ނިދި އައުމާއި ނިދުމާއި ނިދިން ހޭލެވުމާއި، ހޭލެވުމާއި އެކު ތެދުވުމާއި ނުވަތަ އެނދުގައި އޮތުމާއި މިއީ އަހަރެމެންގެ އާންމު ދިރިއުޅުމުގަ އާންމު އާދައިގެ ކަންކަމެވެ. ނަމަވެސް މިކަންކަމަކީ އަހަރެމެން އެ ކަންކަމާއި މެދު ވިސްނާ ފިކުރު ކޮށްލުމުން ވަރަށްގިނަ ކަންކަން އަހަރެމެންނަށް އެނގޭ ކަންކަމެވެ. މި ލިޔުމުގައި މި ބަލާލަނީ ނިދިން ހޭލެވުމާއި އެކު ނުތެދުވެ އެނދުގާ އޮވެވޭ އޮތުމުގެ މައްޗަށެވެ. މިއީ އަހަރެމެންގެ އާންމު ދިރިއުޅުމުގައި ހަމަ ކޮންމެ މީހަކަށްވެސް ކުރެވޭ ކަމެކެވެ.

އާދޭހެވެ! ނިދިން ހަމަ ހޭލެވުމާއި އެކު ކުއްލި ގޮތަކަށް އެނދުން ތެދުވުމަކީ އުނދަގޫ ކަމެކެވެ. އަދި އެއީ މުޅިން ރަނގަޅު ގޮތެއްވެސް ނޫނެވެ. ހަގީގަތަކީ ނިންޖަކީވެސް އިންސާނާ އަށް ވަރުބަލިކަމެއް އިހުސާސް ކުރުވާ ކަމެއް ކަމެވެ. ނަމަވެސް އެއީ އެހެން ކަހަލަ ވަރުބަލި ކަމެކެވެ. އެ ވަރުބަލިކަން ފިލާ ދަނީ ނިދިން ހޭލެވި މާހައުލުގެ ހާލަތަށް ސިކުނޑި ހޭނެން ފެށުމުންނެވެ. މިވަގުތު ކޮޅަކީ އިންސާނާ އޭނާގެ ތަންމަތީގައި އޮންނަ ވަގުތުކޮޅެކެވެ. މި ވަގުތު ކޮޅުގެ ތެރޭގައި އިންސާނާ އޭނާގެ މާހައުލު ބަލާ ހޯދާނެއެވެ. ގަސްތުގައި ނުވަތަ ބޭ އިހްތިޔާރުގައެވެ. ހަމަ އެއާއިއެކު ނިދީގައި ހަރަކާތް ހުއްޓިފައިވާ ހަށިގަނޑުގެ ބައެއް މަސްތަކަށް ވާންކޮށްލާ ހަރުވެ ކުރުގެޅިފައިވާ ހަތާރުތައް އޭގެ އަސްލު ހާލަށް ގެނައުމަށްޓަކައި މޯޅިއަށް ދެމެއެވެ. މިއީ ކުޑަކުދިން ވަރަށް އާންމުކޮށް ކޮށް އުޅޭ ކަމެކެވެ. ނަމަވެސް ބޮޑުވަމުން އަންނަ ވަރަކަށް މިކަން ވެގެން ދަނީ އިހްތިޔާރީ ކަމަކަށެވެ. ހަގީގަތަކީ ނިދިން ހޭލެވުމާއި ތަންމަތިން ތެދުވުމާއި ދޭތެރޭ އެ ހޭދަކުރާ ވަގުތުގައި މޯޅިއަށް ދެމިލުމަކީ ވަރަށްވެސް ބޭނުންތެރި އަދި އެހާމެ މުހިންމު ކަމެކެވެ. އެހެނީ އިސްވެ ދެންނެވިފަދައިން ހަށިގަނޑުގައި ހަރުވެ ކުރުގެޅިފައިވާ ހަތާރުތައް އޭގެ އަސްލަށް ވާސިލްވުމަށް މޯޅިއަށް ދެމުމަކީ މުހިންމު ކަމެކެވެ.

