ހެޔޮލަފާ އެކުވެރިން އިޚްތިޔާރު ކުރުމަކީ މުހިއްމު ކަމެކެވެ. އެކުވެރިންނަށް ހެޔޮގޮތް ވުމަށް އެދި ހެޔޮ ދުޢާ ކޮށްދޭންޖެހެއެވެ. ހެޔޮލަފާ އެކުވެރިންނަކީ މަދު ބައެކެވެ. ޤިޔާމަތް ދުވަހުން އެކުވެރިންތައް ވާނީ ޢަދުއްވުން ކަމުގައެވެ. ތަޤްވާވެރި، ޞާލިޙް އެކުވެރިން ފިޔަވައެވެ.

ހެޔޮލަފާ އެކުވެރިން ލިބުނު އެދޭ ނަމަ ތިބާގެ އީމާންތެރިކަން އިތުރުކުރާށެވެ. އަދި ޞާލިޙް ހެޔޮ ޢަމަލުތައް ކުރުން ގިނަ ކުރާށެވެ. އީމާންވެ، ޞާލިޙް ޢަމަލުކުރާ މީހަކަށް މީސްތަކުންގެ ލޯބި ލިބޭނެކަން މާތްﷲ، ކީރިތި ޤުރުއާނުގައި ކަށަވަރުކޮށް ދެއްވައިފައިވެއެވެ. އިސްވެ މި ދެންނެވި ދެ ޝަރުތު ފުރިހަމަވާ މީހުންގެ މަޤްބޫލުކަން ހެޔޮލަފާ ޞާލިޙު މީހުންގެ ގާތުގައި މާތް ﷲ އިތުރުކޮށްދެއްވާނެކަން ވެސް ޤުރުއާނާއި ސުންނަތުގެ ދަލީލުތަކުން އެނގެއެވެ. މިފަދަ އެއް ދަލީލަކީ މަރްޔަމް ސޫރަތުގެ 96 ވަނަ އާޔަތެވެ. އެ އާޔަތުގައި މާތް ﷲ ވަޙީކުރެއްވިއެވެ. ﴿إِنَّ ٱلَّذِينَ ءَامَنُوا۟ وَعَمِلُوا۟ ٱلصَّـٰلِحَـٰتِ سَيَجْعَلُ لَهُمُ ٱلرَّحْمَـٰنُ وُدًّۭا﴾ (މަރްޔަމް: 96) މާނައި: "ހަމަކަށަވަރުން، އީމާންވެ، ޞާލިޙު ޢަމަލުތައް ކުޅަ މީހުން (ދަންނާށެވެ!) ރަޙްމާންވަންތަ ރަސްކަލާނގެ، އެއުރެންނަށް ޓަކައި ލޯބިލައްވާނެތެވެ."

މި އާޔަތުން އެނގޭ ގޮތުގައި (މުއުމިނުންގެ) ލޯތްބާއި އިޙްތިރާމަކީ ގަދަމުން ލިބޭ އެއްޗެއް ނޫނެވެ. މިއީ އިލާހީ ދެއްވުމެކެވެ. އީމާންވެ، ޞާލިޙް ޢަމަލު ކުރާ މީހާ ބުނާ ބަހުގައި އަސަރު ހުންނާނެއެވެ. އީމާންވެ، ޞާލިޙް ޢަމަލު ކުރާ މީހާ ކަމަކަށް އެދެފިއްޔާ އެކަން ކުރުމުގެ ޝައުޤުވެރިކަން މާތް ﷲ މުއުމިނުންގެ ހިތްތަކުގައި ލައްވާނެތެވެ. 

