ދިވެހި ފަސްގަނޑުގައި ދިވެހިންނަކީ މުސްލިމުން ކަމުގައި ދެކިގެން އުޅޭ ބައެކެވެ. އަދި މިއީ ސައްތައިންސައްތަ އިސްލާމީ ގައުމެއްވެސް މެއެވެ. ދިވެހިންނަކީ އަގީދާ ސާފު މުސްލިމުންނެވެ. ނަމަވެސް އަދު މި ގަބޫލުކުރުމާ ދެކޮޅުވެވޭ ބައެއް ހާލަތްތައްވެސް އެބަ އާދެއެވެ. މިއީ ދިވެހިރާއްޖޭގެ ރަށެއްގައި ހުރި ސައި ހޮޓަލެއްގެ ތެރެއިން އިވުނު ހިތާމަވެރި އަޑެއްގެ ވާހަކައެވެ.

މަޣްރިބް ނަމާދުކޮށްލައިގެން ރައްޓެހިން ތަކަކާއި އެކު ޒުވާނަކު ކޮފީއަކަށް ދިޔައެވެ. އޭރު އެ ސައި ހޮޓާ ތެރޭގެ އެކި ހިސާބުތަކުގައި މީހުން ތިއްބެވެ. ކޮފީއަށް ގޮސް ކޮފީއަށް އޯޑަރުދިނުމުން ކޮފީ ގެނެސްދީފިއެވެ. އެއާއެކު އެ ޒުވާނުން ކޮފީ ބޮމުން، ދުނިޔެވީ ބައެއް ވާހަކަތައް ދައްކަމުން ދިޔައެވެ. ވަގުތު އޭގެ ހަލުވިކަމަށް ބަދަލެއް ނައިސް ހިނގަމުން ދިޔައެވެ. އިޝާނަމާދުގެ ވަގުތު ކުޑަތަން ވަމުން ދިޔައެވެ.

އެ ޒުވާނުން ކޮފީ ބޯން ތިބި މޭޒާއި ޖެހިގެން ދެން ހުރި މޭޒުގައި ދިވެހި ދެތިން ފިރިހެނުންނާއި ފަރަންޖީ އަންހެނަކު އިނެވެ. އެމީހުންނަކީ މި ޒުވާނުން ކޮފީބޯން އައި އިރުވެސް އެ މޭޒުގައި ތިބި ބައެކެވެ. ހަމަ ޔަގީނުންވެސް އެމީހުން ނަކަށް މަޣްރިބް ނަމާދު ކުރާނޭ ފުރުސަތެއް ވަގުތެއް ނުމެ ލިބޭނެއެވެ. އެހާ ކުރިން އެތަނަށް އައިސް ތިބި ބައެކެވެ. އެމީހުންގެ ވާހަކަތަކުން އެއީ އިރު އޮށްސުމުގެ ކުރިން އައިސް ތިބި ބައެއްކަން އިނގެއެވެ.

އެ މޭޒުގަތި ތިބި ދެތިން ފިރިހެނުން ތެރެއިން އެކަކު ތެދުވެ، އިޝާ ނަމާދު ވަގުތު ގާތްވަނީ ކަމަށާއި އަދި މަޣްރިބު ނަމާދު ނުކުރާ ކަމަށް ބުނެ ދާން އުޅުނެވެ. އެ މޭޒުދޮށުގައި ދެން ތިބި މީހުންވެސް ތެދުވޭތޯ އެ މީހާ މަޑުކޮށްލިއެވެ. އަދި އެމީހުން ނުދަންތޯ އެ މީހަކު ސުވާލު ކުރިއެވެ. ދެން އެއާއި އެކު އެ މޭޒުދޮށުން އިވުނީ ހަގީގަތުގައި ވަރަށްވެސް ދެރަވަރު އަޑެވެ. "އިހަށް މަޑުކޮށްބަލާށޭ.. ނަމާދު ޤަޟާ އަށްވެސް ކުރެވޭނެއޭ" ބުނި އަޑެވެ. ނަމަވެސް އެމީހަކު ދެން ތިބި މީހުން ބައިތިއްބައިފަ ހިނގައްޖެއެވެ. 

ކޮންމެއަކަސް އިޝާނަމާދު ވަގުތު ޖެހި ބަންގި ގޮވައިފިއެވެ. އޭރުވެސް އެ މީހުން އެ މޭޒު ދޮށުގައި މަޑުކޮށްގެން ތިއްބެވެ. ބަންގީގެ ވަގުތު ޖެހުމާއި އެކު ފަހުން މި އައި ޒުވާނުން މިސްކިތާއި ދިމާލަށް މިސްރާބު ޖެހިއެވެ. އޭރުވެސް އެވެރިން އެ މޭޒު ދޮށުގައި ތިއްބެވެ.

މި ޒުވާނުން މިސްކިތުން ނަމާދުކޮށްގެން އެނބުރި އެ ސައި ހޮޓާ ކުރި ކަނޑާލާފައި ގެއަށްދިޔަ އިރުވެސް، އެވެރިން ހަމަ އެ މޭޒުދޮށުގައި ތިއްބެވެ. މިއީ ހިތާމަ ހުރި މަންޒަރެކެވެ. އާދައިގެ ކަމަކަށް ހަދައިގެން ނަމާދު އަޅަނީއެވެ. އަދި ޤަޟާ ކުރުމުގެ ހުއްދައަށް ހަޖޫ ޖަހާ މަލާމާތް ކުރަނީއެވެ. ގަސްތުގާ ނަމާދު އަޅާ މީހާއަށް ޤަޟާ ކުރުން ނުވާކަމަށް ޢިލްމުވެރިން ވިދާޅުވެއެވެ. ނަމާދު ޤަޟާ ކުރެވެނީ ނިދުމާއި ހަނދާންނެތުން ފަދަ އުޒުރެއް މެދުވެރި ވެގެންނެވެ.

ނަމާދު ޤަޟާ ކުރެވޭނޭ ބުނެ، ގަސްތުގައި ނަމާދު އަޅަން އެވެރިންނަށް ކެރުނީ ކިހިނެއްބާއެވެ. ހިތާމަ ހުއްޓެވެ. އޭ ޒުވާނުންނޭވެ. ވަގުތު ފާއިތުނުވަނީސް އިސްލާހުވާށެވެ. ހެޔޮވިސްނުން އިސްކުރާށެވެ.