ރާއްޖޭގައި އެންމެ ފުރަތަމަ ހުޅުވި ދަނޑުވެރިކަމުގެ މަތީ ތައުލީމު ފޯރުކޮށްދޭ ސްކޫލް، މައި ކޮލެޖުން އެ ދާއިރާ ކުރިއަރުވަން ކުރާ މަސައްކަތުގެ އަގުވަޒަންކުރުމުގެ ގޮތުން ސަރުކާރުން ހާއްސަ އެވޯޑެއް ދީފިއެވެ.
މައި ކޮލެޖުގެ ސްކޫލް އޮފް އެގްރިކަލްޗަރ އަށް މި އެވޯޑް ދެއްވީ، ދަނޑުވެރިންގެ ދުވަހާއި ބައިނަލްއަގުވާމީ ކާބޯތަކެތީގެ ދުވަހުގެ މުނާސަބަތުގައި މިރޭ ކ. ކާށިދޫގައި ބޭއްވި ޖަލްސާގައެވެ.
ރާއްޖޭގެ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުގެ އަތްޕުޅުން ދެއްވި މި އެވޯޑާ މައި ކޮލެޖުގެ ފަރާތުން ހަވާލުވީ އެ ތަނުގެ ޗެއާމަން އަހުމަދު މޮޓާކީ އާއި ރެކްޓާ ލަމްޔާ އަބްދުލް ހާދީ އެވެ.
މައި ކޮލެޖުން އައްޑޫގައި ހިންގާ ސްކޫލް އޮފް އެގްރިކަލްޗަރ އަކީ ދަނޑުވެރިކަމުގެ މަތީ ތައުލީމު ފޯރުކޮށްދިނުމުގެ މަގްޞަދުގައި ރާއްޖޭގައި އެންމެ ފުރަތަމަ އުފެއްދި ދަނޑުވެރިކަމުގެ ސްކޫލެވެ.
އެ ކޮލެޖުގައި މިހާރު ހިންގާ ކޯސްތަކުގެ ތެރޭގައި، ސެޓްފިކެޓް 3 އިން ގާޑްނިން އާއި މި ދާއިރާގެ ތަފާތު ކުރު މުއްދަތުގެ އެކި ކޯސްތައް ހިމެނެއެވެ.