މިފަދަ އަނެއް ދަލީލަކީ އަބޫ ހުރައިރާ ރިވާކުރައްވައިފައިވާ ޙަދީޘްފުޅެކެވެ. އެ ޙަދީޘްފުޅުގެ މާނައިގައިވެއެވެ. "އަޅަކުދެކެ ﷲ ލޯބިވެވޮޑިގެންފި ނަމަ އެކަލާނގެ ޖިބްރީލްގެފާނަށް ދަންނަވަތެވެ. އޭ ޖިބްރީލްގެފާނެވެ. ތިމަން ﷲ މިވެނި އަޅަކު ދެކެ ލޯބިވެވޮޑިގެންފީމެވެ. ތިބާ ވެސް އެ މީހާ ދެކެ ލޯބިވެވަޑައިގަންނަވާށެވެ. ދެން ޖިބްރީލުގެފާނު އެ އަޅާދެކެ ލޯބިވެ ވަޑައިގަންނަވަތެވެ. ދެން ޖިބްރީލްގެފާނު އުޑުގެ އަހުލުވެރިންނަށް ގޮވައިލައްވާނެތެވެ. ހަމަކަށަވަރުން ﷲ މިވެނި އަޅަކުދެކެ ލޯބިވެވޮޑިގެންފިއެވެ. ފަހެ ތިޔަބައިމީހުން އެ އަޅާދެކެ ލޯބިވެވަޑައިގަންނަވާށެވެ. ދެން އުޑުގެ އަހުލުވެރިން އެ އަޅަކުދެކެ ލޯބިވެ ވަޑައިގަންނަވާނެތެވެ. އެއަށްފަހު ބިމުގެ އަހުލުވެރީންގެ ހިތްތަކުގައި އެ އަޅަކަށް މަޤްބޫލުކަން ލައްވަތެވެ." (ޞަޙީޙް ބުޚާރީ 3209)

މި ޙަދީޘްފުޅުން ދޭހަވާ ގޮތުގައި ﷲގެ ލޯބި ލިބިއްޖެ އަޅަކަށް އުޑާއި ބިމުގެ އަހުލުވެރިންގެ ލޯބި ލިބޭނެއެވެ. ކޮންފަދަ ނިޢުމަތެއްތޯއެވެ!

މިކަމުގެ އަނެއް ދަލީލަކީ އިމާމު ސުފްޔާނުއްޘައުރީގެ ބަސްފުޅެކެވެ. އެކަލޭގެފާނު ވިދާޅުވިއެވެ. "ތިބާއާއި މާތް ﷲއާއި ދެމެދު ގުޅުން ރަނގަޅުކުރާށެވެ. އޭރުން ﷲ، ތިބާއާއި އެހެން މީހުންނާ އޮންނަ ގުޅުންތައް ރަނގަޅުކޮށްދެއްވާނެތެވެ."

ހެޔޮލަފާ އެކުވެރީންނަކީ ވަރަށް ބޮޑު ނިޢުމަތެކެވެ. ދުނިޔެވީ ކަންކަމުގައްޔާއި އުޚްރަވީ ކަންކަމުގައި ވެސް ނުހަނު ވާގިވެރި ބަޔަކު ކަމުގައި އެބައިމީހުންވާނެއެވެ. ހެޔޮލަފާ ޞާލިޙު އެކުވެރިން، ތިބާ ކާމިޔާބީގެ އައްސޭރިއަށް ގެންގޮސްދޭނެކަން ކަހަފް ސޫރަތުން އެނގެއެވެ.

ތެދުމަގު ގެއްލި ކަސިޔާރު ވެފައިތިބި ކިތައް ކިތައް މީހުންނަށް ހެޔޮލަފާ އެކުވެރީންގެ ސަބަބުން ތެދުމަގު ލިބިފައިވޭތޯވެ؟ ހެޔޮމަގުގައި ޘާބިތުވުމަށް، ރަނގަޅު އެކުވެރިންގެ ދައުރު ބޮޑެވެ. 

މާތް ﷲ، ލޯބިވެވޮޑިގެންވާ އަޅުންގެ ތެރެއިން އަޅަމެން ލައްވާށިއެވެ! އަދި އަޅަމެންނަށް ހެޔޮލަފާ އެކުވެރިން ދެއްވާނދޭވެ!

 

(ހެޔޮލަފާ އެކުވެރިން އިޚްތިޔާރުކުރުން – އައްޝައިޙް މުޙައްމަދު މަޢޫން ޝަރީފް؛ ދީނުގެ މަގު، އަހަރު 3، އަދަދު 51، ޞ.4، 15 ޑިސެންބަރު 2023)