްވެސް ބައެއް ދިރާސާތަކުގައި ވެއެވެ. ޖުމުލަގޮތެއްގައި މޫދު ލޮނުން ލޮލަށް ލިބޭ ފައިދާއަށްވުރެ ގެއްލުން ބޮޑެވެ. އެހެންކަމުން މޫދަށް އެރޭ އިރު، ލޮ ނިވާ ވާނޭފަދަ މޫނުމައްޗެއްް ބޭނުން ކުރުމަކީ ބުއްދިވެރި ކަމެކެވެ.
ގިނަވަގުތު އެކިކަހަލަ ސްކްރީން ތަކަށް ނުބެލުމަކީ ދުޅަހެޔޮ ލޮލަކަށް މުހިންމު ކަމެކެވެ. ދުންފަތުގެ ދުމަކީވެސް ލޮލަށް އޭގެ ގެއްލުން ފޯރުވާ އެއްޗެކެވެ. ހިރަފުހާ އެކި ކަހަލަ ޖައްވު ކުނޑި އަކީވެސް ލޮލަށް ގެއްލުން ކުރުވާ ތަކެއްޗެވެ. ނަމަވެސް އިންސާނާގެ ލޯ މާތް ﷲ ހައްދަވާފާގޮތުން މި ތަކެއްޗަށް ލޮލަށް ވަދެގަތުން ވަނީ އުނދަގޫ ކަމަކަށެވެ. ނަމަވެސް ދުޅަހެޔޮ ލޮލެއް އެދޭނަމަ މިކަންކަމަށް ފަރުވާތެރިވާން ވާނެއެވެ. އަދި މިނޫނަސް ދުޅަހެޔޮ ލޮލެއް އެދޭމީހަކު ކުރާނޭ ކިތައްމެ ކަމެއް ހުންނާނެއެވެ. މި ބަލާލި ފަސޭހައިން އާންމުކޮށް ކުރެވިދާނޭ ބައެއް ކަންކަމަށެވެ.