ދެމަފިރިއަކު ކައިވެނީގެ ގޮތުން ގުޅި، އެ ގުޅުމުގެ ތެރެއިން އާއިލާއެއް ބިނާކުރަނީ ނުހަނު ލޯތްބާއި ކުލުނާއި އެކުގައެވެ. މި ލޯތްބާއި ކުކުނާއި އެކު އެތައް އަހަރުތަކެއްގެ ތެރެއިން ކާމިޔާބު އުފާވެރި އާއިލާއެއް ބިނާކުރެއެވެ. އުފާވެރިކަމުގައި ކޮންމެ އާއިލާއެއްވެސް ތާ އަބަދު ހޭދަކުރަން އެދެއެވެ. ނަމަވެސް ދުވަސްވީ ފުރިހަމަ އެތައް އާއިލާތަކެއް ރޫޅިގެންދާ މަންޒަރު ކިތަންމެހާވެސް ގިނައިން ފެނެއެވެ. އަނބިމީހާ ނުވަތަ ފިރިމީހާގެ އުޅުމުގައި އަނެކާ ހިތްހަމަ ނުޖެހޭ ކަންތައްތަކެއް ފެންނާތީ ކަމުގައިވެސް ވެދާނެއެވެ. ނަމަވެސް މިފަދައިން ރޫޅިދާ އެއްވެސް އާއިލާއެއްގައި އެ އާއިލާގެ ރަމްޒު ކަމުގައިވާ ދަރީންނަށް ފޫނުބެއްދޭފަދަ އެތައް ގެއްލުންތަކެއް ކުރިމަތިވެއެވެ.
މާތް ﷲ ހުއްދަކުރައްވާފައިވާ ކަންތައްތަކުގެ ތެރެއިން ވަރި އަކީ އެކަލާންގެ އެންމެ ނުރުއްސަވާ ކަންތައް ކަމުގައި އިލްމުވެރިންގެ ބަސްފުޅުތަކުން އިނގެއެވެ. ވީއިރު އާއިލާތައް ރޫޅި އާއިލާތަކުގައި މައްސަލަތައް ޖެހި ވަރިއާއި ހިސާބަށް ގޮސްފާނޭ އެއްވެސް ކަމެއް އެއްވެސް ދެމަފިރިއަކު ކޮށްގެން ނުވާނެއެވެ. ހާއްސަކޮށް އެ ދެމަފިރިންގެ ދަރީން ދުނިޔޭގައި ތިބި ހާލުގައެވެ.
ފިރިހެނާގެ މައްޗަށް ހަތަރު އަނބިން ހުއްދަކުރައްވާފައި އޮތްކަމީ އަހަރެމެން އެންމެންވެސް ދަންނަ ކަމެކެވެ. އަދި ހާއްސަކޮށް އަހަރެމެންގެ ތެރެއިން ހަމަ ކޮންމެ ފިރިހެނަކަށްވެސް ވަރަށް ފަރިތަކަމާއި އެކު އިނގޭ ސުއްނަތެއްވެސް މެއެވެ. ކައިވެއްޏެއްގެ ތެރެއިން، އިތުރު އެހެން ކައިވެންޏެއް ކުރަން ފިރިމީހާ އެދޭނަމަ އެކަމުގައި އެއްވެސް މައްސަލައެއް ނެތެވެ. ދަރިން ލިބި އެދަރިން ބޮޑެތިވެފައި ވީ ކަމުގައި ވީނަމަވެސް މެއެވެ. ނަމަވެސް އަހަރެމެންގެ މުޖުތަމައުގައި މިފަދައިން ކުރެވޭ ގިނަ ކައިވެނިތަކުގެ ސަބަބުން ފެންނަނީ އާއިލާތައް ރޫޅިދާ ތަނެވެ. ގިނަ ދުވަސްވީ ވަރުގަދަ ލޯތްބާއި ކުލުނުން ފުރިފައިވާ ބަދަހި އާއިލާތައް ހަލާކުވެގެންދާ ތަނެވެ. އަދި އެފަދައިން ކައިވެނި ކުރާ ފިރިހެނާ ނުވަތަ ދަރީންގެ ބައްޕައާއި މެދު ދަރީންވެސް ހިތްހަމަ ނުޖެހޭ ތަން ފެންނަނީ މަދެއްކޮށެއް ނޫނެވެ. އެފަދަ ހިތްހަމަ ނުޖެހުންތަކާއި އަރާރުންވުމުގައި މައިވަންތަކަމާއި ބަފާވަންތަކަމުގެ އިހުސާސް ދަރިންގެ ކިބައިން ފިލާދާ ހާލަތްތައް ފެންނަނީ މަދެއް ކޮށެއް ނޫނެވެ. އާއިލާތަކުގެ ތެރޭގައި އެތައް އެތައް މައްސަލަތަކެއް ފެންމަތިވަނީ މަދެއްކޮށެއް ނޫނެވެ. މިއީ ގިނަފަހަރަށް އަހަރެމެން އާންމުކޮށް ދައްކާ އުޅޭ ވާހަކައެއް ނޫނެވެ. ނަމަވެސް މިފަދަ ކަންކަން ހައްލުކޮށް ބަދަހި އާއިލާތައް އެ ބަދަހި ކަމުގައި ދެމިތިބުމަކީ ކޮންމެހެންވެސް މުހިންމު ކަމެކެވެ.