ނިދިން ހޭލެވުމާއި އެކު ތަންމަތީގައި މާ ގިނަ އިރު އޮތުމަކީވެސް ރަނގަޅު ކަމެއް ނޫނެވެ. އެކި ގޮތް ގޮތުން އެކަމުގައި ގެއްލުން ހުރި ކަމަށް ދިރާސާވެރިން ދެކިލައްވައެވެ. އެގޮތުން އެއް ކަމަކީ ނަފްސާނީ ގޮތުން އިންސާނާއަށް ކުރިމަތިވާ މައްސަލަތަކެވެ. އެފަދައިން ނިދިން ހޭލެވި މާހައުލުގެ ހާލަތަށް ސިކުނޑި ހޭލަމުން ދާއިރު، އިންސާނާ އެ ހާލަތަށް ހޭލައި ނުގަނެ ތަންމަތީގައި އޮންނަ އޮތުމުގެ ސަބަބުން ކަންނެތްކަމާއި ބުރަހެލިކަން އިހުސާސް ކުރުވާނެއެވެ. އަދި އެފަދައިން ގިނަ ވަގުތު އޮވެ، ދެން ތެދުވެ އުޅޭ އުޅުމުގައި ގެއްލޭ ވަގުތު ތަކުގެ މައްޗަށް އިންސާނާ ހިތާމަކުރެއެވެ. ގެއްލޭ ވަގުތަކީ އަނބުރާ ލިބޭ އެއްޗެއް ނޫންކަން އިންސާނާއަށް އެ ވަގުތުގައި ވަރަށް ފުރިހަމައަށް އިހުސާސް ކުރެވޭނެއެވެ. ނަތީޖާއަކަށް ވަނީ ކޮންމެވެސް ކަމަކާއި ހާސްވެ ނުތަނަވަސްވުން ފަދަ ކަންކަން އިންސާނާގެ ސިކުނޑިތެރޭގައި އެނބުރުމެވެ. އެހެން ކަމުން ކަންނެތްކަމާއި ބުރަހެލި ކަމާއި ހާސްކަމާއި ނުތަވަނަވަސްކަމުން ދުރުހެލިވުމަށް ހޭލެވުމާއި އެކު ތަންމަތީގައި ގިނަ ވަގުތު ހޭދަނުކޮށް ތެދުވަން އާދަކުރަން ޖެހެއެވެ.

މިފަދައިން ހޭލެވުމާއި އެކު ގިނަ އިރު އޮންނަ އޮތުމުގެ ސަބަބުން ހަށިގަނޑުގެ ގުނަންތަކަށް ލޭ ދައުރުކުރާ މިންވަރު މަދުވެދާ ކަމަށް ދިރާސާވެރިން ފާހަގަ ކުރެެއެވެ. ނަމަވެސް ހޭލާފައި އޮތުމުން މޫނުގެ ނުވަތަ މޫނާ ގުޅުން ހުރި / ގުޅިފައި ހުރި ގުނަންތަކުގެ މަސައްކަތްތައް ނުވަތަ ހަރަކާތްތައް ހިނގާނެތީ މޫނަށް ލޭ ދައުރު ކުރާ މިންވަރު އިތުރުވެއެވެ. އެގޮތަށް ހޭލެވުމާއި އެކު ގިނަ ވަގުތު ތަންމަތީގައި އޮންނަ މީހުންގެ މޫނު މަތި ދުޅަވެ ފޮއްސިވަނީ މި ސަބަބާ ހުރެކަމަށް ދިރާސާވެރިން ދެކިލައްވައެވެ. އެހެން ކަމުން ލަސްނުކޮށް ތެދުވުމަކީ މޫނުމަތީގެ ދުޅަ ނުވަތަ ފޮއްސިކަން ކުޑަކޮށްދޭ ކަމެކެވެ.

ހޭލެވުމާއި އެކު ތަންމަތީގައި ކުޑަ ވަގުތުކޮޅެއް ހޭދަ ކުރަން އެބަޖެހެއެވެ. އެހެނަސް އެ ވަގުތު ކޮޅު ދިގުލައިގެން ދިއުން ރަނގަޅެއް ނޫނެވެ. އެހެންކަމުން އެކަމުގައިވެސް މެދުމިނެއް ގެންގުޅުމަކީ ފުރިހަމަ ސިއްހަތަކަށްވެސް ފައިދާހުރި ކަމެކެވެ.