ފިކުރަށް ވިސްނުމާ ހިޔާލުކުރުމަށްވުރެ ކަންކަން އުފެދި، ވަމުން ދިއުމުގައި އިންސާނާގެ އަމަލުތައް އަދާކުރަނީ ވަރަށްވެސް ބޮޑު ދައުރެކެވެ. އެވެނި މިވެނި ކަމެއް ކުރުމަށް ގަސްތުކުޅައަސް އަދި ކިއެއް އެވެނި މިވެނި ކަމެކޭ ތިމާ ކުރާ ހިތްވަނީ ހިތަށް އެރިނަމަވެސް، ހަގީގަތުގައި އެ ކަމެއް ކުރާހިތްވާކަން އެނގޭނީ އެކަމެއް ކުރަން ފެށުމުންނެވެ.

އިންސާނާގެ ދިރިއުޅުމުގައި އޭނާ އަސްލު ބޭނުންވާ އެއްޗެއް ނުވަތަ ކަމެއް ހޯދާނީ ކިހިނެއް ހެއްޔެވެ؟ އިންސާނާ ބޭނުންވަނީ އެވެނި މިވެނި ކަމެއް ކަމަށް ހީވާ ކަންކަމަށް އިންސާނާގެ ނަފުސު ލެނގިލައިގެން އެކަމާ ދިމާއަށް ފިޔަވަޅު އަޅައެވެ. އެއީ އަހަރެމެން ކޮންމެ މީހަކަށްވެސް އެމީހެއްގެ އުންމީދުތައް ހާސިލްކުރުމަށް ކުރެވޭ މަސައްކަތުގެ ފުރަތަމަ މަރުހަލާއެވެ.

މިސާލަކަށް އިންސާނެއްގެ ފުރާވަރުގެ އަހަރުތަކުގެ ބޮޑު ބައެއް ހޭދަކުރީ އޭނާ ދުނިޔޭގައި ހޭދަކުރާ ވަގުތުގައި ކުރަން ބޭނުންވާ ކަމަކީ އަމިއްލަ ވިޔަފާރިއެއް ފެށުން ކަމުގައި ވާނަމަ އެހެން ހީކޮށް އުންމީދު ކުރުމާއެކު އެކަން ކުރަން މަސައްކަތް ފަަށައެވެ. ނަމަވެސް އެކަންކަން ކުރަން ފެށުމާއި އެކު ދިމައިވާ ބައެއް ގޮންޖެހުންތަކާއި ތުރާތަކުގެ ސަބަބުން އެކަމެއް ކުރުމުގެ ޝައުގު ގެއްލިދެއެވެ. ހަމަ އެގޮތަށް މިސާލަކަށް ޓީޗަރަކަށް ވާން ބޭނުން ވެގެން ހިތްވެގެން އެކަން ފަށާ މީހަކު، އެކަމުގެ ތެރޭގައު އުޅުމުން، ދިމައިވާ ކަންކަމާއި ހުރެ ޓީޗަރަކަށް ވުމުގެ ޝައުގު ގެއްލިދެއެވެ. އެހެންކަމުން ދަންނަވަން މިއުޅެނީ ހިތްވިޔަސް، ޝައުގުވެރިވިޔަސް އެކަމެއް ތިމާއަށް ކުރެވޭކަން އިނގޭނީ އެކަމަކާ ކުރިމަތި ލުމުންނެވެ. ކުރާ ހިތްވާކަމެއް، ކުރެވޭނޭ ބުނި ކަމުގައި ވީނަމަވެސް، އެކަމެއް ކުރަން ފެށުމުން އެކަމަކުން ދިމައިވާ ކަންކަމުގެ ސަބަބުން އިންސާނާގެ ހިތް މުޅިން ބަދަލުވެފައި ވަނީ ވަރަށްވެސް ގިނައިންނެވެ.

ހިޔާލުކުރި ކަމުގައި ވީނަމަވެސް ނުވަތަ އުންމީދު ކުރި ކަމުގައި ވީނަމަވެސް ޢަމަލުން އެކަންކަން ކުރަން އެބަ ޖެހެއެވެ. ހިޔާލުގައި ކުރުހޭ ގޮތާއި ޢަމަލުން ކަންކުރެވޭ ގޮތް ހާސްބައި ތަފާތެވެ. އެހެންކަމުން ހިޔާލުކުރުމުގެ ބަދަލުގައި އެކަމެއް ކުރެވޭތޯ ކޮންމެވެސް މަސައްކަތެއް ކުރާށެވެ. މިސާލަކަށް ކައްކަން ދަސްވާނީ ކައްކައިގެންނެވެ. ލިޔުމުގެ ފަންނަށް މޭސްތިރިވާނީ ކޮންމެ ދުވަހަކުވެސް ލިޔަން އިށީނދެގެންނެވެ. ނަމަވެސް އެ ކަމެއް ފެށުމުން ކުރިއަށް ނުދާނަމަ، އެކަމަށް އޮންނަ ޝައުގު ހިތުން ބަދަލުވެ ދެއެވެ.

ޝައުޤުވެރިކަމުގެ ތެރެއިން މަސައްކަތުގެ މަގުގައި ހިނގާއިރު، ތަޖުރިބާ ލިބި، ތިބާ ބޭނުންވާ ކަމަށް ހީވާ ގޮތާ ދިމާއަށް މަސައްކަތް ކުރާއިރު، ތިބާ އަސްލު ބޭނުންވާ ކަންކަމުގެ ޖަވާބު ތިބާއަށް ހާމަވެގެންދާނެއެވެ.

އަސްލު ބޭނުންވަނީ، އެއަށް ވަންނަން ޖެހޭ މިސްރާބެވެ. ބޭނުންވަނީ ހަމައެކަނި “ކޮންތާކު”، “ކިހިނެއް” ނޫނެވެ. މަގުގައި ހިނގަން ފެށުމުން އެ މަރުހަލާއަަސް އިތުބާރު ކުރަން ފެށުމުން، ޖަވާބުތައް ތިބާއަށް ހާމަވާން ފަށައި، މަގު ފެންނަން ފަށައެވެ.

ހަގީގަތުގައި އިންސާނާ ބޭނުންވާ ކަންކަން އިނގޭނީ ކަންކަން ކުރަން އުޅުމުންނެވެ. އަދި ހިތަށް އެރިޔަސް އެއީ ކުރާ ހިތްވަަ ކަމެއް ކަމުގައި ނުވެއެވެ.