ފިރިހެނާގެ މައްޗަށް ހަތަރު އަނބިން ހުއްދަކަމުގައި ވީނަމަވެސް، ގިނަ އަންހެންވެރިންގރ ނަޒަރުގައި ގިނަ ފިރިހެންވެރިންގެ އެ ޝަރުތުތައް ހަމައެއް ނުވެއެވެ. އަދި ހަމަވީކަމުގައި ވީނަމަވެސް، ތިމާގެ ފިރިމީހާ އެހެން އަންހެނަކާ ކައިވެނީގެ ގޮތުން ގުޅިގެން އުޅޭކަށް ގިނަ އަންހެންވެރިންގެ ހިތެއް ހަމައެއްވެސް ނުޖެހެއެވެ. މިފަދަ އާއިލާތަކުގައި މައްސަލަޖެހި ރޫޅިދާ އެއް ސަބަބަކީ ބައެއް އަންހެނުންގެ ޒީލަ ގަދަކަމާއި ގޮތް ދޫނުކުރުމާއި، ފިރިމީހާގެ މައްޗަށް އޮތް އެ ހައްގު ގަބޫލު ނުކުރުން ކަމުގައި ވެފައި ވެއެވެ.
ހަމައެއާއި އެކު ފިރިހެނާގެ މައްސަލަތައްވެސް މަދެއް ނޫނެވެ. އަންހެންވެރިން އެ ބުނަނީވެސް މުޅިން ދޮގު ވާހަކައެއް ނޫނެވެ. ޝަރުތު ހަމަނުވާ ހާލުގައިވެސް ދެވަނަ ކައިވެންޏަކަށް ފިރިހެނާގެ ހިތް ކިޔަނީއެވެ. ހަމަނުވާ ޝަރުތުތަކެއްގެ މައްޗަށް ބިނާ ކުރާ ގުޅުމެއްގެ ސަބަބުން ހަރުދަނާކަމެއް ހަމަ ޖެހުމެއް ނުވާނެއެވެ. އަދި އަނެއްބައި ފަހަރަށް އެހެން ގުޅުންތަކަށްވެސް އޭގެ އަސަރު ފޯރައެވެ.
ދަރިން ލިބި އެ ދަރިން ބޮޑެތިވެފައިވާ ހާލު، އެ ދަރިންގެ ބައްޕަ އެހެން ކައިވެންޏެއް ކުރަން އެދޭނަމަ އެކަމާ ދެކޮޅު ހެދުމެއް އެއްވެސް ދަރިއަކަށް ނުވާނެއެވެ. ނަމަވެސް މިފަދަ ހާލަތްތަކުގައި އެ ބައްޕައާއި މެދު ދަރިންގެ ހިތްނުތަނަވަސްވުން އުފެދެނީ އެ ދަރިންގެ މަންމަ އާއި މެދު އެ ދަރިންގެ ބައްޕަ އިހުމާލުވާތަން ފާޅުގައި އެ ދަރިންނަށް ފެންނާތީއެވެ. ކޮންމެ ގޮތެއްވިޔަސް، ދަރިންގެ ކުރިމަތީގައި އެ ދަރިންގެ މަންމަގެ ދަރަޖަ، ބައްޕައަށްވުރެ ބޮޑުވާނެއެވެ.
އެހެން ކަމުން ދެ އަނތްބަށް މީހަކާ އިންނަ ނަމަ، ތިމާގެ ޝަރުތު ހަމަވޭތޯ ބަަލަންވާނެއެވެ. އަދި ތިމާގެ ދަރިން ތިބިކަމުގައި ވަނީނަމަ، އެ ދަރިންގެ މަންމައަށް ކުޑަނަމަވެސް އިހާނެތިކަމެއް ވިޔަދީގެން ނުވާނެއެވެ. އެހެނީ އޭގެ ސަބަބުން އެ ބައްޕައާއި އެ ދަރިންގެ ދެމެދުގައިވާ ގުޅުމަށް ނޭދެވޭ އަސަރެއް ކޮށްފާނެތީއެވެ. އާއިލާތައް ރޫޅިގެން ދިއުމުގައި ދެވަނަ ކައިވެންޏެއްގެ ފެށުން ވެގެން ގޮސްފައިވަނީ ވަރަށް އާންމު ކަމަކަށެވެ. ޓީވީތަކުން ދައްކާ ތަމްސީލުތަކުގައިވެސް ގިނަފަހަރަށް އާއިލީ މައްސަލަތަކުގެ ގޮތުގައި ދައްކުވަނީވެސް މިފަދަ ހާލަތްތަކެވެ. އުފާވެރި އަދި ބާއްޖަވެރި އާއެއް ބިނާކުރުމުގައި އަނބިންނާއި ފިރިންނާއި އަދި ދަރީންގެ ހައްގުތަކަށް ވިސްނާ އެބައިމީހުންނާއި އޮންނަ ގުޅުން ދުވަހަކަށްވުރެ ދުވަހެއް ބަދަހިކުރެވޭތޯ ބަލާށެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން